¹ Kit meno bene, wun mon wumine me bedo i te loc pa cogwu, wek ka ce co mogo i kingi pe gilubo lok pa Lubaŋa, ci gitwero lokke pi kit pa mongi, kadi bed gin kikomgi pe giloko lok mo ki doggi, ² ento ka guneno kitwu maleŋ ma nen me woro. ³ Rukwu pe obed ruk ma nen ki woko, macalo kedo yer wic, tweyo tiko jabu, ruko boŋŋi mabeco, ⁴ ento rukwu myero obed kit me cwiny ma pe nen. Ruk ma pe balle en cwiny mamwol, ma liŋ mot; meno aye welle dit i nyim Lubaŋa. ⁵ Pien i kare macon, mon maleŋ ma gumoko gengi i kom Lubaŋa yam girukke kit meno, kun bene gimine kengi me bedo i te loc pa coggi, ⁶ macalo Cara yam winyo lok pa Abraim, kun pake bene ni, “Rwoda.” Wun bene kombeddi doŋ wun litinone, ka wutiyo gin maber, kun pe gin mo miyowu lworo. ⁷ Kit meno bene, wun co wubed ki monwu ki niaŋ maber, kun wumiyo deyo bot dako macalo lawoti ma kome pe tek, pien gin bene ginywako kica pa Lubaŋa kwedwa ma en aye kelo kwo. Kumeno gin mo pe ma bigeŋo legawu. Neno can pi lubo kit ma atir. ⁸ Me agikkine, wun ducu wubed ki tam acel dok ki cwiny acel. Wumarre calo omego, ma wutye ki kica dok ki cwiny mamwol. ⁹ Pe wudwok tim marac pi tim marac, nyo yet ki yet; ento ma ka timo meno, wuleg gum pa Lubaŋa obed i komgi, pien gilwoŋowu pi man, wek wunoŋ gum. ¹⁰ Pien yam gicoyo ni, “ŋat ma maro kwo, ki ma mito ni eri pi kare malac kun bedo maber. Ogwok lebe pe olok gin marac, ki doge bene pe olok lok me bwola. ¹¹ Oa woko ki i gin marac, oti gin maber, oyeny kuc dok oti matek wek onoŋ. ¹² Pien Rwot neno jo ma kitgi atir, dok ciko ite, winyo legagi; ento dag neno jo ma lutim maraco.” ¹³ Aŋa mono ma bitimowu marac ka wuketo cwinywu me tiyo gin maber? ¹⁴ Ento kadi bed wuneno can pi lubo kit ma atir, ci wutye ki gum. Pe wulworgi, dok cwinywu bene pe opoti. ¹⁵ ento wuwor Kricito i cwinywu macalo Rwotwu. Wubed ma wuyubbe kare ducu pi dok i lok ma dano bipenyowu kwede i kom gen ma wutye kwede; ento wudok iye ki mwolo dok ki woro. ¹⁶ Wubed ma cwinwyu leŋ, wek lewic omak jo ma yeto kitwu maber i Kricito, ka ginywarowu. ¹⁷ Bedo ber ka wuneno can pi timo gin maber, ka ce Lubaŋa mito kit meno, loyo ma wuneno can pi timo gin marac. ¹⁸ Pien Kricito bene yam oneno can pi bal, kicel ma otyeko lok ducu; en ŋat ma kite atir oto pi jo ma kitgi pe atir, wek omi ekelwa bot Lubaŋa. Yam gineko kome, ento gicere woko i cwiny. ¹⁹ En yam owoto i cwiny ocito otito lok bot tipo pa jo ma tye i mabuc, ²⁰ ma yam con pe guwinyo Lubaŋa, kadi bed Lubaŋa odiyo cwinye i komgi i kare pa Nua ma onoŋo en tye ka payo yeya, ma dano manok ma romo aboro keken aye gularre ki i pii. ²¹ Gin ma rom ki man ma koni larowu en aye batija; pe me lwoko cilo me kom, ento obedo macalo lega bot Lubaŋa wek wudok jo ma cwinywu leŋ, pi cer pa Yecu Kricito, ²² ma doŋ odok woko i polo, tye i kabedo me deyo i ŋet Lubaŋa tuŋ acuc, kun lumalaika ki twer ki teko ducu gitye i te locce.