¹ Ka Apolo tye i Korint, Paulo orabo piny ki malo ka obino i Epeco. Onoŋo lupwonnye mogo kunnu, ² ci openyogi ni, “Wun yam wulimo Cwiny Maleŋ i kare ma wuye Kricito?” Gugamo ni, “Pe, wan peya wawinyo ni Cwiny Maleŋ tye.” ³ Owaco botgi ni, “Con gibatijawu ki kit batija aŋo?” Gugamo ni, “Ki batija pa Jon.” ⁴ Paulo ogamo ni, “Jon yam batija dano pi ŋut i kom balgi, kun tito bot dano ni guye ŋat ma bibino lubo kore-ni, meno en Yecu.” ⁵ Ka guwinyo lok man, ci gibatijagi i nyiŋ Rwot Yecu. ⁶ Ka Paulo oketo ciŋe i komgi, ci Cwiny Maleŋ obino i komgi; gucako dumo leb mapatpat kun gitito lok pa Lubaŋa. ⁷ Gin ducu welgi romo ka apar wiye aryo. ⁸ Paulo odonyo i kacokke kun loko ki tekcwiny laboŋo lworo pi dwe adek, kun laro lok ki bolo lok i kom ker pa Lubaŋa. ⁹ Ento jo mogo ma pe guye ma gudiŋ gucako loko lok marac i kom Yo meno i nyim lwak, ci Paulo opokke woko kwedgi, kun woto kacel ki lupwonynye, obedo ka laro lok nino ducu i cukul pa Tirano. ¹⁰ Man omedde otyeko mwaka aryo, mumiyo jo ma gibedo i Acia guwinyo lok pa Rwot, Lujudaya ki Lugrik ducu. ¹¹ Ci Lubaŋa otiyo taŋo madoŋo ki i ciŋ Paulo. ¹² Wa kitambarane nyo boŋŋine me tic yam gikwanyo woko ki bote ka gitero bot lutwo, ci two caŋ woko, ki cen bene a woko ki i kom dano. ¹³ Lujudaya mogo ma lumalgaŋ, ma gin luryem cen, gucako tuco nyiŋ Rwot Yecu i nyim jo ma cen omakogi kun giwaco ni, “Akwoŋowu ki nyiŋ Yecu ma Paulo tito pire-ni.” ¹⁴ Yam tye Lujudaya mo ajwaka madit ma nyiŋe Cekewa, ma awobene abiro gitimo kit meno. ¹⁵ Ento cen marac odok iye botgi ni, “Yecu aŋeyo, ki Paulo bene aŋeyo; ento wun aŋagi?” ¹⁶ Ci laco ma cen marac omako-ni okato i komgi ci obwoyogi woko, oryemogi, ci gumwomme woko ki i ot kun gitye munero ki ret omakogi bene. ¹⁷ Lok man oŋene bot jo ma gibedo i Epeco ducu, Lujudaya ki Lugrik bene; lworo omakogi ducu, ci giworo nyiŋ Rwot Yecu. ¹⁸ Ki lwak jo ma koni doŋ guye Yecu gubino kun gituco ci giyeko te tyetgi ducu. ¹⁹ Ki jo ma yam lujogi gukelo buk tyetgi guguro kacel guwaŋogi woko i nyim lwak ducu. Ka gikwano welgi ci ginoŋo romo lim ryal alip pyerabic kulu. ²⁰ Kit meno lok pa Rwot odoŋo omedde ki twero madwoŋ. ²¹ Lucen ka meno otum ci Paulo otamo ki i cwinye me cito i Makedonia ki i Akaya ka ekat kwede i Jerucalem, kun waco ni, “Myero acit anen wa Roma bene.” ²² Ci ocwalo lukonnye aryo i Makedonia, Temceo ki Eracto; en kikome odoŋ i Acia pi kare manok. ²³ I kare meno atubatuba magwa ocakke i kom Yo pa Kricito. ²⁴ Laco mo ma nyiŋe Demetrio latet ryal, yam teto ryal timo kwede cal jok ma dako ma nyiŋe Atemi ci kelo kwede lim madwoŋ bot ludiro tic. ²⁵ En ocokogi ogurogi kacel ki jo mukene ma gitiyo kit tic acel-lu, ci owaco botgi ni, “Lutuwa, wun wuŋeyo ni lonyowa a i tic man. ²⁶ Doŋ wuneno dok wuwinyo bene ni Paulo man tye ka bito dano, pe i Epeco keken ento oromo i Acia ducu. Tye ka loko jo mapol me lubo kore, kun titogi ni lubaŋa-gu ma gitiyo ki ciŋ pe gin lubaŋa. ²⁷ Doŋ gin marac onen, pe i kom ticwa man keken ma gilanyo pire, ento wa ot me woro lubaŋawa madit, Atemi, bene pire doŋ biboto woko, ki deyone bene gibikwanyo woko, en ma dano i lobo Acia ki me lobo ducu giworo-ni.” ²⁸ Ka guwinyo lok man ci gutwarre malo ki kiniga gucako wo matek ni, “Atemi pa jo Epeco dit mada.” ²⁹ Kit meno gaŋ iye orubbe woko; gin ducu guriŋo i ka poro tuko kun giywayo Gayo ki Aristako, Lumakedonia ma yam guwoto kacel ki Paulo. ³⁰ Paulo onoŋo mito cito ka donyo i dye lwak, ento lupwonnye pe guye. ³¹ Ludito me lobo Acia mogo bene ma gin lureme gucwalo lok bote ni pe otem donyo i ka poro tuko. ³² Jo mogo gidaŋŋe mapat ki jo mogo giloko pat, pien lwak mucokke ducu doŋ gukeco woko, pol pa dano bene pe giŋeyo lok ma ogurogi kacel. ³³ Jo mogo ma i lwak gutamo ni lokke otiko Alegijanda, pien Lujudaya gukete i nyim cokke, ci Alegijanda ojukogi ki ciŋe kun mito pido lok i nyim lwak. ³⁴ Ento ka guniaŋ ni en Lujudaya, gucako wo awoya ci gudaŋŋe ki dwan acel pi cawa aryo kulu ni, “Atemi pa Jo Epeco dit mada.” ³⁵ Lacen ladit ma en aye karan me gaŋ ojuko dano ci owaco botgi ni, “Wun jo Epeco, aŋa ma pe ŋeyo ni gaŋ Epeco aye lagwok ot woro Atemi madit, ki got maleŋ ma yam opoto ki i polo-ni? ³⁶ Lok man pyem mo pe iye, wun doŋ myero wubed mot, pe wutim gin mo ki kurokuro. ³⁷ Wun wukelo jo man ma pe guyako gin mo ki i ot jok, pe bene guyeto lubaŋawa ma dako-ni. ³⁸ Ka ce Demetrio ki lutet gitye ki lok adot i kom ŋat mo, lukiko tye, luloyo bene gitye; wek gupidde ki kunnu. ³⁹ Ento ka tye lok mukene ma wumito, meno gibityekone i cokke me nino ducu macalo cik tye. ⁴⁰ Pien watwero poto i can pi gin ma otimme tin-ni kun giwacci watimo bwami, pien pe tye tyen lok mo ma watwero nyuto pi kit woo ma otimme tin.” Ka otyeko loko lok man, ci oketo cokke woko.