¹ Abako doga bot ludoŋo ma gitye i kinwu, an ma ladit wadiwu ma abedo caden i can pa Kricito, dok bene abiribbe kwedwu i deyone ma binen. ² Wukwa romi pa Lubaŋa ma tye botwu, kun wunenogi maber, pe pi dic, ento pi mitiwu kenwu, i kit ma Lubaŋa mito, pe pi lim, ento pi mit me cwinywu. ³ Pe wulo dano ma giketo i ciŋwu ki tek, ento wubed lanen maber bot romi; ⁴ miyo ka Lakwat madit binen, wun wubinoŋo mot, lalukana me deyo ma pe balle. ⁵ Kit meno, wun awobe bene, wuwiny loc pa ludoŋo. Wun ducu wurukke ki mwolo, ŋat acel acel i nyim lawote, pien “Lubaŋa pyem ki jo ma wakke, ento miyo kica bot jo mamwol.” ⁶ Wumwolle kenwu i te twero pa Lubaŋa, wek ka kare oromo en otiŋwu malo. ⁷ Wuket parwu ducu i kome, pien en tamo piwu. ⁸ Wugwokke, wuki piny, pien lakworwu Catan tye ka wirre macalo labwor ma kok, kun yenyo dano me amwoda. ⁹ Wucuŋ matek i nyime pi niye kun waŋeyo ni, utmegiwu ma gitye i lobo ducu gitye ka ciro kit can macalo meno. ¹⁰ Ka doŋ wuneno can pi kare manok, Lubaŋa lami kica ducu, ma olwoŋowu i Kricito Yecu me nywako deyone ma ri nakanaka, en kikome aye ma bidwokowu kakare, bimiyowu tek, dok bimiyo wucuŋ matek likiŋ. ¹¹ Loc obed bote nakanaka. Amen. ¹² Acoyo botwu waraga man manok kun amiyo i ciŋ Silvano, ma aŋeyo ni ominwa ma genne, pi cuko cwinywu kunu aloko macalo caden ni, man en kica pa Lubaŋa ada; wucuŋ iye matek. ¹³ Jo ducu muye Kricito ma gitye i Babilon ma Lubaŋa oyerogi kacel kwedwu gumotowu, ki woda Marako bene omotowu. ¹⁴ Wumotte kekenwu ki mot me mar. Kuc obed botwu wun ducu ma wutye i Kricito.