¹ Kombeddi pe mitte ki tuŋ bota me coyo botwu lok i kom mot ma gimiyo pi konyo jo pa Lubaŋa, ² pien aŋeyo miti ma wutye kwede. Atye ka nyatte piwu mada bot jo Makedonia ni meno, “Jo Akaya guyubbe woko wa con cakke i mwaka mukato.” Pi cukke ma wubedo ka cukke kwede, omiyo polgi bene guketo cwinygi. ³ Doŋ acwalo utmegiwa botwu ennu wek nyattewa piwu i lok man pe ogik i lok keken, ento myero wubed ma wuyubbe i kit ma awaco botgi-ni. ⁴ Ka ce ao kunnu ki jo Makedonia mogo, ka gibinoŋo ni pe wuyubbe, ci miyo doga two woko, pi gen ma onoŋo waketo i komwu; ento wun kono? ⁵ Meno aye gin mumiyo atamo me cuko cwiny utmegiwa me kwoŋo nyima me bino botwu, wek gin aye koŋ gunen ka mot man ma yam wucikke me miyone-ni wuyubo; wek doŋ obed ma giyubo woko macalo mot ma wumiyo giwu ki cwinywu kenwu ma pe gidiyowu iye adiya. ⁶ Lok tye kit man ni, dano ma coyo kodi manok, bikayo bene manok, ŋat ma coyo kodi madwoŋ, bikayo bene mabup. ⁷ Dano acel acel myero otim kit macalo cwinye mito, laboŋo waŋcwiny mo nyo dic mo. Pien Lubaŋa maro ŋat ma miyo jamine ki yomcwiny. ⁸ Dok Lubaŋa twero miyo botwu jami mabeco mapol ata, wek kare ducu wubed ki jami ma romowu maber, ma weko wun bene wutwero miyo kony mabup pi kony tic ducu mabeco, ⁹ macalo yam gicoyo ni, “Ocoro jamine mapol, omiyo ki lucan, berre bedo nakanaka.” ¹⁰ ŋat ma miyo kodi bot dano ma laco kodi, ki cam me acama, bimiyowu kodi dok binyayone bene, ci doŋ miyo gin mua i kom cwiny maber ma wutye kwede bedo dit twatwal. ¹¹ En bimiyo wulony i yo ducu, ma romo miyo wubedo ki cwiny maber me miyo mot i kare ducu; pi ticwa bimiyo dano gipwoyo Lubaŋa. ¹² Pien tic me kony macalo man ma wutiyo bikelo gin ma mitte bot jo pa Lubaŋa; ento pe meno keken, bikelo bene pwoc madit twatwal bot Lubaŋa. ¹³ Pi gin maber ma ticwu kelo, bimiyo jo mapol gimiyo deyo bot Lubaŋa, pien nyuto winy maber ma wutye kwede i lok me kwena maber i kom Kricito ma watito, ki pi cwiny maber ma wupoko kwede limwu bot jo-nu ki bot jo mukene ducu. ¹⁴ Gibilego Lubaŋa piwu bene kun cwinygi paro piwu, pi kica pa Lubaŋa madit ma okato kare ma doŋ onen i komwu. ¹⁵ Gipwo Lubaŋa pi motte maber ma pe wacce.