¹ Yam onoŋo tye laco mo i Cecaria ma nyiŋe Kornelio, ladit me dul askari ma gilwoŋo ni me Itali, ² laco ma woro Lubaŋa, en ki jo ma i ode ducu. En yam miyo jami mapol me konyo dano bot Lujudaya, kun lego Lubaŋa jwijwi. ³ I kin cawa aboŋwen me dyeceŋ oneno lamalaika pa Lubaŋa kun bino donyo bote, ma owacce i waŋ lek ni, “Kornelio” ⁴ En ociko waŋe i kome ki lworo madit, ci owaco ni, “Gin aŋo ba, ladit?” Ci owaco bote ni, “Legani ki motti me kony oito malo obedo gin me po i komi i nyim Lubaŋa. ⁵ Kombeddi doŋ icwal dano i Jopa, wek oom Cimon ma gilwoŋo Petero. ⁶ En otiro bot Cimon lanyoŋ pyen, ma ode cok ki dog nam.” ⁷ Ka lamalaika ma oloko kwede-ni otyeko wot, ci Kornelio olwoŋo luticce aryo ki askari acel ma woro Labaŋa ki i kin jo ma gitiyo bote-ni. ⁸ Ka otyeko tito botgi lok ducu, ci oncwalogi i Jopa. ⁹ Orwone ka guwoto guo cok ki gaŋ ma gicito iye-ni, ci Petero oito i wi ot malo ka lega i kin cawa abicel. ¹⁰ Kec ocako neke, kun mito ni ecam gin mo, ento onoŋo pud giyubo cam ayuba; ci owille woko, ¹¹ oneno ka polo oyabbe, ki jami mo olor piny, macalo cuka madit, kun bino piny ma tye ki twoke aŋwen. ¹² Onoŋo tye iye kit kwa lee ducu, wa kwa anyai ducu ki winyo me polo. ¹³ Ci dwan obino bote ma wacci, “Petero, a ineki wek icam.” ¹⁴ Ento Petero ogamo ni, “Pe, Rwot, peya acamo jami ata me kwer.” ¹⁵ Dwan dok obino bote tyen me aryone ni, “Gin ma Lubaŋa olonyo in pe ilwoŋ ni obedo me kwer.” ¹⁶ Man otimme tyen adek, ci jami meno gidwoko woko i polo. ¹⁷ I kare meno Petero iye obedo ka kalo akala kun tamo ni gin ma eneno i waŋ lek man nyuto gin aŋo? Nen, jo ma Kornelio ocwalogi gubedo ka penyo pi ot pa Cimon, kun gucuŋ i dog ot, ¹⁸ gilwoŋo lwoŋo matek kun gipenyo ka nyo Cimon ma gilwoŋo Petero otiro kenyo. ¹⁹ I kare ma Petero iye tye ka lwodo pi lek man, Cwiny Maleŋ owacce ni, “Nen, jo adek gitye ka yenyo in. ²⁰ A, ilor piny iwot kwedgi kun pe ikalo akala, pien an aye acwalogi.” ²¹ Ci Petero olor piny bot jo meno kun waco ni, “An aye ŋat ma wun wuyenyoni. Wun wubino kany piŋo?” ²² Gugamo ni, “Kornelio ma ladit me askari en dano ma cwinye atir, lalwor Lubaŋa, ma rok Lujudaya ducu giloko ki nyiŋe maber; lamalaika maleŋ aye ocike ni ocwal dano boti wek icit wa i ode, wek owiny gin ma ibiwaco.” ²³ Ci olwoŋogi oterogi i ot, gubedo welone. Orwone en oa ci ocito kwedgi, ki utmego mogo ma gibedo i Jopa gunywako kwede yo. ²⁴ Ka orwone mukene gudonyo i Cecaria, Kornelio obedo ka kurogi ma olwoŋo lutugi ki lureme ma gicokcok kwede ci gucokke bote. ²⁵ Ka Petero oo i dog ot, ci Kornelio oromo kwede, opoto oryebbe piny