¹ Awo mbelele niyakajula, chilamalizyo cobusanu atubili. Kwali lumunu kwa kaindi kanini. ² Mponyina ndakabona bangelo bali musanu ababili bainvwi kunembo lya leza mponyina bakapegwa mpeta zili musanu ezibili. ³ Oumwi mungelo wakasika kajesi cibikilo eco lunukilizya ce ngolide, kainvwi a cipaililo co kuti atupaizye antomwi enkombyo zyaba salali ba leza boonse acipaililo cengolide cili kunembo lye cibula co bwami. ⁴ Busi botununkilizyo e nkombyo zyabasalali ba leza zyakanyamuka kuli leza mujanza lye mungelo. ⁵ Mungelo wakanweza cibikilo cotununkilizyo okucizuzya mulilo kuzwa ku cipaililo. Mponyina wakacisowela ansi, ape kwakaba mizuzumo mabbalubbalu, endabi, ukuzungana kwe nyika. ⁶ Mpawo bangelo bali musanu otubili bajesi mpeta bakalibambila kuzilizya. ⁷ Mungelo wokusanguna wakalizya mpeta yakwe mponyina kwakaba civulamabwe o mulilo uvwene obulowa. Zyakawida ansi kuti cibela catatu cenyika cakapya o bwizu butete bonse bwakapya. ⁸ Mponyina mungelo wabili wakalizya mpeta yakwe, mponyina cintu cimwi ciboneka mbuli cilundu cipati citentidwe omulilo cakawida mulwizi. Cibela catatu colwizi cakaba bulowa, ⁹ Cibela cimwi catatu cezilenge zipona zili mulwizi zyakafwa, ape cibela catatu mato cakanyonywa. ¹⁰ Mungelo watatu wakalizya mpeta yakwe, mponyina nyenyezi mpati yakawa kuzwa ku julu yalikuyaka mbuli mumuni, yakawida mucibela catatu cemilonga otu sensa twa manzi. ¹¹ Zina lye nyenyezi eyo litegwa kabindula. Cibela catatu ca manzi cakaba akabindula mponya bantu banji bakafwa akaambo kamanzi akalula. ¹² Mungelo wane wakaizya mpeta yakwe, mpoyina cibela catatu cezuba ecibela catatu comwezi, ecibela catatu cenyenyezi zyakaumwa. Cokuti cibela catatu comumuni wazyo wakasizigwa, cibela catatu cobuzuba anguwo masiku mbonyina. ¹³ Mponyina ndakalanga mponya ndakanvwa sikwaze kalila ejwi pati, kuti mayo mayo kubantu bakala ansi, kambo kamyembo yaba ngelo bamwi botaywe bakana kulizya.