¹ Lok mukwoŋo aciki ni, bako dog, lega, lega ma gilego pi jo mukene, ki miyo pwoc, myero gitim pi dano ducu, ² pi luker ki jo ma tye i rwom ma malo, wek omi wabed mot laboŋo ayela, ma waworo Lubaŋa kun kitwa beco i yo ducu. ³ Man ber, dok Lubaŋa Lalarwa bene pwoyo. ⁴ En mito laro jo ducu, dok mito ni jo ducu guŋe lok me ada. ⁵ Pien Lubaŋa tye acel, Ŋat ma ribo Lubaŋa ki dano bene tye acel, ma obedo dano, en aye Kricito Yecu, ⁶ ma omine kene me bedo gin-kok pi jo ducu; meno en aye caden ma yam gimiyo i karene kikome. ⁷ Pi lok man, giketa me bedo latit-lok dok lakwena, (aloko lok ada, goba pe iye), an lapwony pa Lurok, i niye ki i lok ada. ⁸ Man aye mumiyo amito ni co myero guleg Lubaŋa i kabedo ducu, kun gitaŋo ciŋgi maleŋ malo laboŋo kiniga nyo daa mo. ⁹ Kit meno, mon bene myero gurukke maber ki mwolo, kun gigwokke, pe i yer wic ma gikedo, nyo jabu, nyo tiko ŋut,, nyo ruk mogo me wel ma malo; ¹⁰ ento bergi myero onen i tic maber ma gitiyo, meno en gin ma mitte bot mon ma gilwoŋŋe kengi ni gin jo ma woro Lubaŋa. ¹¹ Dako myero opwonnye laliŋliŋ kun bedo ki winy. ¹² Pe aye ni dako opwony dano nyo obed ki twero i kom co; en myero obed oliŋ aliŋa. ¹³ Pien Adam aye ma gikwoŋo cweyone, ka doŋ lacen gicweyo Kawa. ¹⁴ Dok bene yam pe gibwolo Adam, ento gibwolo dako, ci omiyo opoto i bal odoko labalo. ¹⁵ Kadi bed kumeno, dako gibilaro i kare me nywal, ka ce omedde ka bedo ki niye dok ki mar, kun bedo maleŋ ma gwokke kene.