¹ Lok man lok ada: ka ce dano mo mito tic me bedo latel jo pa Lubaŋa, noŋo en mito tic maber. ² Latel myero obed laboŋo lok mo ma gijuke iye, obed ki dako acel, ogwokke kene, obed ryek, obed dano ma giworo. Obed dano ma gwoko welo, lapwony maber, ³ ma pe lamero koŋe, ma pe lakolo, ento obed dano mamwol, ma pe da atata, dok pe obed ŋat ma maro lim. ⁴ Myero obed ŋat ma loyo ode maber kun gwoko litinone miyo gibedo ki winy bot jo madito, ma giworo dano i yo ducu; ⁵ pien ka ce dano pe loyo ode kikome maber, ci en twero gwoko lwak jo muye Lubaŋa niŋniŋ? ⁶ Myero pe obed dano ma pud olokke aloka nyen, miyo kette malo ki wakke, ci cut poto woko, lok loye macalo yam oloyo Catan. ⁷ Medo i kom meno myero en obed dano ma jo ma woko pwoyo, wek pe okel yet i kome ma miye poto i owic pa Catan. ⁸ Kit meno, ludikon myero bene gubed jo ma romo awora, jo ma pe doggi aryo, ma pe gin lumat koŋo matek twatwal, pe gubed luworo me noŋo lim; ⁹ myero bene gubed jo ma niaŋ maber i muŋ me niyewa, kun cwinygi bene leŋ. ¹⁰ Myero koŋ gikwoŋ temogi; ka ce ginoŋo ni lok mo marac pe i komgi ka doŋ giyegi guti tic me dikon. ¹¹ Mon bene kit meno, myero gubed mon ma romo awora, ma pe lucok dog dano, gubed jo ma gwokke kengi dok jo ma lugen i jami ducu. ¹² Ludikon myero gubed wegi mon acel acel, myero gulo litinogi ki odigi bene ducu maber, ¹³ pien ludikon ma gitiyo tic mabeco ginoŋ rwom maber pigi kengi, dok gidoko jo ma cwinygi tek i kom niye ma tye i Kricito Yecu. ¹⁴ Atye ki gen me bino boti pi oyot, ento acoyo lok me pwony man boti wek, ¹⁵ ka agalle, iŋe kit ma myero dano obed kwede i kin jo me ot pa Lubaŋa, ma en aye lwak jo muye Lubaŋa makwo, ma en aye obedo wir ki guti me te ot matek, me ada. ¹⁶ Muŋ me dini ma watuco pire dit twatwal: Yam onyutte i kom, gikwane ni kite atir pi Cwiny Maleŋ, lumalaika gunene, gitito pire bot lurok, giye en i lobo ducu, ka doŋ gitero woko malo i deyo.