¹ Ka doŋ gutyeko wok ki i Ampipoli ki Apolonia, ci gubino i Tecalonika, ka ma kacokke pa Lujudaya tye iye. ² Paulo odonyo iye macalo kite tye, ori kunnu pi cabit adek kun obedo ka laro lok kwedgi i kom lok ma i ginacoya. ³ Obedo ka tito lok kikore ma moko ni Kricito myero onen can ki cer woko ki i kin jo muto, kun waco ni, “Yecu man ma atito botwu-ni en aye Kricito ma Lubaŋa oyero.” ⁴ Ci jo mukene i kingi lok ocobo cwinygi, guribbe i kom Paulo ki Cira, ki lwak jo Grik mapol ma giworo Lubaŋa, kacel ki mon madito madwoŋ. ⁵ Ento Lujudaya nyeko omakogi, gukelo jo ma tubo kin dano atata, ci gucoko dano gukelo woo matek i gaŋ gurumo ot pa Yacon kun giyenyo Paulo ki Cira pi kelogi woko bot lwak ki tek. ⁶ Ka nojogi oloyogi, ci guywayo Yacon ki utmego mogo guterogi i nyim luloc me gaŋ kun gidaŋŋe ni, “Jo man gitito gin mapat, gitye ka loko tam pa dano me lobo woko, gubino kwede wa kany. ⁷ Yacon aye ojologi; gin gitye ka balo cik pa Cecar ma giwaco ni tye kabaka mukene, en Yecu.” ⁸ Ka lwak dano ki luloc me gaŋ guwinyo lok man, ci gucako tugge. ⁹ Luloc gumiyo Yacon ki utmego mukene guculo lim me lajeŋ, ka lacen guwekogi gucito. ¹⁰ Utmego gucwalo Paulo ki Cira gucito woko i dyewor meno wa i Berea cut; ka guo ci gucito i kacokke pa Lujudaya. ¹¹ Lujudaya ma kunnu onoŋo yam gin jo ma kitgi beco makato jo ma i Tecalonika. Gujolo lok ma gitito botgi ki ciŋgi aryo, kun giŋiyo ginacoya ma yam gicoyo nino ducu pi neno ka lok ducu tye kit meno ada. ¹² Mumiyo lwak jo mapol guye Yecu, ki lwak mon madito ma Lugrik ki co mapol. ¹³ Ento ka Lujudaya ma i Tecalonika guwinyo ni Paulo ki Cira gitye ka tuco lok pa Lubaŋa i Berea bene, gin bene gubino kunnu, gurubo dano dok gutugo lwak. ¹⁴ Utmego gucwalo Paulo woko oyot i yo ma cito i dog nam, ento Cira ki Temceo gudoŋ. ¹⁵ Jo ma gulwoko Paulo-ni gutere wa i Atene; ka ocikogi pi Cira ki Temceo ni gucit bote oyotoyot, ka gua, gudok. ¹⁶ I kare ma Paulo tye ka kurogi i Atene, ka oneno gaŋ meno opoŋ ki cal jogi, ci olyeto cwinye mada. ¹⁷ Obedo ka laro lok ki Lujudaya ki jo ma giworo Lubaŋa i kacokkegi, ki i cuk bene ki jo ma en rwatte kwedgi jwijwi. ¹⁸ Luryeko mogo me dul pa Luepikurea ki Lucitoiki bene gurwatte kwede. Jo mukene guwacci, “Lalok atata-ni temo tito lok i kom gin aŋo?” Jo mukene guwacci, “En nen calo tito lok i kom jogi mogo ma welo,” pien noŋo en tye ka tito lok me kwena maber i kom Yecu ki i kom cer i kin jo muto. ¹⁹ Ci gimake gitere i nyim cokke ma yam rwatte i wi got ma gilwoŋo Areopago, kun giwaco ni, “Wamito ŋeyo kit pwony manyen ma ikelo-ni, ²⁰ pien in dok ikelo lok ma welo twatwal i itwa, ci wamito niaŋ tere.” ²¹ I kare meno lwak jo Atene ducu ki welo ma gibedo kunnu gityeko karegi ducu ka tito lok ki winyo lok i kom gin manyen. ²² Ka Paulo ocuŋ i dye cokke me Areopago, ci owaco ni, “Wun jo Atene, aniaŋ ni i kit ducu wun ludini mada, ²³ pien i kare ma awoto i dye gaŋ aneno keno tyer mo ma gicoyo i kome ni, ‘Pa lubaŋa ma pe ŋene.’ Gin ma wuworo ma pe wuŋeyo, man aye atuco botwu-ni. ²⁴ Lubaŋa ma yam ocweyo lobo ki jami ducu ma tye iye-ni, en aye Rwot me polo ki lobo, pe bedo i ot ma dano gutiyo ki ciŋgi, ²⁵ pe bene mito ni dano guwore ki gin ma gutiyo atiya ki ciŋgi, macalo gin mo orem bote, pien en kikome aye miyo kwo ki dano ducu wa ki yweyo ki jami ducu. ²⁶ En yam ocweyo rok ducu nia ki i kom dano acel wek gubed i wi lobo ma onoŋo en omoko kare kikome ma myero gubed iye, ki waŋ apokki lobo me kabedogi, ²⁷ wek gubed ka yenyo Lubaŋa, wek ka giboŋo aboŋa gwok nyo gugud kome ci ginoŋe, pien en pe tye cen ka mabor ki bot ŋat acel acel i kinwa. ²⁸ Wakwo i en, wawoto i en, wabedo i en’, macalo ŋat mo ocoyo. Ŋat acel i kin lucocwu bene ocoyo ni, ‘Wan bene wan litinone.’ ²⁹ Kit meno ka wan litino pa Lubaŋa, pe myero watamu ni Lubaŋa cal ki cal mo me jabu nyo ryal nyo got ma gipayo ki diro ki tam pa dano. ³⁰ I kare me kwiya piny Lubaŋa yam pe oyaro pire, ento i kare man en doŋ ociko ni dano ducu myero guŋut i kom balgi, ³¹ pien en doŋ otyeko moko nino ma en biŋolo iye kop i kom dano ducu ma i lobo i kit ma atir, kun doŋ oyero dano ma myero oŋol kop ma ka-kare, omiyo bene lanen ma nyuto ni man bitimme pi cero dano meno ki i kin jo muto.” ³² Ka guwinyo Paulo ka loko lok i kom cer ki i kin jo muto, jo mogo gucako caye ki jo mukene guwacci, “Wamito imed tito lok man botwa kare mukene.” ³³ Ka Paulo okato woko ki botgi, owoto gire. ³⁴ Ento jo mukene gumako i kome, guye lokke. I kingi onoŋo tye Dionecio ma Laareopago, ki dako mo ma nyiŋe Damali, ki jo mukene bene.