¹ Cho wa thanene hamo baje likumi na babali na ku tundithitha mamba oshe na ku buka mabethzi. ² Chojo wabatumine kuya na kwambula bumwene bwa Njambi na ku kangula babethzi. ³ Cho wendekele kuli bakebo ngwendi, "Kethi mwambate chuma na meme chimo mubungethzi bweni-- kethi nambe mbweti, nambe chikwama, nambe likende, nambe bimbongo, nambe chikobelo cha muchibali. ⁴ Munjubo yoshe ije mukobelamo, tumbameni muje bene kweta na thimbu ije mufumamo. ⁵ Kuje kwoshe kuba mitambula. omwo ngwe mufuma muje mu nganda ije, totomoneni likumgu kumendi endi manganoni likakale bukaleho bwa kuba hitha." ⁶ Chojo bakatukile na kuya mu membo, kuya na ku kangwitha banu kwoshe kwoshe. ⁷ Chojo Helonda uje kuka kuswama wa thzibile byoshe bije bya kele na kusholoka, cho wali hayamenene, omwoni bamo bakele na kwendeka ngwe Yowano wa thangukile ku bathsi, ⁸ cho bamo bakele na kwendeka ngwanbo Elinja wa sholokele, cholalo bakwabo bakele na kwendeka ngwabo umo wa baje tupolofita ba ku laja ikeye wa thangukile. ⁹ Chojo Helonde wendekele ngwendi, "Nja tapele mutwe wa Yowano. Cho iyajo laalo ou ujili na ku thziba byendi?" Cho wethekele ku mu mona. ¹⁰ Omu baje miluwa belukile, bamulekele byoshe bije ba lingile. Chojo waile amo nabo, kwali ka ku nganda ije bathonene ngwabo Mbetesaida. ¹¹ Oloni omu mayongomena ba thzibile endi, ba mu kabangeyeye. Chojo nendi waba tambwile bwino na kwendeka kuli ba kebo bya bumwene bwa Njambi, na ku buka baje boshe ba tondele ku ba thaka. ¹² Chojo omwoni ya pwile thimbu ya mangwethzi, baje likumi na babali bethzile kuli ikeye na kwendeka ngwabo, "Shandola ei mbunga ya banu mangana baye mumembo awa ali muyehi na mundanga ngechoni ba kaliwanenemo bya kulya na kwa kulala, mwafwa muno mutuli mu mambo." ¹³ Olojo wendekele kuli bakebo ngwendi, "Yeni bene baneni bya kulya." Chojo bendekele kuli ikeye ngwabo, "Yetu tuli lika na mikasha itanu ya likende na bithi babali--kubangani omo tuye nakuka landa bilya bya kulya banu boshe aba." ¹⁴ (Amolika kwa kele banalume ba kweta a makulukathzi a tanu.) Cho wendekele kuli bandongethi bendi ngwendi, "Batumbikeni athi mu bimbunga bya makumi a tanu ya banu." ¹⁵ Ngechibene balingile ngocho, na kutumbika banu athi. ¹⁶ Cho wambatele ije mikasha itanu ya likende na baje bithi babali wa kengele kwilu, cho waba kwithwile na ku mungula makende na kutabothzola bithi mubimbathzubwila, na ku byana kuli ije mbunga ya banu. ¹⁷ Chojo boshe balile na kukuta ndyakanga, cho banonongwele na bije bya litu lileho--mitonga likumi na ibali ya bimathzubwila. ¹⁸ Chojo cha sholokele omwo Yesu wakele na ku lombela lika lyendi, bandongethi bendi ba kele nendi. Cho wa behwile, na kwendeka ngwendi, "Bwingi bwa banu balina ku njitumbula ngwabo yange iya?" ¹⁹ Cho ba mu kumbulwile ngwabo, "Yowano muka ku mbwitika. Oloni beka ngwabo Elinja, cholalo beka bali na kwendeka ngwabo umo wa tupolofita ba ku laja ikeye na thanguka." ²⁰ Cho wendekele kuli bakebo ngwendi, "Indi yenihoni mwendeka ngweni yange iyajo?" Cho Petulu wa kumbulwile ngwendi, "Yobe Kilisitu wa Njambi." ²¹ Oloni waba thin'ikile