¹ I kare meno kabaka Kerode oketo ciŋe i kom jo mogo i kin jo muye Kricito. ² Oneko Yakobo omin Jon ki pala lucwan. ³ Ka doŋ oneno ni oyomo cwiny Lujudaya, ci omako Petero bene. Man otimme i kare me nino madito me mugati ma Tobi pe Iye. ⁴ Ka doŋ omake, ci okete i mabuc, omiye bot lukur-piny aŋwen aŋwen wek gukure, kun mito ni gipid lok i kome i ŋe nino madito me Kato Paska. ⁵ Gibedo ka kuro Petero i ot mabuc kit meno; ento lwak jo muye Kricito gubedo ka lego Lubaŋa pire matek. ⁶ I dyewor ma Kerode mito kele iye woko-ni, onoŋo Petero obuto onino i kin askari aryo, ma gitweye woko ki nyor aryo, ki lukur-piny bene onoŋo gitye ka kuro dog ot mabuc. ⁷ Nen, lamalaika pa Rwot onen, ci dero ocaro i kicika. Ogoyo but Petero ocoye woko, kun waco bote ni, “A malo oyot.” Ci nyor opoto woko ki i ciŋe. ⁸ Lamalaika owacce ni, “Ruk ginarukani, irwak war i tyeni,” ci otimo kit meno. Dok owacce ni, “Dwal boŋoni i komi ci ilub kora.” ⁹ Ci okato woko, olubo kore. En pe oŋeyo ni gin ma lamalaika timo-ni bedo me ada; en tamo ni etye ka lek. ¹⁰ Ka doŋ gukato lukur-piny mukwoŋo ki me aryone, ci guo i dog ot ma giloro ki nyonyo ma gikato kwede woko i dye gaŋ. Doggola oyabbe kene, ci gukato gucito woko, gulubo yo acel, ka lamalaika oweke woko. ¹¹ Petero ocako niaŋ pire kene kun waco ni, “Doŋ atyeko niaŋ kombeddi ni Rwot ocwalo lamalaikane olara woko ki i ciŋ Kerode ki i kom gin ducu ma Lujudaya gigeno ni bitimme i koma-ni.” ¹² Ka doŋ oniaŋ, ci ocito i ot pa Maliam min Jon ma nyiŋe mukene Marako, ka ma jo mapol gucokke gugurre iye, ma gitye ka lega. ¹³ Ka odwoŋo dog gaŋ ma i yo, ci aŋeca ma nyiŋe Roda obino ka niaŋ i kome. ¹⁴ Ka oniaŋ dwan Petero, yomcwiny ogeŋe yabo dog gaŋ woko, ento oriŋo omwomme i ot owacci, “Petero tye ocuŋ woko i dog gaŋ.” ¹⁵ Guwacce ni, “In lapoya.” Ento en orido ni tye ada. Gugamo ni, “Meno lamalaikane.” ¹⁶ Ento Petero dok omedde ki dwoŋone, ka guyabo, ci guneno en, ci guuro. ¹⁷ Ka ojukogi ki ciŋe ni guliŋ, ci otito botgi kit ma Rwot okwanye kwede ki i mabuc, kun waco ni, “Wupor lok man bot Yakobo ki bot utmego.” Ka oa woko ki kenyo, ocito woko ka mukene. ¹⁸ Ka piny oru, ci piny ocako lyetti woko ki bot askari, ni Petero man otimme niŋniŋ. ¹⁹ Ka Kerode oyenye ci pe onoŋe, ka openyo askari ma lukur-piny, ci ociko ni ginekgi woko. Ka en oa ki i Judaya ocito i Cecaria, obedo kunnu. ²⁰ Kiniga omako Kerode i kom jo Turo ki Cidon; ci gucokke gubino bote ma onoŋo gimer ki Blacito, ladit ma loyo ot pa kabaka. Gupenyo ni gimito kuc, pien lobogi limo cam ma a ki i lobo pa kabaka. ²¹ I kom nino ma giciko, Kerode oruko iye jor me kerre, oito obedo kwede i wi komker, oyabo lok botgi. ²² Ci lwak guwo matek ni, “Dwan Lubaŋa, pe dwan dano!” ²³ Lamalaika pa Lubaŋa ogoye woko cut, pien pe omiyo deyo bot Lubaŋa; ci kwidi ocamo kome ci oto woko. ²⁴ Ento lok pa Lubaŋa onya omedde ameda. ²⁵ Ka Barnaba ki Caulo gudwogo ki i Jerucalem ma doŋ gucobo tic ma giorogi iye, ci gukelo Jon ma nyiŋe mukene Marako.