¹ Cho mbunga yabo yoshe ya katukile na kutwala Yesu kuli Pilato. ² Cho bashangumukile kumubangeya,ngwabo, "Tunamuwana ou munalume ali nakukangula lifuti lyetu,ali nakubyanetha kubana lithimu kuli Sezale,nakulitumbula ikeye babenya ngwendi ikeye Kilisitu, mwene." ³ Pilato wa mwihwile,ngwendi, "Yobe mwene waba Yunda ndi? Yesu wamukumbulwile ngwendi, "Omwo unendeka mukemwo bene." ⁴ Cho Pilato wendekele na bakulunu ba malumbelo na mbunga, "Yange kunjawanene mulonga hali ou munalume." ⁵ Oloni bakele na ku twaleleho,nakwenda ngwabo, "Ali nakushongangeya banu,kulongetha mu Yundeya mwoshe,wa shangukile mu Ngalileya naija na kuno." ⁶ Cho omwo Pilato wathzibile ngocho, wehwile ngwe ou munalume ka Ngalileya. ⁷ Cho wathzibukile ngwendi wakele mu binthzili bya Helonda,watumine Yesu kuli Helonda,uje wakele ku Yelusalema ha thimbu ije. ⁸ Omwo Helonda mwa mwene Yesu,wa bwahelelele manene,mwafwa wa shakele manene kumumona ha thimbu yakama.Wathzibile byendi cho watondele kumona chithzibukitho chimo chakele na kulinga. ⁹ Helonda wehwile Yesu bihula bay bingi,olojo Yesu kamukumbulwile. ¹⁰ Cho bakulunu bakakulombelela na balongethi ba majwi a mashiko bemanene,naku mubangeya byuma byabingi. ¹¹ Helonda na maswalale bendi batukile Yesu nakumushendumuna.Cho bamuthzikile buthzalo bwa bubwa cho ba mwilwithile lalo kuli Pilato. ¹² Halitangwa lije bene Helonde na Pilato balikwatele buthamba,oloni laja balithzindile. ¹³ Pilato wathanenne baakulunu bamalombelo na bantwama na mbunga ya banu. ¹⁴ Cho wendekele kulibakebo ngwendi, " Mwanene ou munalume kuli yange ngweni ali nakutangana banu,oloje taleni,yange,ha kumwihula ku mesho eni,kunjawanenemo mulonga muli ou munalume ha byuma bije bimuna mubangeya. ¹⁵ Embwe,nambe Helonda,omwo na mwilwitha kuli yetu,oloje taleni,kukwethi chuma nalingi linga ba mwananecho mulonga wa kuthsa. ¹⁶ Ngechibene njika muthzangametha lika linga nji mwechele." ¹⁷ Pilato waketelele kwechele chinthzinda umo wa ba Yunda athimbu ya chiwano. ¹⁸ Cho boshe batambekele,ngwabo, "Muthzituleni, twane Mbanambase!" ¹⁹ Mbalambase wa pwile munalume wakele mukamenga mwafwa wakele na kulinga mpindangano munganda na kuthsiye banu. ²⁰ Pilato wendekele nabo lalo,washakele kwechela Yesu. ²¹ Oloje batambekele,ngwabo, "Mushukikeni,mushukikeni." ²² Wendekele nabo lwa muchitatu, "Buka,bubi buka bwanalingi ou munalume? Yange kunja wanene chuma cha kumuthsiyila. Njimuthzangametha lika,cho njimwechela aye." ²³ oloni batwaleleho kutambeka,kutonda ngwabo linga ba mushukke,cho kutambeka kwabo kwa hyanethele Pilato. ²⁴ Cho Pilato wa thinganyekele ku bana bibatondele. ²⁵ Cho wechelele uje munu ibashakele uje ibakele mukamenga a mulonga wa mpindangano naku thsiaya banu,cho wabanene Yesu ngechi ba mulinge mwaya chitzhango chabo. ²⁶ Omwo bakele na mutwala,baliwanene na umo SImoni waku Silene,wa fumine ku lifuti,ba mutwikile chilindakano linga a mbate,na kukaba Yesu. ²⁷ Mbunga ya kama ya banu,na banakathzi bake;e nakulinyenga na kulila,bamu kabangeyele. ²⁸ Omwo watengulikile kuli bakebo,Yesu wendekele ngwendi, "Eni bana babanakathzi bamu Yelusalema, Kethi mulile yange,oloni lililileni yeni babenya na bana beni. ²⁹ Taleni, matangwa ali nakwija omo bakendeka ngwabo, "Banabethzika baje kubethi na bana na aje memo kuakitile,na mabele aje kwalelele. ³⁰ Cho baputukile kwendeka ku minkinda ngwabo, 'Tuwilene, ' na kumalundu ngwabo, 'Tufwikeni.' ³¹ Omwo nga balinga byuma ebi ku muti wakutonola,choni bika lingiwa ngwe unomu?" ³² Banalume bamo,mapwepwe babali,baba twalele hamo nendi linga bakaba thsiye. ³³ Omu batele kumutambela umo uba tumbwile ngwabo "Chikola," kuje bene bamushukikile hamo nabaje mapwepwe - umo kuliyo mukwabo kuchimoshwe. ³⁴ Yesu wednekele ngwendi, "Tate,bakonekele,mwafwa kubathzibukile bibali na kulinga." cho batele ng'ela ,cho balipangelele buthalo bwendi. ³⁵ Banu bemanene na tala cho baje bantwama na bakebo ba mushendumwine,ngwabo, "wobwele bakwabo.Alyobole babenya,nga ikeye Kilisitu wa Njambi,uje wakwangula." ³⁶ Cho maswalale lalo ba mushendumwine,bethzile kuli ikeye nakumwana binyu, ³⁷ bendekele ngwabo, "Nga umwene yaba Yunda,lyobole yobe babenya." ³⁸ Bamwakele lalo chimwetho helu lyendi, "Ou ikeye mwene ya ba Yunda." ³⁹ cho umo wabaje mapwepwe bashukikile hamo nendi wa mushawile ngwendi, "Kuma kethi yobe Kilisitu ndi? Lyobole yobe babenya netu lalo utwobole." ⁴⁰ Oloni uje mukwabo lipwepwe wamukandele,ngwendi, "Kuma yobe kuwethi na kutewa Njambi ndi,yobe unatambula chihitho ngwe ikeye? ⁴¹ Chihitho chetu chinatupande,mwafwa tuli na kutambula fweto ya bilinga byetu.Oloni ou munalume nebi byanalingi bya bibi byahi." ⁴² Cho wendekele ngwendi, "Yesu, ukanjanuke omu ukaija mubumwene bwoshe." ⁴³ Yesu wamukumbulwile ngwendi, "Mwabuthunga Njikuleka ngwange,lelo ukala nange mu Palandazi." ⁴⁴ Omwo thimbu ya pwile akati kalitangwa,kwakele lithuthulungu mu lifuti lyoshe noho na kweta ha hola ya muchitatu ⁴⁵ nomwo litangwa lya thzibalele.Cho nanga ya mu tembele ya tabukile mubali. ⁴⁶ Watambele na lijwi lyaku kanguka, Yesu wendekele ngwendi," Tate njikundika mwonyo wange mumaboko obe." Omwo wamanethele kwendeka ebi,cho wa thsile. ⁴⁷ Cho mukulunu wa maswalale mwa mwene bije bya lingiwile,washangathzalele Njambi,wendekele ngwendi, "Mwabuthunga munalume ou wapwile muka buthunga." ⁴⁸ Omwo mbunga ya banu baje bethzile hamo ba mwene bije byuma bya lingiwile,belukile oku balinaku lipupa ha binulu byabo. ⁴⁹ Oloje baje boshe bamuthzibukile, hamo na banakathzi baje bamu kabele kutuinda ku Ngalileya,bemanene alyala,na kukengelela byuma ebi. ⁵⁰ Kwekele munalume umo wa lithzina lya YOsefa,wapwile umo wa munganda. Wapwile munalume wa mubwa muka buthunga. ⁵¹ Ou munalume katabele ku butumbe bwabo na bilinga byabo,wafumine ku Alamatiya,nganda ya ba Yunda,wakele naku kengelela bumwene bwa Njambi. ⁵² Ou munalume,waile kuli PIlato,nakulomba mubila wa Yesu. ⁵³ Waushukwile,cho wauthzengelele ha nanga ya linyu,cho waulangekele mu mbumbo ije iba chokwele mulimanya,muje kanda bathsindemo munu. ⁵⁴ Lya pwile litangwa lya kuli bwaethela,cho Sambata lalo ya pwile muyehi na kushangumuka. ⁵⁵ Banakathzi baje bethzile na Yesu kufuma ku Ngalileya bakangeyele na kumona mbumbo nomu balangekelemo mubila wendi. ⁵⁶ Cho belukile na kubwahetha Ng'undu na mathzi akunika lwengo. Cho litangwa lya Sambta ba hwimine kwethetha na lishiko.