i te tyene kun wore. ²⁶ Ento Petero oile malo, kun waco ni, “A malo icuŋ; an bene adano adana.” ²⁷ Ka oloko kwede ci odonyo i ot, onoŋo lwak dano gucokke iye. ²⁸ Owaco botgi ni, “Wun wuŋeyo ni bedo me kwer bot Lujudaya me ribbe kwedwu, kadi wa limo larok mo. Ento Lubaŋa otyeko nyuto bota ni pe alwoŋ dano mo ni dano ata nyo ni me kwer. ²⁹ Mumiyo ka gilwoŋa ci abino laboŋo pyem mo. An dok apenyo aye ni wulwoŋa piŋo?” ³⁰ Kornelio ogamo ni, “Tin nino me aŋwenne i kin cawa man, onoŋo atye ka lega i oda i cawa me aboŋwen, ci nen ba, laco mo ocuŋ i nyima ma oruko boŋo ma ryeny, ³¹ kun waco ni, ‘Kornelio, legani otyeko winnye, ki motti me kony bene gipo pigi i nyim Lubaŋa. ³² Mumiyo in icwal dano i Jopa gupeny pi Cimon ma gilwoŋo Petero; en tye otiro i ot pa Cimon lanyoŋ pyen i dog nam.’ ³³ Kit meno acwalogi boti cut, ci in bene itimo ber ibino. Kombeddi wan ducu watye kany i nyim Lubaŋa pi winyo lok ma Rwot ociki kwede ducu.” ³⁴ Petero ocako lok ci owacci, “Adada aniaŋ atir ni Lubaŋa pe poko kin dano, ³⁵ ento en jolo dano ma i rok ducu ma gilworo en ki ma gitiyo gin ma tye atir. ³⁶ Wun wuŋeyo lok ma Lubaŋa ocwalo bot jo Icrael, kun tito lok me kwena maber me kuc ma Yecu Kricito okelo; en aye Rwot pa dano ducu. ³⁷ Lok man yam gituco oromo lobo Judaya ducu kun ocakke i Galilaya i ŋe kare ma Jon otito lok i kom batija. ³⁸ Wuŋeyo kit ma Lubaŋa owiro kwede Yecu Lanajaret ki Cwiny Maleŋ ki tek; kit macalo en yam wirre kwede kun tiyo gin maber dok caŋo jo ducu ma Catan yelogi; pien onoŋo Lubaŋa tye kwede. ³⁹ Dok wan lucadenne i kom gin ma en otiyo ducu i lobo Judaya ki i Jerucalem. Yam gineke kun giŋabe i kom yat, ⁴⁰ ento Lubaŋa ocere woko i nino me adekke, onyute bot dano; ⁴¹ pe bot dano ducu, ento bot wan jo ma yam Lubaŋa oyero pi bedo lucaden. Wan wacamo dok wamato kwede kacel i kare ma doŋ ocer woko ki i kin jo muto. ⁴² Dok ocikowa ni watiti lok ki dano kun wamiyo caden ni, man aye ŋat ma yam Lubaŋa oyero me bedo laŋolkop pa jo makwo ki jo muto. ⁴³ Lunebi ducu gubedo caden ni, dano ducu ma ye en gibiweko balgi woko pi nyiŋe.” ⁴⁴ I kare ma Petero pud tye ka loko lok meno, Cwiny Maleŋ opye i kom jo ducu ma gubedo ka winyo lokke. ⁴⁵ Lujudaya ma guye Yecu ma onoŋo gubino ki Petero guuro mada pien mot me Cwiny Maleŋ doŋ gionyo wa i kom Lurok. ⁴⁶ Guwinyo gin bene ka gidumo leb mapatpat kun gipako Lubaŋa. Petero openyo ni, ⁴⁷ “ŋat mo tye ma twero geŋo kelo pii wek pe gibatija jo man, kun noŋo doŋ gulimo Cwiny Maleŋ macalo wan-ni?” ⁴⁸ Ci ociko ni gibatijagi i nyiŋ Yecu Kricito. Gin gulege ni obed kwedgi pi kare mo.