¹ Ka doŋ atubatuba ogik, Paulo olwoŋo lupwonnye bote, ka otyeko cuko cwinygi, ci ocikogi, ocito woko i Makedonia. ² Owok i dye lobo meno kun cuko cwiny dano ki lok mapol, ka oo i lobo pa jo Grik. ³ Otyeko dwe adek kunnu, ento ka oyubbe me kwaŋo nam pi cito i Ciria, Lujudaya gupiro lok i kome, ci Paulo omoko ni doŋ ebidok ewok ki i Makedonia. ⁴ Copater wod pa Piro olwoke, kacel ki Lutecalonika Aristako ki Cekundo, ki Gayo Laderube, ki Temceo, kacel ki jo Acia, Tukiko ki Tropimo. ⁵ Gin gucito anyim, gukurowa i Teroa. ⁶ Wan wakwaŋ waa ki i Pilipi ma nino madito me Mugati ma Tobi Pe Iye doŋ okato, ka wakwaŋ pi nino abic ci wao botgi i Teroa, watyeko kunnu nino abiro. ⁷ I kom nino mukwoŋo me cabit, ka wacokke ka baro mugati, Paulo obedo ka lok kwedgi pien onoŋo mito wot woko odiko; ci oloko kare malac nio wa i cwiny dyewor. ⁸ Mac tara mapol obedo ka lyel i kicika ka ma wacokke iye-ni. ⁹ Onoŋo tye awobi mo ma nyiŋe Yutiko ma obedo i waŋ dirica. I kare ma Paulo ori ka lok, ka nino onuro awobi-nu mada, ci opoto piny nia ki i ot me adekke, gitiŋe ma oto woko. ¹⁰ Ka Paulo olor piny, ci oryebbe i kome okwake, owaco ni, “Pe cwinywu opoti, kwone pud tye.” ¹¹ Ka Paulo oito odok malo, ka obaro i mugati ci gucamo. Obedo ka lok kwedgi nio kwarpiny, ka opokke kwedgi. ¹² Gucito ki awobi meno makwo, cwinygi obedo yom matek. ¹³ Wan watelo yo wadonyo i mel, ci wakwaŋ wao i Acco ma wageno ni Paulo bidonyo i mel kunnu, pien onoŋo en ociko kumeno kun mito ni ewok ki i wi tura. ¹⁴ Ka oromo kwedwa i Acco, ci wagamo en i mel, wacito kwede wa i Mitulene. ¹⁵ Ka wakwaŋ waa ki kunnu ci orwone wakemo Kioc; ka orwone mukene wao wa Camoc, i ŋe nino meno wao i Mileto. ¹⁶ Pien Paulo onoŋo omoko ni ebikwaŋ ewok kun ekato Epeco akata, wek pe etyek kare i Acia, pien onoŋo nene rune wek ebed i Jerucalem ka twerre i nino me Pentekote. ¹⁷ I kare ma en tye i Mileto ci ocwalo kwena i Epeco pi lwoŋo ludoŋo pa lwak muye Kricito gubin bote. ¹⁸ Ka guo bote, ci owaco botgi ni, “Wun kikomwu wuŋeyo kit ma yam abedo kwede i kinwu wun ducu, nia i kare ma tyena okwoŋo nyono lobo Acia, ¹⁹ kun atiyo ki Rwot ki mwolo ducu, ki pig waŋ, ki ayela mupoto i koma pi Lujudaya ma gupiro lok i koma. ²⁰ An yam pe aŋuny adok ki ŋeya aweko tuco lok mo botwu ma twero konyowu, kun apwonyowu i dye lwak ki i ot ki ot. ²¹ Atito atyer bot Lujudaya ki bot jo Grik bene ni myero guŋut i kom balgi, gudwog cen bot Lubaŋa, ci guye Rwotwa Yecu Kricito. ²² Kombeddi an doŋ abecito i Jerucalem, ma an lamabuc pa Cwiny Maleŋ, kun pe aŋeyo gin ma bipoto i koma kunnu. ²³ Kono Cwiny Maleŋ aye bedo ka titta ki i gaŋ ducu ni twec ki can madwoŋ aye tye ka kura. ²⁴ Ento kwona doŋ pe obedo gin me wel ki tuŋ bota, pe pire doŋ dit ki bota, ento myero an doŋ acob ŋwecca keken ki dog tic ma alimo ki bot Rwotwa Yecu, me tito lok me kwena maber me kica pa Lubaŋa. ²⁵ Kombeddi doŋ aŋeyo ni wun ducu ma yam abedo ka wot i kinwu kun apwonyowu ki lok i kom ker pa Lubaŋa pe doŋ wubineno waŋa. ²⁶ Mumiyo atito botwu tin atyer ni, ka kwo pa ŋat mo i kinwu orwenyo, aliine pe tye i wiya, ²⁷ pien pe aŋuny adok ki ŋeya aweko tuco botwu gin ducu ma Lubaŋa oyubo. ²⁸ Wugwokke kekenwu ki dwol romiwu ducu ma Cwiny Maleŋ oketowu me bedo lugwokone, wek wukwa lwak pa Lubaŋa ma en owilogi ki remo me wel madwoŋ pa Wode. ²⁹ Aŋeyo ni ka apokke woko kwedwu, orudi mager bidonyo i kinwu ci pe gibitimo kica bot romi. ³⁰ Dok i kin wun kikomwu bene bia iye jo ma gibiloko lok ma ŋako dano ci gibwolo lupwonnye miyo gilubo korgi. ³¹ Mumiyo acikowu ni wugwokke, kun wupo ni yam abedo ka pwonyo ŋat acel acel i kinwu ma pe aliŋ pi mwaka adek kulu dyeceŋ ki dyewor kun akok ki pig waŋa. ³² Kombeddi doŋ amiyowu, i ciŋ Lubaŋa ki i lokke me kica ma twero, miyo wudoŋo wubedo matek, miyo wunoŋo dulwu ki i kom gin ma Lubaŋa oyubbe me miyo bot jo ducu ma en olonyogi gudoko maleŋ. ³³ An yam cwinya pe opukke i kom lim pa ŋat mo kadi ki ginarukane. ³⁴ Wuŋeyo kekenwu ni anoŋo gin ducu ma mitte pira ki pi jo ma atye kwedgi ki tic ma atiyo ki ciŋa en-ni. ³⁵ I kare ducu atyeko nyuto botwu ni pi tiyo tic matek macalo meno myero wakony lugoro kun wapo lok pa Rwotwa Yecu ma yam owaco ni, “Miyo mot kelo gum makato gamo agama.” ³⁶ Ka otyeko loko lok meno, ci orumo coŋe piny olego kwedgi ducu. ³⁷ Gin ducu gukok kun gikwako ŋut Paulo ki mot me mar. ³⁸ Gin mucwero cwinygi twatwal makato ducu obedo lok ma en owaco botgi ni pe dok gibineno waŋe. Ci gulwoke wa i mel.