¹ Cwiny Maleŋ waco atir ni, i kare mo i anyim jo mogo bibwoto niyegi woko, gicako lubo jogi ma gin lugoba, ki pwony pa cen maraco. ² Pwony ma kit meno a ki bot jo ma luroro ma gin lugoba, ma tam ma i igi ma nyuto botgi balgi odiŋ woko macalo del kom dano ma giwaŋo ki nyonyo malyet. ³ Gin jo-nu gijuko ni dano pe gunyom, dok bene giciko dano ni gukwer cam mogo, kun Lubaŋa yam oketo cam wek jo ma ye en, ma giŋeyo lok me ada, gugam ki pwoc. ⁴ Pien jami ducu ma Lubaŋa oketo gibeco, pe tye mo ma myero gikwer ki i kingi, ka ce onoŋo gigamo ki pwoc; ⁵ pien lok pa Lubaŋa ki lega lonyogi bedo maleŋ. ⁶ Ka iketo pwony magi i nyim utmego, ci ibibedo latic pa Kricito Yecu maber, ma gipito ki lok me niye ki pwony mabeco ma ibedo ka luboneni. ⁷ Kwer lok mogo me miŋo ma tere pe ma pe me lworo Lubaŋa. Pwonnye keni i kwo me lworo Lubaŋa. ⁸ Pwonnye me rweyo ler kom tye ki kony, ento konnye nok; lworo Lubaŋa konyo i yo ducu, pien twero kelo botwa gum i kare man ki i kwo ma ki i kwo ma bibino i anyim, macalo Lubaŋa yam ociko. ⁹ Lok man lok ada, myero dako ducu guye. ¹⁰ Meno aye mumiyo wacanne dok wacukke me tic matek, pien waketo genwa i kom Lubaŋa makwo, ma en Lalar pa jo ducu, ento makatone pa jo ma ye Yecu. ¹¹ Cik lok magi dok ipwony ki dano. ¹² Pe imi ŋat mo ocayi ni pien in pud itidi, ento bed lanen maber bot jo muye, i lokki, i kiti, i mar, i niye, ki i bedo maleŋ laboŋo gin marac mo i komi. ¹³ Mi kareni me kwano coc ma yam gicoyo i nyim lwak, i tito lok, ki i pwony, nio ka abino kunnu. ¹⁴ Pe ibwot mot me cwiny ma itye kwede-ni oballe nono, ma yam gimii pi lok ma lutit lok pa Lubaŋa gutito i kare ma ludoŋo giketo ciŋgi i wii. ¹⁵ Nyut lok magi ki tic, ket cwinyi iye, wek dano gunen kit ma itye ka wot kwede anyim. ¹⁶ Gwokke keni, dok igwok pwonnyi bene; mak matek, pien ka itimo kumeno, in kikomi ibilarre kacel ki jo ma winyi bene.