¹ Ento jo mogo gubino ki i Judaya ma gupwonyo utmego ni, “Ka pe gilirowu macalo kit pa Moses tye, pe wutwero larre.” ² Mumiyo Paulo ki Barnaba gubedo ka laro lok ki pyem kwedgi matek. Ci giyero Paulo ki Barnaba ki jo mukene, gicwalogi Jerucalem bot lukwena ki ludoŋo pi lok man. ³ Kit meno ka lwak muye Yecu gutyeko lwokogi ci guwok ki i Poiniki ki lobo Camaria kun gitito kit ma Lurok gulokke kwede bot Kricito ci gukelo yomcwiny madwoŋ bot utmego ducu. ⁴ Ka guo i Jerucalem, lwak muye Kricito, kacel ki lukwena ki ludoŋo, gujologi maber, ci gutuco gin ducu ma Lubaŋa obedo ka tiyone kwedgi. ⁵ Ento jo mogo ma guye ma gitye i dul pa Lubaparicayo gua malo bene kun giwaco ni, “Myero koŋ gilirgi, ki cikogi ni gumak cik pa Moses.” ⁶ Lukwena ki ludo jo gucokke gugurre ka laro lok man. ⁷ Ka pyem doŋ obedo dwoŋ, ci Petero oa malo owaco botgi ni, “Utmego, wun wuŋeyo ni yam con Lubaŋa oyero an ki i kinwu ni Lurok gibiwinyo lok me kwena maber ki i doga ka guye. ⁸ Dok Lubaŋa ma ŋeyo cwiny dano ducu obedo cadengi pi miyogi cwiny Maleŋ macalo yam omiyo botwa. ⁹ En pe oketo nipoko i kinwa ki gin, ento olonyo cwinygi pi niye. ¹⁰ Piŋo wun wutemo i Lubaŋa ma wumito riyo okol mapek i ŋut lupwonynye ma tiŋone oloyo kwarowa kadi wa wan bene? ¹¹ Ento wan waye ni wabilarre pi kica pa Rwotwa Yecu, ki gin bene kit meno.” ¹² Ka doŋ jo mucokke ducu guliŋ mot, kun giwinyo ka Barnaba ki Paulo gitito kit lanyut ki taŋo ma Lubaŋa obedo ka tiyogi ki ciŋgi i kin Lurok. ¹³ Ka doŋ gutyeko lokgi, ci Yakobo ogamo ni, “Utmego, wuwinya. ¹⁴ Cimeon doŋ otito kit ma Lubaŋa okwoŋo nyuto kwede ni eparo pi Lurok kun okwanyo ki i kingi lwak ma gilwoŋo ki nyiŋe. ¹⁵ Man aye lok ma yam lunebi gucwako, macalo gicoyo ni, ¹⁶ ‘I ŋe meno abidwogo ci abigero aduc pa Daudi ma yam opoto piny-nyi, abigero odoco ka ma yam oballe, abiroco odoco amiyo cuŋ maber, ¹⁷ wek jo mudoŋŋe guyeny Rwot, kacel ki Lurok ducu ma gilwoŋogi ki nyiŋa. ¹⁸ Meno Rwot aye ma owaco ma omiyo lok meno oŋene nia wa con.’ ¹⁹ Mumiyo an aŋolo ni, pe myero wayelu Lurok ma gulokke bot Lubaŋa, ²⁰ ento myero wacoyu warag botgi ni pe gucam gin mo ma gityero i nyim jogi, pien odoko gin me kwer, pe gutim tim tarwaŋ, pe gucam riŋo lee ma gideyo adeya, pe gucam remo. ²¹ Pien cakke i kare macon Moses tye ki jo ma gitito lokke i gaŋ ducu, kun gikwano cikke i kacokke i ceŋ cabit ducu.” ²² Ka doŋ lukwena ki ludoŋo, kacel ki lwak muye Kricito ducu, gutamo ni ber giyer dano ki i kingi, gicwalgi i Antiokia kacel ki Paulo ki Barnaba. Ci gucwalo Juda ma gilwoŋo Barcaba, ki Cira, gin aye jo ma gidito i kin utmego, ²³ gumiyogi waraga ma kwanne kit man ni, “Bot utmego ma Lurok ma i Antiokia ki Ciria ki Cilicia. Wan utmegiwu ma lukwena ki ludoŋo wamotowu mada. ²⁴ Wawinyo ni dano mogo ma gua ki botwa gubedo ka yelowu ki lok mapol, ki rubo tamwu woko, kadi bed wan pe wacikogi ki kit lok macalo meno. ²⁵ Pi meno wan ka wacokke waneno ni ber wayer dano wacwalgi botwu kacel ki Barnaba ki Paulo, ma wamarogi twatwal, ²⁶ gin jo ma doŋ gudyero kwogi pi Rwotwa Yecu Kricito. ²⁷ Mumiyo wacwalo botwu Juda ki Cira, gin bene kikomgi gibititowu lok ki doggi ma rom ki man ma wacoyo-ni. ²⁸ Cwiny Maleŋ oneno ni ber, kacel ki wan bene, pe waket yec mapek twatwal i komwu makato lok magi ma pigi tego: ²⁹ pe wucam gin ma gityero bot jogi, pe wucam remo ki riŋo lee ma gideyo adeya, pe wutim tim mo me tarwaŋ. Ka wugwokke i kom meno ducu, ci wubitimo ber. Doŋ wubed maber.” ³⁰ Kit meno ka gicwalogi, ci gin gucito i Antiokia; ka doŋ gucoko lwak kacel, ka gimiyogi waraga. ³¹ Ka jo kunnu gutyeko kwano, ci cwinygi obedo yom i kom lok ma gicoyo iye me cuko cwinygi. ³² Juda kacel ki Cira, ma gin bene lutit lok pa Lubaŋa, gucuko cwiny utmego ki lwak lok mapol ma miyogi teko. ³³ Ka gutyeko nino mapolpol kunnu, ci gulwokogi ki kuc i kare ma gidok bot utmego ma yam gucwalogi-ni. ³⁴ Ento Cira otamo ni ber edoŋo kunnu. ³⁵ Ento Paulo ki Barnaba gudoŋ i Antiokia, kun gipwonyo dano ki tito lok pa Rwot, kacel ki jo mukene mapol bene. ³⁶ I kare mo Paulo owaco ki Barnaba ni, “Bin wek wadok ka limo utmego ma i gaŋ ducu ma yam watuco iye lok pa Rwot, wanen kit ma gitye kwede.” ³⁷ Ci Barnaba onoŋo mito ni giwot ki Jon ma nyiŋe mukene Marako, ³⁸ ento Paulo otamo ni pe dok ber me tero dano ma yam oa owekogi i Pampulia, pe woto kwedgi i dog tic. ³⁹ Ci gubedo ka laro lok magwa, nio ka kingi opokke woko. Barnaba owoto ki Marako ci gukwaŋo nam gucito i Caiprac, ⁴⁰ ento Paulo oyero Cira ci gua ka doŋ utmego gumiyogi i ciŋ Rwot wek okonygi ki kicane. ⁴¹ Owoto obaro i Ciria ki Cilicia kun miyo tekcwiny bot lwak muye Kricito.