¹ I ticwa kacel ki Lubaŋa bene walego ni, kit ma doŋ wunoŋo kwede kica pa Lubaŋa-ni, pe wuwek oballe nono, ² pien en yam owaco ni, “Yam awinyi i kare me timo dano maber, yam akonyi i kare me laro dano.” Wunen, man aye kare ma gitimo iye ber bot dano. Tin aye nino me larre. ³ Wan pe wamito waket ariya mo i yo pa ŋat mo, wek dano pe guwac ni ticwa rac. ⁴ ento i kare ducu wanyuto berwa kenwa macalo wan lutic pa Lubaŋa kun waciro matek twatwal, i can ki peko ki ayelayela ma odiyowa. ⁵ Gipwodowa, gitweyowa i buc, dano giroko lwak me lweny i komwa, watiyo tic matek, ma nino ki cam bene oremowa. ⁶ Wanyuto ni wan lutic pa Lubaŋa pi kitwa maleŋ, pi ŋec ma watye kwede, pi diyo cwinywa ki pi kicawa; pi Cwiny Maleŋ, ki pi mar ma watye kwede ma goba pe iye, ⁷ pi tito lok me ada, ki pi tek pa Lubaŋa. Doŋ wamako jami lweny me kit ma atir i ciŋwa ryoryo, tuŋ lacuc ki tuŋ lacam. ⁸ Giketo deyo i komwa, dok bene giketo lewic i komwa, giyetowa dok bene gipakowa. Giterowa macalo lugoba, ento kun wan jo me ada. ⁹ Giterowa macalo jo ma pe giŋene, ento giŋeyowa twatwal. Gilokowa wadoko calo jo muto, kun wan mere jo makwo. Kadi gitimwa gujiguji, pe ginekowa; ¹⁰ kadi gimiwa kumo, cwinywa noŋo pud bedo yom nino ducu; wanen macalo lucan, ento wan aye ma wamiyo jo mapol gidoko lulonyo; wanen calo pe watye ki gin mo, ento kun kono watye ki jami ducu. ¹¹ Wun jo Korint, wan doŋ waloko kwedwu ka maleŋ, dok bene doŋ wayabo cwinywa botwu malac. ¹² Wan pe waumo cwinywa woko botwu, ento wun aye wuumo cwinywu. ¹³ An aloko kwedwu macalo wun litinona; kit ma watimowu kwede, wun bene wutim kit meno; wuyab cwinywu botwa malac. ¹⁴ Pe wuribbe kun wubedo kacel ki jo ma pe guye Yecu, pien kitwu patpat. Doŋ kit ma atir ki tim maraco gitwero bedo lurem niŋinŋ? Leŋo ki colpiny gitwero ribbe gibedo kacel niŋniŋ? ¹⁵ Doŋ tam pa Kricito ki pa Belial twero rwatte? Gin aŋo ma dano ma oye Yecu twero nywako gin ki ŋat ma pe oye? ¹⁶ Ot pa Lubaŋa kono twero ribbe niŋniŋ ki cal jogi? Pien wan aye wabedo ot pa Lubaŋa makwo; macalo en Lubaŋa doŋ owaco ni, “An abibedo i igi, abibedo ka wot awota i kingi, abibedo Lubaŋagi, gin bene gibibedo jona. ¹⁷ Pi meno doŋ wua woko ki i kingi, wupokke woko kwedgi, man lok pa Rwot, pe wugud gin mo ma kome ki keni. miyo abijolowu, ¹⁸ abibedo wonwu, wun bene wubibedo awobena ki anyirana; man lok pa Rwot Won Twer Ducu.”