¹ Wun ma amaro, cikke meno yam giciko piwa. Pi meno, myero walonnye woko kekenwa i gin mo ducu ma cido komwa nyo cwinywa, kun walworo Lubaŋa, wek wadoku jo maleŋ atikatika. ² Wuyab cwinywu botwa; pe watimo ŋat mo marac, pe wabalo ŋat mo, pe bene wabuyo ŋat mo pi mito lim. ³ Pe awaco man ni wek kop olowu, pien yam awaco botwu koŋ ni wun piwu lit botwa mada, wek wato dok wakwo kacel kwedwu. ⁴ Atye ki gen mada i komwu; awakke bene matek piwu. Cwinya okwe maber, dok apoŋ ki yomcwiny i canwa ducu. ⁵ Cakke i kare ma wao i Makedonia pe wabedo ki yweyo mo. Can onoŋo orumowa woko tuŋŋi ki tuŋŋi, lweny i kin dano ki lworo ma onoŋo tye i cwinywa. ⁶ Ento Lubaŋa ma kweyo cwiny jo ma can obwoyogi, okweyo cwinywa pi bino pa Tito. ⁷ Pe pi binone keken, ento bene pi kit ma wun wukweyo kwede cwinye. En otito botwa pi mit ma wutye kwede me nena, cwercwiny ma wutye kwede, ki kit ma wularo kwede pira, ci omedo yomcwinya ameda. ⁸ Kadi bed waragana ca yam ocwero cwinywu, an pe doŋ aŋut pi coyone, kadi bed yam aŋut pien aneno ni waraga ca ocwero cwinywu pi kare mo. ⁹ Kombeddi an cwinya yom, pe te lokke ni, pien awaŋo cwinywu, ento pien waŋ cwinywu omiyo wuŋut. Waŋcwinywu meno onoŋo oa ki bot Lubaŋa, wek omi pe wunoŋ can mo piwa. ¹⁰ Pien waŋcwiny ma Lubaŋa miyo kelo ŋut ma tero dano i larre, ma pe doŋ gitwero waco ni, “Kono yam pe atimo”; ento waŋcwiny me lobo kelo to. ¹¹ Koŋ wunen kit ma Lubaŋa otiyo kwede ki waŋcwinywu! Doŋ wunen kit ma wuketo kwede cwinywu, kit ma doŋ wuketo kwede tek me nyuto ni wupe ki bal, kit akemowu, kit lworo, kit mit ma wutye kwede me nena, kit ma wularo kwede pira, ki kit ma wuculo kwede kwor! Wun doŋ wutyeko nyutte woko kenwu i yo ducu ni pe wutye ki bal mo i lok meno. ¹² Mumiyo kadi bed acoyo botwu waraga, pe acoyo pi ŋat ma otimo gin marac, kadi pi ŋat ma gitimo gin marac i kome, ento acoyo wek omi kit ma wularo kwede pira onen woko ka maleŋ botwu i nyim Lubaŋa. ¹³ Man en aye gin mumiyo cwinywa doŋ okwe. Medo i kom kwecwinywa, yam wabedo ki yomcwiny mada pi yomcwiny pa Tito, pien wun ducu wukonyo me kweyo cwinye. ¹⁴ Kadi bed yam awakke i nyime piwu, lewic pe omaka; ento kit macalo yam lok ducu ma wabedo ka Tito botwu obedo lok me ada, kit meno wakkewa bene i nyim Tito obedo me ada. ¹⁵ Ka ce en po i kom kit macalo wun ducu wuwinye kwede, ki kit ma wujole kwede ki lworo ki myelkom, mar medde ameda i iye i komwu. ¹⁶ An cwinya yom, pien atye ki gen madit i komwu i yo ducu.