na kuba lomba ngwe kethi baleke echi ku munu woshe, ²² na kwendeka ngwendi, "Muna munu napande ku yanda manene naku mubyana kuli baku lunu na tupilisitu ba bakulunu na baka kuthoneka, cho ba ka muthsiya cho na ku ka muthangula a litangwa lya muchitatu." ²³ Cho wendekele lalo kuli bakebo boshe ngwendi, "Umona ngwe kuli uje ya tonda ku nji kabageya, cho napande kuli byana ikeye babenya na ku lyambatela chilindakana chendi a litangwa na litangwa na ku nji kabangeya. ²⁴ Mwafwa uje woshe ya tetela mwonyo wendi a kahuthzimbaletha, olojo uje woshe ya thzibaletha mwonyo wendi a mulonga wange a ka uwana lalo. ²⁵ Omwo bubwa muka bwa wanaho munu a kufuka kaye koshe, olojo a thzimbalethelemo mwonyo wendi? ²⁶ Ou woshe ya nji thzibila shwama na majwi yange, cho namuna muna lalo aka muthzibila shwamwa omwo a kaija mu bumpau bwendi na bumpau bwa ishe na bije bwa tungelo ba kuthzila. ²⁷ Oloni njendeka kuli yeni mu buthunga ngwange, kuli bamo baje banemana hano obo ku bathsi a kujeneka tai kumona bumwene bya Njambi." ²⁸ Omwoni kwetile mathathe a tanu na atatu anima ya Yesu kwendeka awa majwi, wambatele Petulu na Yowano na Yakomba na kukanduka nabo ku lilundu mu kulombela. ²⁹ Chojo omwoni wakele nakulobela, chihanga chendi chemukile, na buthzalo bwendi bwa pwile bwa kutoka tototo. ³⁰ Chojo taleni, banalume babali bakele na kwendeka nendi, Mosesa na Elinja, ³¹ baje ba sholokele mu bumpau, bendekele nendi a mulonga wa kuthsa kwendi, chijoni wa kele muyeyi na ku manuthulula mu Yelusalema. ³² Choni Petulu na baje bakele nendi ba wililile mutulo twa kama, olojo omwoni bedukilemo, bamwene bumpau bwendi na na baje banalume babali baje bemanene nendi. ³³ Omwoni baje banalume bakele na kutunda kuli Yesu, Petulu wendekele kuli ikeye ngwendi, "Shukulu, china bwaha manene yetu ku kala kuno. Tutungeni mambalanda atatu, limo lyobe, limo lya Mosesa, na limo lya Elinja." (Kathzubukile obyo wa kele na kwendeka.) ³⁴ Chojo omwoni wakele na kwendeka ebi, lishelwa lyethzile na kuba fwika, cho bathzibile manene lyoba omwoni bakele na ku kobela muje mu lishelwa. ³⁵ Lijwi lya tundilile muje mu lishelwa, lyendekele ngwabo, "Ou munange, ou njinangula; thzibilileni kuli ikeye." ³⁶ Anima ya lije lijwi kwendeka, Yesu bamu wanene ali lika lyendi. Choni bakebo bolokele kulu cho lalo kuba lekeleko nameme umo mu matangwa aje ali bije byoshe biba mwene. ³⁷ Chojo a likaki, omwoni ba thikumukile kufuma ku lilundu, mbunga ya kama yali wanene nendi. ³⁸ Cho kengeni, munalume umo ali ije mbunga wa tambekelele, na kwendeka ngwendi, "Mulongethi, nja lanbelelako njitaleleko ali munange, a kulinga ikeye lika mwana njakala nendi. ³⁹ Unamono, Munthzinthzime wa ku kujela uka mu kwata na kumukoneka cho aje bene a ka kulumuka; na ku mushinyitha kweta na atheteko ya ku uthzumuka lifulu ku kanwa. Chojo kethi lwa lwingi uka mwechelako cho lalo uka mu betwetha mwa mubi. ⁴⁰ Cho nji na lambelelele bandongethi bobe ngwange ba u tubdithemo, oloni ku bathele." ⁴¹ Cho Yesu wa kumbulwile na kwendeka ngwendi, "Yeni bakakujeneka kukulahela nabanu bababi, kumani