¹ Pien waŋeyo ni ka komwa me lobo man oballe woko, ma wabedo iye macalo wabedo i kema-ni wan watye ki gedo mukene ma Lubaŋa bimiyo botwa, ot ma pe gigero ki ciŋ, ot ma tye doŋ bedo matwal i polo. ² adane wan watye ma wacur acura i kema man, kun wamito matek ni girukwa ki kabedowa ma a i polo, ³ wek wabam i kom man, ma ka doŋ watyeko rukone, ci pe gibinoŋowa watye munero. ⁴ Pien ka pud watye i kema man, wacur acura pi cwercwiny ma onurowa; pe ni meno wamito ni wabed ma pe warukke, ento wamito ni waruk kom manyen i wi man, wek kwo omwony gin ma to woko. ⁵ ŋat ma oyubowa pi lok man kikome aye Lubaŋa, dok bene omiyowa Cwinye calo gin ma Lubaŋa omiyo ma moko ni en bicobo gin ma ociko. ⁶ En mumiyo nino ducu wadiyo cwinywa maber, kun bene waŋeyo ni, ka watye i paco me komwa en-ni, wabedo bor ki Rwot, ⁷ pien kwowa cuŋ i kom niye, pe i neno piny ma waneno. ⁸ Wan wadiyo cwinywa maber, kun watamo ni twra wawot ma wabwoto komwa woko, wabed paco bot Rwot. ⁹ Doŋ kadi watye i paco kany nyo kunnu, waketo cwinywa me bedo jo ma giyomo cwiny Rwot. ¹⁰ Pien wan ducu myero wacuŋ i nyim Kricito wek oŋol kop i komwa, wek dano acel acel onoŋ gin mutiko en, ma lubo kit ma yam otiyo kun tye i kom, ka ber nyo ka rac. ¹¹ Doŋ macalo waŋeyo ni Rwot myero gilwor, watemo ywayo tam pa dano, ma kitwa nen woko ka maleŋ bot Lubaŋa; ageno bene ni kitwa otyeko nen botwu ki ŋec ma tye i cwinywu ma nyuttiwu bal. ¹² Pe dok wapakke kenwa, ento watye ka miyo botwu gin ma myero wuwakke kwede piwa, wek wubed ki yo me gamo dog jo ma giwakke pi gin ma nen ki woko, pe pi kit ma dano tye kwede i cwinye. ¹³ Ka doŋ wadoko jo ma lupoya, wapo giwa pi Lubaŋa; ento ka wiwa tye ka tic maber, meno bikonyowu. ¹⁴ Pien mar pa Kricito loyo kwowa, pien doŋ waŋolo kop kit man ni, ŋat acel oto pi jo ducu, meno mumiyo jo ducu doŋ guto. ¹⁵ En yam oto pi dano ducu, wek jo makwo pe gumedde ki bedo kwo pigi kengi, ento gubed ki kwo pi ŋat ma yam oto ka ocer pigi ca. ¹⁶ En mumiyo cakke kombeddi, wan pe waŋeyo dano mo i kit me lobo man; kadi bed yam waŋeyo Kricito i kit me lobo, pe dok waŋeye kit meno. ¹⁷ En mumiyo ka ŋat mo tye i Kricito, en doŋ bedo gin ma giketo manyen; gin macon noŋo doŋ orwenyo woko, gin manyen doŋ oleyo kakare. ¹⁸ Meno ducu obedo tic ma Lubaŋa otiyo, ma yam odwokowa kwede bote, pi Kricito, dok bene omiyowa tic me dwoko dano bote; ¹⁹ ni meno, i Kricito, Lubaŋa onoŋo yam tye ka dwoko dano ma i lobo bote, kun pe okwano balgi i komgi, dok bene omiyowa lok me kwena i kom kit ma en doŋ odwokogi kwede bote. ²⁰ En mumiyo wadoko lukwena, luwaŋ Kricito; Lubaŋa legowu ki dwanwa, wan bene wabako dogwa botwu ma ka Kricito ni, Wuwek Lubaŋa odwokwu bote. ²¹ Ŋat ma yam pe oŋeyo bal, Lubaŋa oloke odoko bal piwa, wek pire wadok jo ma nywako kit pa Lubaŋa ma tye atir.