¹ Ento Caulo onoŋo pud buro lupwonnye pa Rwot kun mito nekogi, ci ocito bot ajwaka madit pa Lubaŋa, ² olege waraga me cito kwede i Damaciko, wek ka enoŋo dano ma lubo Yo ma gitye kunnu, co wa ki mon, ci etwegi, ekelgi i Jerucalem. ³ I kare ma en tye ka wot, ma doŋ onyiko cok ki Damaciko, ci dero oa ki i polo oryeny ocaro kome. ⁴ Ka opoto piny ci owinyo dwan ma waco bote ni, “Caulo, Caulo, iyela piŋo?” ⁵ Ogamo ni, “In aŋa, Rwot?” Ci owacce ni, “An aye Yecu, ma itye ka yelone-ni. ⁶ Ento a idony i gaŋ, ci gibititti gin ma myero iti.” ⁷ Jo ma yam guwoto kwede gucuŋ laliŋ, ma kun giwinyo dwan ento pe gineno ŋat mo. ⁸ Caulo oa malo ki ka ma opoto iye piny i ŋom-mi, ento ka oyabo waŋe, ci pe oneno gin mo. Gipeye ki ciŋe gikele i Damaciko. ⁹ Obedo nino adek ma pe neno piny pe camo dok pe mato bene. ¹⁰ Onoŋo tye lapwonnye mo i Damaciko ma nyiŋe Anania. Rwot owacce i waŋ lek ni, “Anania.” En ogamo ni, “An atye en, Rwot.” ¹¹ Ci Rwot owaco bote ni, “A ilub yo ma gilwoŋo ni Atir, ipeny i ot pa Juda laco mo ma nyiŋe Caulo me Taruco; en bene noŋo tye ka lega. ¹² En oneno dano mo i waŋ lek ma nyiŋe Anania ka donyo bote kun keto ciŋe i kome wek waŋe oyabbe.” ¹³ Ento Anania odok iye ni, “Rwot, yam awinyo lok i kom dano man ki bot jo mapol pi kit ma otimo kwede joni marac i Jerucalem. ¹⁴ En obino kany bene ki twero pa ajwagi madito me tweyo jo ducu ma gilwoŋo nyiŋi.” ¹⁵ Ento Rwot owacce ni, “Citi, pien en aye gin ticca ma doŋ ayero pi tero nyiŋa i nyim Lurok ki luker ki jo Icrael. ¹⁶ An kikoma abinyutte can madwoŋ ma en myero ocir pi nyiŋa.” ¹⁷ Ci Anania oa ocito odonyo i ot. Oketo ciŋe i kome kun waco ni, “Ominwa Caulo, Rwot Yecu ma onyutte boti i waŋa yo ma ibino iye-ni ocwala boti wek waŋi oyabbe, wek ipoŋ bene ki Cwiny Maleŋ.” ¹⁸ Ci gin macalo atura opoto woko ki i waŋe cut, ocako neno piny. Ka oa ci gibatija en, ¹⁹ ka lacen ocamo cam ci olimo tek. Obedo kunnu pi kare manok ki lupwonnye ma i Damaciko. ²⁰ Ocako tuco lok i kom Yecu i kacokke cut kun waco ni, “En Wod pa Lubaŋa.” ²¹ Ci jo ducu ma guwinyo lokke guuro, kun giwaco ni, “Man pe en aye laco ma yam omito tyeko jo ma gikwoŋo nyiŋ man i Jerucalem-mi? Dok en bene obino kany pi lok meno, pi tweyo dano wek etergi bot ajwagi madito.” ²² Ento teko pa Caulo omedde ameda, omiyo lewic omako Lujudaya ma gibedo i Damaciko, pien en onyuto atir ni Yecu en aye Kricito ma Lubaŋa oyero. ²³ Ka nino okato mapol, ci Lujudaya gucokke, gupiro lok me neke. ²⁴ Ento Caulo owinyo pi lok ma giyubo. Onoŋo gikuro en i dogcel me Damaciko dyeceŋ ki dyewor wek gineke woko; ²⁵ ento lupwonnyene gutiŋe ki aduku i dyewor, ci gucwale piny ki i wi cel. ²⁶ Ka Caulo obino oo i Jerucalem ci otemo ribbe ki lupwonnye; ento gin ducu guwore, pien onoŋo peya guye ni en lapwonnye pa Yecu. ²⁷ Ento Barnaba otere, ci okele bot lukwena, ka otito botgi kit ma en oneno kwede Rwot i yo, oloko kwede, dok obedo i Damaciko ka tito lok ki tekcwiny laboŋo lworo i nyiŋ Yecu. ²⁸ Ci doŋ en obedo kacel kwedgi, obedo ka wirre kwedgi i Jerucalem, ²⁹ kun tito lok i nyiŋ Rwot ki tekcwiny laboŋo lworo. Oloko bene ki Lujudaya ma giloko leb Grik, kun pyem kwedgi; ento gin guyenyo yo me neke. ³⁰ Ka utmego guŋeyo lokke, ci gularo kwede i Cecaria, ci gucwale i Taruco. ³¹ Lwak muye Yecu ma i Judaya ducu ki Galilaya ki Camaria doŋ gubedo ki kuc, ci gudoŋo gucuŋ matek, kun gilworo Rwot i kwogi me nino ducu. Cwiny Maleŋ obedo ka jiŋo cwinygi, welgi bene medde ameda. ³² I kare meno Petero obedo ka wirre i kingi ducu, ci ocito piny bot jo pa Lubaŋa ma gibedo i Lida. ³³ Kunnu en onoŋo iye dano ma nyiŋe Ainea, ma yam obuto i wi kitanda mwaka aboro pi two akweya. ³⁴ Ci Petero owaco bote ni, “Ainea, Yecu Kricito ocaŋo twoni woko; a malo ipet kabutoni.” Ci otugi a malo oyot. ³⁵ Jo ducu ma gibedo i Lida ki Caron gunene, ci gulokke bot Rwot. ³⁶ Yam tye i Jopa lapwonnye ma dako ma nyiŋe Tabica, ma i leb Grik gilwoŋo ni Dorka, te lokke Lajwa. En yam tiyo tic mabeco mapol mada, dok konyo lucan. ³⁷ I kare meno two omake ci oto woko. Ka gityeko lwoko kome ci gupyelo i kicika ma malo. ³⁸ Macalo Lida cok ki Jopa, ka lupwonnye guwinyo ni Petero tye kunnu, ci gucwalo dano aryo bote, gulege ni, “Tim ber, ibin oyot botwa, pe iru.” ³⁹ Petero oa, owoto kwedgi; ka oo, gutere i kicika ma malo. Mon-to ducu gucuŋ kun gikok ka ŋete, ma ginyuto koti ki boŋŋi mukene ma Dorka okwoyo ma onoŋo pud tye botgi. ⁴⁰ Ento Petero ocwalogi ducu woko, ka orumo coŋe piny ocako lega. Lacen olokke bot lato kun wacci “Tabica, a malo.” Ci Tabica oyabo waŋe; ka oneno Petero ci oa obedo abeda. ⁴¹ Petero omako ciŋe, ka otiŋe malo. Ka olwoŋo jo pa Lubaŋa ki mon-to, ci omiye botgi makwo. ⁴² Pire oywek i Jopa ducu, kun jo mapol guye Rwot. ⁴³ Petero obedo i Jopa pi nino mapol tuŋ pa dano mo ma nyiŋe Cimon, lanyoŋ pyen.