¹ Echeleni munu woshe ononokele baka kuswana,mwafwa kukwethi buswana kubanga bwa kufuma kuli Njambi.Buswana buje buliko bana bwimika kuli Njambi. ² Choni woshe alinga bimata na baka buswana alwitha lishiko lya Njambi; nabaje balwitha bakatambula chihitho babenya. ³ Bakaku yula kebekuthzibitha lyoba ha bilinga bya bibwa.oloni ha bilinga bya bibi.Unashaka kushaka kuthzibila lyoba uje umo ali mubuswana ndi? linga mwa mubwa,cho ukatambula kushangathzala kweni. ⁴ Mwafwa wapwa ngamba ya Njambi kuli yeni wamubwa.oloni ngwe mulinga mwa mubi,kaleni na lyoba;mwafwa kambatela ngocho mukwale hakujeneka chuma .Mwafwa napu ngamba ya Njambi,mukakunyanyametha uje muka kulinga bubi. ⁵ Ngachije bene,pweni bakwononoka,kethi lika ha bukalu,oloni nawa ha chitaku-taku. ⁶ Hamulonga wechi chikecho muli nakufwetela lithimu lalo.Mwafwa baka kuswana bapwa bangamba ba Njambi,aba baka lingiechi chuma thimbu yoshe. ⁷ Fweteni kuli boshe bije binapu byabo,lithimu kuli baje banatela lithimu,lithimu lya kubufuko kuli baje banalitela.Lyoba kuli baje batela kuthzibiwa lyowa lyopba,kathingimiko kuli baje batela kathingimiko. ⁸ Kethi mukale na chikoloti kuli woshe,kubanga lika kuthzema umo na mukwabo.Mwafwa uje athzema mundambo wendi nashulitha lishiko. ⁹ Mashiko, "Kethi ukalinge bupangala,kethi uka thsiye,kethi wibe,kethi ukalibeyele chuma,"ngwe kuli lishiko liwabo banalipwithe limolika muli eli," ¹⁰ Thzema mukweni ngwe muwalithzemamena yobe babenya." Chithzemo chikecho kushulithila lishiko. ¹¹ Hamulonga wechi,munathzibuka thimbu,ngweni thim bu inete linga mwinduke mutulo.Mwafwa kwoboka kwetu kuli muyehi kutubakana muje twakulahelele hakulibanga. ¹² Buthsiki mwololo bukya,litangwa mwololo lituuka,tuyeni honi twake bipangi bije bya lithuthulungu hamukulo cho tuyeni tuthzale bitwa bya litanya. ¹³ Twendeni mwa kufwilamo,ngwe mutanya,kethi mubilika bya kunwa nambe bya kupenda;kethi twende mubingila bya kulinga bupangala nambe bukwithzi,kethi mu matoto nambe lifuwa. ¹⁴ Oloni thzaleni Shukulu Yesu Kilisitu,Kethi mukake chifwa cha mubila,nakukabangeya mashungu.