¹ I kare meno lwak jo muye Yecu ma tye i Antiokia onoŋo doŋ gitye ki lutit lok pa Lubaŋa ki lupwony, Barnaba, Cimeon ma gilwoŋo Niga, Lukia me Cirene, ki Manaen ma odoŋ kacel ki Kerode laloyo, ki Caulo. ² I kare ma gitye ka miyo woro bot Rwot ki ri kec, ci Cwiny Maleŋ owaco ni, “Wukwannya Barnaba ki Caulo pi tic ma alwoŋogi pire-ni.” ³ Lacen ka doŋ gutyeko lega ki ri kec, ci guketo ciŋgi i komgi ka gucikogi. ⁴ Ka Cwiny Maleŋ ocwalogi, ci gucito i dog nam i Celeukia; ka gua ki kunnu gukwaŋ gucito i Caiprac. ⁵ Ka guo i Calamic, gutuco iye lok pa Lubaŋa i kacokke ducu pa Lujudaya; onoŋo gitye kacel ki Jon ma lakonygi. ⁶ Ka guwoto gurumo i cula ducu nio wa i Papo, ci gurwatte ki laco mo ma obedo latyet, lanebi ma lagoba ma Lajudaya, ma nyiŋe Bar-Yecu. ⁷ En obedo kacel ki laloyo, Cergio Paulo, en laco ma laryeko. Laloyo olwoŋo Barnaba ki Caulo bote kun noŋo mito winyo lok pa Lubaŋa. ⁸ Ento Elima ma latyet (meno aye te lok me nyiŋe) ocako pyem kwedgi kun mito ŋako laloyo woko ki i niye. ⁹ Ento Caulo ma gilwoŋo bene ni Paulo, ka opoŋ ki Cwiny Maleŋ, ociko waŋe i kome, ¹⁰ ci owacce ni, “In latin pa Larac, in lamerok me kit ducu ma tye atir, ipoŋ ki lok me bwola, labal wi dano, in pud ibimedo ka dwanyo yo pa Rwot mucuŋ atir-ri? ¹¹ Kombeddi ciŋ Rwot opoto i komi; waŋi bicor woko, pe ibineno ceŋ kare mo” Lupu ocido waŋe oyotoyot, ci opaŋŋe pi yenyo dano wek omak bade opeye kwede. ¹² Laloyo oye Yecu ka oneno gin ma otimme-ni, pien obedo ka uro kit pwony ma gimiyo i kom Rwot. ¹³ Lacen Paulo ki luwote gukwaŋ gua ki i Papo, gucito i Perga i lobo Pampulia. Jon owekogi odok woko i Jerucalem. ¹⁴ Ento gin gua ki i Perga gucito i Antiokia me lobo Picidia, ci gudonyo i kacokke i nino me cabit, gubedo piny. ¹⁵ Ka doŋ gityeko kwano cik pa Moses ki lok pa lunebi, ci ludito me kacokke gucwalo lok botgi kun gipenyogi ni, “Utmego, ka wutye ki lok mo me cuko cwiny dano, ci wuwaci.” ¹⁶ Ka Paulo ocuŋ ci ojukogi ki ciŋe kun waco ni, “Jo Icrael, ki wun dano ma wulworo Lubaŋa, wuwiny. ¹⁷ Lubaŋa pa rok man, jo Icrael, yam oyero kwarowa, ci omiyo dano gunya madwoŋ i kare ma gubedo i Ejipt, ci oryeyo bade okwanyogi woko ki kunnu ki tek mere. ¹⁸ Odiyo cwinye i komgi i tim mwaka pyeraŋwen. ¹⁹ Doŋ ka otyeko rok abiro ma i lobo Kanaan-ni woko, ci omiyogi lobo meno me bedo megi pi mwaka ma romo miya aŋwen ki pyerabic. ²⁰ Lacen omiyogi luŋolkop o wa i kom Camuel ma lanebi. ²¹ Dok gupenyo pi kabaka; ci Lubaŋa omiyo botgi Caulo wod pa Kic, laco ma i kaka pa Benjamin, pi mwaka pyeraŋwen. ²² Ka doŋ okwanye woko, ci dok otiŋo Daudi, oketo me bedo kabakagi. Otito pi Daudi kun waco ni, ‘Atyeko noŋo Daudi wod pa Yece; en laco ma yomo cwinya, ma bitiyo gin ma amito ducu.’ ²³ Lubaŋa okelo Lalar bot jo Icrael ki i kin likwayo pa laco meno, macalo yam, ociko, en Yecu. ²⁴ I kare ma peya obino, Jon otito lok i kom batija me ŋut bot jo Icrael ducu. ²⁵ I kare ma Jon cobo ticce, owacci, ‘Wun wutamo ni an aŋa? An pe a dano ma wukuro-ni; ento dano ma bibino ma lubo kora, an pe amyero me gonyo war tyene.’ ²⁶ “Utmego, wun likwayo ma i kaka pa Abraim, ki jo mukene ma i kinwu ma gilworo Lubaŋa, wan aye gicwalo botwa lok man me larre. ²⁷ Ento jo ma yam gibedo i Jerucalem, ki luditogi, onoŋo pe giniaŋ i kome, pe bene guniaŋ lok ma yam lunebi gutito ki ma gikwano nino ducu i ceŋ cabit. Ci gucobo lok pa lunebi kun giŋolo ni kop oloyo Yecu. ²⁸ Giŋolle kop me to, kadi pe gunoŋo bal mo i kome, ka dok gulego Pilato wek oye gineke. ²⁹ Ka doŋ gutyeko cobo lok ma yam gicoyo i kome ducu, ci gukwanye woko ki i kom yat, gupyelo kome i lyel. ³⁰ Ento Lubaŋa ocere woko ki i kin jo muto; ³¹ ci obedo ka nen pi nino mapol bot jo ma yam gua kwede ki i Galilaya gubino kwede i Jerucalem, ma koni gin aye cadenne bot lwak. ³² Wan bene wakelo botwu lok me kwena maber ni, gin ma yam Lubaŋa ociko pire bot kwariwa, ³³ en ocobo bot wan likwayogi pi cero Yecu, macalo yam gicoyo bene i jabuli me aryo ni, ‘In i Woda, tin doŋ anywali.’ ³⁴ “Lok i kom cero en ki i kin jo muto, ma pe kome dok bitop woko, yam oloko kit man ni, Abimini gum maleŋ ki ma gene ma yam aciko pi Daudi.’ ³⁵ Dok owaco bene i jabuli mukene ni, ‘Pe ibiweko kom danoni ma geni top woko.’ ³⁶ Pien ka Daudi yam otyeko tic kun cobo yub pa Lubaŋa, en oto, ci giyiko kacel ki kwarine, kome otop woko. ³⁷ Ento ŋat ma Lubaŋa ocero woko-ni kome pe otop. ³⁸ Utmego, myero wuŋe ni, pi dano man en aye Lubaŋa weko bal pa dano, ³⁹ kun kwanyo i kom ŋat acel acel ma oye en bal ducu ma pe gitwero kwanyo i komwu i te cik pa Moses. ⁴⁰ Ber doŋ wugokke, wek gin ma yam lunebi guloko pire-ni pe opot i komwu. Guwacci, ⁴¹ ‘Nen ba, wun luŋala, wuur matek, ci wubirwenyo woko matwal; pien atye ka tiyo tic mo i karewu-ni ma pe wun wubiye kadi matidi mo, kadi ŋat mo otuco pire botwu.’ ” ⁴² I kare ma gikato woko, lwak gulego ni lok man myero gitit botgi odoco i cabit ma bino. ⁴³ Ka lwak ma gubedo i kacokke doŋ guket woko, ci lwak Lujudaya ki jo mulokke ma luworo i dini pa Lujudaya bene gulubo kor Paulo ki Barnaba, ci gin gubedo ka lok kwedgi kun gicuko cwinygi ni myero gumedde i kica pa Lubaŋa. ⁴⁴ I cabit ma olubo pol dano ma i gaŋ meno gucorre gugurre kacel pi winy lok pa Lubaŋa. ⁴⁵ Ento ka Lujudaya guneno lwak, ci nyeko omakogi, gucako pyem ki lok ma Paulo tito, ci guyete bene. ⁴⁶ Paulo ki Barnaba guloko ki tekcwiny laboŋo lworo, kun giwaco ni, “Onoŋo myero koŋ kikwoŋ tito lok pa Lubaŋa botwu. Ento macalo doŋ wucwalo woko cen-ni, doŋ wuŋolo giwu kenwu ni pe wumyero pi noŋo kwo ma pe tum. Doŋ wunen, walokke giwa bot Lurok. ⁴⁷ Pien Rwot yam ocikowa kun wacci, ‘Aketo in me bedo ceŋ bot Lurok, wek imi larre oo wa i agikki piny ducu.’ ” ⁴⁸ Ka Lurok guwinyo lok man, ci cwinygi obedo yom, gucako pilo wi lok pa Lubaŋa; ci jo ducu ma myero gunoŋ kwo ma pe tum guye Yecu. ⁴⁹ Lok i kom Rwot omedde oromo lobo meno ducu. ⁵⁰ Ento Lujudaya gurubo i mon ma giworo Lubaŋa ma gitye i rwom me dito ma malo, kacel ki ludito me gaŋ ma giloyo dano, ci gubalo cwinygi woko; gucako yelo Paulo ki Barnaba ka guryemogi woko ki i lobogi. ⁵¹ Ento guguteŋo apwa woko ki i tyengi me bedo caden i komgi, ka gucito i Ikonio. ⁵² Lupwonnye cwinygi obedo yom dok gupoŋ ki Cwiny Maleŋ.