¹ Kit macalo Kricito yam ociro arem me kom, wun bene myero wurukke ki tam acel kit meno, wek gimiwu tek. Pien ŋat mo ma doŋ ociro arem kom, pe doŋ medde ki bal, ² wek etyek kare me kwone i lobo man ma pud odoŋ kun pe dok lubo miti maraco ma dano paro, ento cobo gin ma Lubaŋa mito. ³ Myero doŋ wuwek kare ma yam wubedo iye ka tiyo gin ma jo ma pe ŋeyo Lubaŋa gimaro timo oromwu. Yam wulubo kit me tarwaŋ, ki miti me kom, mero, karama me woro cam ki tuko marac, mat, ki woro jogi ma ic dagi. ⁴ Giuro mada pien kombeddi doŋ pe wuribbe kwedgi i lok man me miti me kom ma pe jukke; meno aye mumiyo ginywarowu. ⁵ Ento gibidok i lok man bot Lubaŋa ma oyubbe pi ŋolo kop pa jo makwo ki jo muto. ⁶ Man en gin mumiyo yam gitito lok me kwena maber kadi wa bot jo muto, wek kadi giŋolo kop i komgi macalo giŋolo ki jo ducu, gin gubed kwo i cwiny macalo Lubaŋa. ⁷ Agikki me jami ducu doŋ cok; pi meno wugwok kitwu, kun wuloyo mitiwu kenwu, wek wumine i lego Lubaŋa. ⁸ Makato ducu wumok matek i marre kekenwu; pien mar umo lwak bal mapol. ⁹ Wubed jo ma jolo welo ŋat man ki lawote, kun pe wuŋur bene. ¹⁰ Kit macalo ŋat acel acel tye ki motte ma gimiye, wuti kwede pi konnye kekenwu, macalo lugwok-jami mabeco, ma tiyo ki mot me kica ma Lubaŋa omiyo ma kite patpat. ¹¹ Ka ŋat mo tito lok, myero otit macalo lok mua ki bot Lubaŋa; ŋat ma miyo kony oti macalo ŋat ma tiyo ki tek ma Lubaŋa omiyo; wek dano guket deyo i kom Lubaŋa i yo ducu pi Yecu Kricito. Deyo ki twero bedo mere nakanaka. Amen. ¹² Luwota ma amaro, pe wuur can ma rom ki mac ma bino i komwu pi temowu, ma kun wutamo ni gwok ca nyo gin mo mapat twatwal mupoto i komwu. ¹³ Ento wubed ki yomcwiny i lok man ni, wuribbe i can pa Kricito, wek dok wubed ki yomcwiny madit i kare ma deyone binen. ¹⁴ Wutye ki gum ka giyetowu pi nyiŋ Kricito, pien noŋo cwiny me deyo, ma en Cwiny pa Lubaŋa, bedo i komwu. ¹⁵ Pe myero giket can i kom dano mo i kinwu pi nek, nyo pi kwo, nyo pi timo gin mo marac, nyo pi laro lok i gin pa ŋat mo mukene. ¹⁶ Ento ka giketo can i kom dano mo pi bedo ŋat muye Kricito, lewic pe myero omake, ento omi deyo bot Lubaŋa pi lwoŋe ki nyiŋ meno. ¹⁷ Pien kare me cako ŋolo kop doŋ oromo, kun cakke ki i jo pa Lubaŋa. Man ka ocakke ki botwa, ci agikki pa jo ma gukwero winyo lok me kwena maber ma oa ki bot Lubaŋa bibedo niŋniŋ? ¹⁸ Coc ma yam gicoyo wacci, “Ka ce bedo tek bot dano ma kite atir me larre, doŋ labalo ma pe lworo Lubaŋa binene ka kwene?” ¹⁹ Pi meno, jo ma gineno can i yo ma Lubaŋa mito, ber gumine kengi i ciŋ Lacwec ma genne, kun gitiyo gin ma atir.