bithimbu bingaijo nja pande kukala neni na kumi talelela ngachijebene? Nena owo munobe kuno." ⁴² Cho omu uje mwanike wakele nakwija, uje lyamba wa mumbilile athi na kumu shinyitha. Olojo Yesu watenukilile uje munthzinthzime wakujela na ku kangula uje mwanike, na ku mwana lalo kuli ishe. ⁴³ Chojo boshe ba li komokelele a ku mona binthzili bya Njambi. A thimbu bene ije banu ba chili komokelele ali bije bya kele na kulinga, wendekele kuli bandongethi bendi ngwendi, ⁴⁴ "Kethi mwetheke kwibala ebi binjimileka ano: Muna munu ba ka mwenda bungungu na ku mwana mu maboko a banu." ⁴⁵ Olojo bakebo kuba thzibithithile ebi byendekele kuli bakebo. Ba ba shwekelelecho, chojo ku bathele kuthzubuka mu cha lumbunukilile, olonini ba thzibile lalo lyoba ku linga ngwabo bewile a n'ganda ei. ⁴⁶ Chojo kwakatukile nimata a kati kabo a kulinga ngwabo iyajo wabo ya pwile wa kama kutubakana ba kwabo boshe. ⁴⁷ Oloni Yesu, a ku thzubuka biyongola bije bya kele mubimbunge byabo, wa mbatele mwanike wa mundondo na ku mwaka ku yei nendi ⁴⁸ na kwendeka kuli bakebo ngwendi, "Uje woshe ha tambula ou mwanike mu lithzina lyange, cho na tambula yange bene; na woshe owo ha tambula yange, cho na tambula bene na uje wa nji tumine. Mwafwa owo woshe napu wa mundondo manene a kati keni boshe ikeye bene wa kama." ⁴⁹ Cho Yowano wa kumbulwile ngwendi, "Shukulu, tuna mwene munu umo ali na kutunditha mamba mu lithzina lyobe chojo twa mwechelethele, mwafwa kethi umo wetu." ⁵⁰ "Kethi mumju byanethe," Yesu wendekele, "mwafwa uje woshe kethi na kumi lwitha ali laja amo neni." ⁵¹ Omwoni matangwa akele mu yei a kulinga ngwabo ba mutwale mwilu, watengulukile mubithinganyeka bwendi na kuya ku Yelusalema. ⁵² Chojo wa twamekele miluwa kulutwe lwendi, cho na bakebo baile naku kobela mu limbo lya ka Samaliya na ku ka mubwahethela chimweja byuma byoshe. ⁵³ Oloni baje banu ba kuje kuba mu tambwile a mulonga wa kulinga ngwabo ikeye wa kele na kuya ku Yelusalema. ⁵⁴ Omwoni baje bandongethi Yakomba na Yowano ba mwene echi, bendekele ngwabo, "Mwene, utu tabetha ngwabo tu shike tuya twa mwilu twije na kuba nyongetha aba?" ⁵⁵ Olojo ikeye wa tengulukilile kuli bakebo na ku ba tenukila, ⁵⁶ chojo baile oni ku limbo likwabo. ⁵⁷ Omwo bakele na kuya mu tapalo, munu umo wendekele kuli ikeye ngwendi, "Nji ka ku kabangeya kwoshe okwo u kaya." ⁵⁸ Yesu wendekele kuli ikeye ngwendi, "Bimbanja bali na mena, na tuthzila ba mwilu mu butangatanga bali na mashwa, olojo Muna Munu kethi na a kuthatela mutwe wendi." ⁵⁹ Cho wendekele kuli mukwabo ngwendi, "Njikabe." Oloni wendekele kuli ikeye ngwendi, "Mwene, kachi njechele tai njichi ka thsinde tate." ⁶⁰ Olojo wendekele kuli ikeye ngwendi, "Thethza bathsi ba thsinde bathsi babo. Oloni yobe, ya na ku kambulula mullako na mu bwihi bya bumwene bwa Njambi." ⁶¹ Chojo weka lalo wendekele ngwendi, "Nji ku kabangeya, Mwene, oloni a kulibanga njiye tai na kuthaletha ba mu njubo yange." ⁶² Yesu wamukumbulwile ngwendi, "Na umo wai uje ya kwata liboko lyendi ku chikekele na ku kenga lalo ku nima nafwila mu bumwene bwa Njambi."