¹ I kare meno lukwena ki utmego ma gitye i Jerucalem guwinyo ni Lurok bene doŋ guye lok pa Lubaŋa. ² Ka Petero ocito i Jerucalem, ci dul pa jo ma mito ni jo muye Kricito myero koŋ gilirgi gucako ŋono en, ³ kun giwaco ni, “Piŋo nene icito bot jo ma pe gilirogi ci icamo kwedgi?” ⁴ Ento Petero ogamo, ocako tito botgi ki kore kun wacci, ⁵ “I kare ma abedo i gaŋ me Jopa ma abedo ka lega, ci awille woko. Aneno gin mo ma lor piny macalo cuka madit ki i waŋ lek, kun bino piny ma tye ki twoke aŋwen, ci olor wa piny i nyima. ⁶ Ka aŋiyo kome cok, ci aneno iye lee, ki ŋuu ma camo riŋo, ki kwa anyai ducu ki winyo me polo. ⁷ Ci awinyo dwan ma wacca ni, ‘Petero, a malo inek wek icam.’ ⁸ Ento agamo ni ‘Pe, Rwot, pien peya jami ata ki me kwer odonyo i doga.’ ⁹ Ento dwan odok iye ki i polo ni, ‘Gin ma Lubaŋa olonyo in pe ilwoŋ ni obedo me kwer.’ ¹⁰ Man otimme tyen adek, ci jami meno gidwoko woko i polo. ¹¹ I kare meno kikome en aye jo adek ma gicwalogi bota ki i Cecaria guo kwede i ot ma yam watye iye-ni. ¹² Cwiny Maleŋ otitta ni awot kwedgi, ma pe apoko kin dano. Anywako wot ki utmego man abicel, ka wadonyo i ot pa dano meno. ¹³ Ci en otito botwa kit ma oneno ki lamalaika ocuŋ kwede i ode kun wacce ni, ‘Cwal kwena i Jopa wek guom Cimon ma gilwoŋo Petero; ¹⁴ en aye bititti lok ma bilaro in ki jo ma i odi ducu.’ ¹⁵ I kare ma acako lok, ci Cwiny Maleŋ opye i komgi kit ma con okwoŋo pye i komwa-ni, ¹⁶ ci apo lok ma yam Rwot owaco, ni, ‘Jon yam obatija dano ki pii, ento wun gibibatijawu ki Cwiny Maleŋ.’ ¹⁷ Ka ce Lubaŋa omiyogi mot ma rom ki ma omiyowa i kare ma waye iye Rwot Yecu Kricito, ci an aŋa ma atwero pyem ki Lubaŋa?” ¹⁸ Ka guwinyo lok man, ci guliŋ litik, ka gucako pako kun giwaco ni, “Lurok bene Lubaŋa doŋ omiyogi ŋut me donyo i kwo.” ¹⁹ Jo ma yam guket i kare me libo ma ocakke i kom Citefano-ni guwoto nio wa Poiniki ki Caiprac ki Antiokia, kun pe gitito lok bot ŋat mo, kono bot Lujudaya keken. ²⁰ Ento jo mukene i kingi, jo me Caiprac ki me Cirene, ka guo i Antiokia ci guloko ki Lugrik bene kun gitito pi Rwot Yecu. ²¹ Rwot oketo ciŋe i komgi, ci lwak jo mapol gulokke bote. ²² Lok man owinynye bot jo muye Kricito ma i Jerucalem, ci gucwalo Barnaba i Antiokia. ²³ Ka oo ci oneno tic me kica pa Lubaŋa, cwinye obedo yom iye. Ocuko cwinygi me moko i kom Rwot matek ki cwinygi ducu. ²⁴ Onoŋo en dano maber ma opoŋ ki Cwiny Maleŋ ki niye. Ci lwak jo mapol gumedde bot Rwot. ²⁵ Barnaba ocito Taruco ka yenyo Paulo; ²⁶ ka onoŋe ci okele i Antiokia. Gubedo kacel ki jo muye Kricito pi mwaka kulu kun gipwonyo lwak jo mapol. Nyiŋ lupwonye gikwoŋo lwoŋo ni Jo pa Kricito ki i Antiokia. ²⁷ I kare meno lunebi mogo gua ki i Jerucalem gucito i Antiokia. ²⁸ ŋat acel i kingi ma nyiŋe Agabo ocuŋ ci otito lok pi Cwiny Maleŋ ma onyutte lok ma i anyim, ni waŋ mo kec bipoto i lobo ducu; ci otimme i kare pa Kalaudio ma laloc madit. ²⁹ Pieno lupwonynye gumoko ni ŋat acel acel omi kony ki utmego ma gibedo i Judaya macalo twero; ³⁰ ci gutimo kit meno, ka gucwalo bot ludoŋo kun Barnaba ki Caulo aye gitero.