¹ Ka meno otum, Paulo oa ki i Atene, ocito Korint. ² Kunnu en onoŋo Lajudaya mo ma nyiŋe Akwila ma ginywalo i Ponto, ma pud obino kenyo abina nia ki i Itali kacel ki dakone Pricikila, pien laloc madit Kalaudio onoŋo ociko ni Lujudaya ducu myero gua woko ki i Roma. Paulo ocito ka limogi ci obedo botgi, ³ pien gin ducu gitiyo kit tic acel, ci gucako tic, pien gin lutim kema. ⁴ En obedo ka laro lok i kacokke i nino me cabit ducu, kun temo loyo tam pa Lujudaya ki jo Grik. ⁵ Ka Cira ki Temceo gua ki i Makedonia, gunoŋo Paulo ogeto ka tito lok kun tito ki Lujudaya ni Kricito ma Lubaŋa oyero-ni aye Yecu. ⁶ Ka gilulo i kome, giyete, ka oteŋo ginarukane, owaco botgi ni, “Remowu obed i wiwu! An iya gira leŋ. Cakke tin abicito bot Lurok.” ⁷ Ka oa ki kunnu ci ocito i ot pa laco mo ma nyiŋe Titio Yucito, lawor Lubaŋa ma ode tye cok ki kacokke pa Lujudaya. ⁸ Kuricipo, ladit me kacokke, oye Rwot ki jo ma i ode ducu; ki lwak jo mapol ma i Korint ma giwinyo lok pa Paulo guye bene, ci gibatijagi. ⁹ Rwot onen bot Paulo i waŋ lek dyewor owacce ni, “Pe ibed i ki lworo, ento bed ka lok, pe iliŋ; ¹⁰ pien an atye kwedi, pe tye ŋat mo ma bitubbe i komi ki timi marac, pien atye ki lwak jo mapol i gaŋ man.” ¹¹ Ci obedo kunnu mwaka acel ki dwe abicel kun pwonyo lok pa Lubaŋa i kingi. ¹² Ento i kare ma Galio aye obedo laloyo me lobo Akaya, ci Lujudaya gucokke gutube i kom Paulo, ŋukele wa i nyim kom me ŋolo kop, ¹³ kun giwaco ni, “Laco man tye ka bito dano ni guwor Lubaŋa i yo ma pe lubo cik.” ¹⁴ Ento i kare ma Paulo mito ŋamo doge ka lok, Galio owaco ki Lujudaya ni, “Ka onoŋo lok man ocuŋ i kom tim mo marac, nyo kom bal mo marac, onoŋo myero awiny kokowu, wun Lujudaya. ¹⁵ Ento kit macalo obedo pyem i kom lok mogo nyo nyiŋ mogo ma dok i kom cik ma mewu-ni, wun aye wunen giwu kite; an akwero bedo laŋolkop i lok macalo meno.” ¹⁶ Ci oryemogi woko ki i nyim kom me ŋolo kop. ¹⁷ Ka gin ducu gumako Cocitene, ladit me kacokke, ci gigoye i nyim kom me ŋolo kop. Ento Galio pe oketo iye cwinye. ¹⁸ Ka man otum, ci Paulo dok odikke kunnu, ka oweko utmego ci okwaŋo nam ocito i lobo Ciria kun Pricikila ki Akwila gunywako kwede yo. Ci olyelo wiye i Cenkeria, pien onoŋo okwoŋo kwoŋ. ¹⁹ Ka gucito i Epeco, ci oweko Pricikila ki Akwila kunnu; ento en ocito i kacokke, olaro lok ki Lujudaya. ²⁰ Ka gulego ni koŋ obed kunnu kare malac, ci okwero woko. ²¹ Ento i kare ma en cikogi owacci, “Abidwogo botwu ka Lubaŋa biye,” ci ocako kwaŋ nia ki i Epeco. ²² Ka doŋ otyeko o i Cecaria, ci ocito i Jerucalem ka moto jo muye Kricito, ka doŋ olor piny i Antiokia. ²³ Odikke koŋ kunnu, ka lacen dok oa olimo kabedo ducu ma i lobo Galatia ki Perugia kun jiŋo cwiny lupwonnye ducu. ²⁴ Lajudaya mo ma nyiŋe Apolo ma ginywalo i Alegijanderia yam obino i Epeco. En laco ma lalok twatwal, tye ki ŋec matut i ginacoya. ²⁵ Onoŋo yam gibedo ka pwonye yo pa Rwot, ma lok okur i cwinye, kun pwonyo lok i kom Yecu atir mupye, kun kono ŋeyo lok me batija pa Jon keken. ²⁶ En yam loko ki tekcwiny laboŋo lworo i kacokke, ento ka Pricikila ki Akwila guwinyo lokke, ci gutere gumiye pwony matut i kom Lubaŋa ma niaŋe makato. ²⁷ I kare ma en mito kwaŋ cito i Akaya, utmego gujiŋo cwinye, ka gucoyo waraga bot lupwonnye wek gujole,. Ka ceŋ oo kunnu, ci okonyo jo ma yam gulimo gum me niye mada, ²⁸ pien oloyo tam pa Lujudaya atyer i nyim lwak kun nyuto ki i ginacoya ni Kricito ma Lubaŋa oyero aye Yecu.