¹ Ka dok oo wa i Derube ki Licitra, lapwonnye mo onoŋo tye kunnu ma nyiŋe Temceo, wod pa dako mo ma Lajudaya ma oye Kricito, ento wonne aye Lagrik. ² Utmego ma i Licitra ki Ikonio giloko ki nyiŋ Temceo maber. ³ Paulo omito ni ewot kwede; ka otere, ci olire pi Lujudaya ma gitye kunnu, pien gin ducu onoŋo giŋeyo ni wonne Lagrik. ⁴ I kom wotgi ducu ma giwoto iye i gaŋi mapatpat gubedo ka miyo bot dano ma guye Kricito cik me aluba ma yam lukwena ki ludoŋo gumako i Jerucalem. ⁵ Kit meno lwak muye Kricito i kabedo acel acel gumoko matek i niye, gubedo ka medde mapol nino ducu. ⁶ Ka guwoto gubaro i lobo Perugia ki Galatia, ci Cwiny Maleŋ ogeŋogi ni pe gulok lok pa Lubaŋa i Acia. ⁷ Ka guo ma gukemo Micia, ci gutemo dok tuŋ Bitinia, ento Cwiny pa Yecu pe oye ki gin, ⁸ mumiyo gukato ki i Micia, gucito piny i Teroa. ⁹ Paulo oneno gin mo i waŋ lek dyewor, laco mo me Makedonia noŋo ocuŋ i nyime, obako doge bote kun waco ni, “Kwaŋ nam ibin i Makedonia ikonywa.” ¹⁰ Ka otyeko neno man i waŋ lek, ci oyotoyot wayubbe me cito i Makedonia, kun watamo ni Lubaŋa aye olwoŋowa pi tito lok me kwena maber bot jo kunnu. ¹¹ Wacako kwaŋo nam ki i Teroa, wakwaŋ atir nio wa i Camotrake, ci orwone wao i Neapoli. ¹² Ki kunnu wacito i Pilipi gaŋ pa jo Roma ma en aye gaŋ madit makato ma i lobo Makedonia. Ci wabedo i gaŋ meno pi kare manok. ¹³ I ceŋ cabit wacito woko i ŋe doggaŋ i kabedo mo ma i dog kulu, ma watamo ni gwok nyo ka lega tye kunnu; ci wabedo piny ka lok mon ma gugurre. ¹⁴ ŋat acel ma obedo ka winyo lokwa en aye dako ma nyiŋe Ludia ma oa ki i gaŋ ma gilwoŋo Tuatira. En lacat boŋo ma lamar lamar, dano ma woro Lubaŋa. Rwot oyabo tamme omiyo oketo cwinye ka winyo lok ma Paulo waco. ¹⁵ Ka doŋ gibatija en kacel ki jo ma i ode, en obako doge botwa kun waco ni, “Ka wuneno ni an lagen bot Rwot, ci wubin wubed i oda,” nio ka en oridowa, wadoko welone. ¹⁶ Ka ceŋ wacito i kabedo me lega, ci warwatte ki nyako mo ma aŋeca ma tyeto tyet ki jok ma bedo bote, kun kelo lwak lim mapol bot luditone pi lok ma en tyeto. ¹⁷ En obedo ka lubo korwa, kun daŋŋe ni, “Jo man gin aye lutic pa Lubaŋa Mamalo Twal ma gituco botwu yo me larre.” ¹⁸ En timo kit meno nino ducu. Ento kiniga omako Paulo, ci olokke owaco ki jok ni, “Aciko in i nyiŋ Yecu Kricito, a woko ki i kome.” Ci oa woko i kome i cawa meno cut. ¹⁹ Ento ka luditone guneno ni gen me noŋo lim doŋ oa woko, gumako Paulo ki Cira guywayogi guterogi wa i cuk i nyim luloc, ²⁰ ka guketogi i nyim luŋolkop, ci guwaco ni, “Jo man gin Lujudaya, ci gurubo gaŋwa woko. ²¹ Gin gipwonyo kit mogo ma cikwa pe ye ni wagam nyo walubgi, pien wan Luroma.” ²² Ci lwak guribbe ka lweny i komgi; luŋolkop bene guyeco ginarukagi ki i komgi ci guciko ni gipwodgi ki odoo. ²³ Ka gityeko pwodogi matek, ci gucwalogi i mabuc, kun giciko lalo mabuc ni ogwokgi maber. ²⁴ Ka doŋ owinyo cik ma kit meno, oketogi i kicika ma i tyelo, oroyo okol i tyengi. ²⁵ Ento i cwiny dyewor Paulo ki Cira gubedo ka lega ki ka wero wer bot Lubaŋa ma lumabuc bene giwinyogi. ²⁶ Ci lobo ocako yeŋŋe matek, guti me ot mabuc oyeŋŋe, ci doggola ducu guyabbe woko cut, ki nyor pa ŋat acel acel ogony woko. ²⁷ Ka lalo mabuc oco ci onoŋo ni dog ot mabuc oyabbe woko tye twolo, owoto pala lucwanne kun mito nekke kekene, pien otamo ni lumabuc gulwi woko. ²⁸ Ento Paulo odaŋŋe ki dwane matek ni, “Pe itimme kekeni marac, wan ducu watye kany.” ²⁹ Lalo ot mabuc ociko ni gikel mac, ci odonyo i tyelo oyot kun kome myel ki lworo, oryebbe piny i nyim Paulo ki Cira. ³⁰ Ka en okelogi woko ci owaccigi ni, “Luditona, myero atim aŋo wek alarre?” ³¹ Guwaco bote ni, “Ye Rwot Yecu, ci ibilarre, in ki jo ma i odi ducu.” ³² Ci guloko lok pa Rwot bote ki bot jo ducu ma i ode. ³³ I dyewor i cawa meno kikome oterogi olwoko waŋ retgi, ci gibatija en cut ki jo me ode ducu. ³⁴ Ka oterogi i ode, omiyogi cam; cwinye obedo yom ki jo me ode ducu, pien doŋ otyeko ye Lubaŋa. ³⁵ Ka piny oru, ci luŋolkop gucwalo askari ka waco ni, “Wek jo meno doŋ guciti.” ³⁶ Ci lalo mabuc otito ki Paulo ni, “Luŋolkop gucwalo lok ni myero wuciti. Wukat woko kombeddi wuwot ki kuc.” ³⁷ Ento Paulo owaco botgi ni, “Gityeko goyowa i nyim lwak, ma peya giŋolliwa kop, ma wan Luroma, doŋ gitweyowa i i mabuc, ka kombeddi dok gigonyowa muŋ? Pe; wek gin aye gubin gugonywa pigi kengi.” ³⁸ Ci askari gutito lok man bot luŋolkop, ci gubedo ki lworo ka guwinyo ni gin Luroma. ³⁹ Ka gubino gubako doggi botgi, ka gukwanyogi woko, gucikogi ni gua woko ki i gaŋ meno. ⁴⁰ Ka gukato woko ki i mabuc, gucito i ot pa Ludia; ka doŋ gutyeko neno utmego, ci gucuko cwinygi, ka gucito.