¹ Utmegiwa, wamito wuŋe pi cwiny me kica ma oa ki bot Lubaŋa ma onen bot lwak dano ma guye Kricito ducu ma gitye i Makedonia. ² Gin guciro un ducu ma gitemogi kwede matek, ento gin mua ki i yomcwiny madit ma gin gubedo kwede i dye can madit mada ma yam odiyogi ca, en aye lonyo madit me cwiny ma gubedo kwede me miyo mot. ³ Pien gin yam gumiyo gin ma giromo miyone, ki makatone bene, kit ma an kikoma aneno, ma pe gidiyogi iye adiya. ⁴ Gin gulegowa ma gibako doggi ni watim ber, waye gin giribbe kwedwa i konyo jo pa Lubaŋa. ⁵ Yam gutiyo tic mukato genwa woko, pien gukwoŋo mine kengi bot Lubaŋa, ka doŋ pi mit pa Lubaŋa gucako mine kengi botwa bene. ⁶ Ka doŋ wacuko cwiny Tito ni, kit macalo yam doŋ en ocako tic man me kica i kinwu, myero bene doŋ ocob woko. ⁷ Doŋ macalo wun wuloyo dano i yo ducu, i kom niye, i loko lok, i ŋec, i keto cwinywu ki i mar ma wutye kwede i komwa, ber wulo dano bene i tic man me kica. ⁸ Gin ma aloko-ni pe obedo cik ma an aye amiyo, ento anyuto botwu kit ma jo mukene giketo cwinygi, wek anen mar ma wutye kwede ka obedo mar me ada. ⁹ Pien wuŋeyo cwiny me kica ma Rwotwa Yecu Kricito obedo kwede; kadi bed nene en lalonyo, ento piwu olokke odoko lacan, wek i canneni wun wudok lulonyo. ¹⁰ Man tamma ma amiyo i lok man: twero bedo ber ka wutyeko gin ma yam wucako i mwaka mukato-ni woko. Yam wun aye wubedo jo mukwoŋo, pe i tic keken, ento i yeyo me tiyo tic bene. ¹¹ Kombeddi amito wumedde wuwot anyim ki ticwu ca, wucob woko. Wubed ki miti me tyekone ma rom aroma ki maca ma yam wukwoŋo kwede, kun wukwanyo gin ma mitte ki i kom gin ma tye botwu. ¹² Lubaŋa gamo mot ma dano tye kwede, tekke en obedo ki miti me miyone, ma pe paro gin ma pe etye kwede. ¹³ Pe awaco ni jo mukene gubed maber, wun aye can odiwu, ento ni dano ducu gubed maromrom. ¹⁴ Kit macalo kombeddi wutye ki jami mabuppi, wukonygi i cangi, wek ka waŋ mo gin gubedo ki jami mabup, gin bene gubikonywu ki gin murem botwu, ci doŋ miyo wubedo maromrom; ¹⁵ macalo yam gicoyo ni, “ŋat ma ocoko mabup, gin mo pe odoŋ bote, ŋat mucoko manok mo, gin mo pe orem bote.” ¹⁶ Wapwoyo Lubaŋa pien oketo i i Tito miti madwoŋ ma rom ki mewa me konyowu. ¹⁷ En pe ojolo legawa keken, ento cwinye tye iye matek, mumiyo en gire bino botwu pi mitte kene. ¹⁸ Waore kacel ki ominwa ca ma ŋene twatwal bot jo ducu ma guye Kricito pi kit ma en tito kwede lok me kwena maber. ¹⁹ Pe meno keken, ento lwak dano ducu ma guye Kricito yam guyere me wot kacel kwedwa i tic man me kica ma watye ka tiyone pi miyo deyo bot Rwot, ki pi mitiwa me miyo kony bot dano. ²⁰ Watemo gwokke matek wek ŋat mo pe onoŋ bal mo i kit ma watye ka tic kwede ki mot man mabup ma giketo i ciŋwa-ni. ²¹ Tamwa tye me timo gin maber, pe i nyim Lubaŋa keken, ento kadi wa i nyim dano bene. ²² Doŋ waorogi kacel ki ominwa mukene ma wabedo ka temo kite pi kare malac, ci wanoŋo ni en obedo dano ma keto cwinye i kom tic mapol, ento i kare-ni doŋ tye ka keto cwinye matek twatwal makato ma yam con, pi gen madit ma en tye kwede i komwu. ²³ Tito lawota dok latic wadiwa piwu, ki utmegiwa mukene-gu, gin luor pa jo ducu ma guye Kricito, gin bene aye jo ma kelo deyo bot Kricito. ²⁴ Pi meno, wunyut mar ma wutye kwede woko ka maleŋ bot dano ducu ma guye Kricito, wek gunen ni nyattewa ma wanyatte kwede piwu onoŋo tye atir.