¹ Hathimbu ije, banu bamo bamulekele ngwabo Yesu bya bakangalilya baje maninga abo baapandakanene na kuli Pilato kuninkombelo byabo babenya. ² Yesu wabakumbulwile nakwendaka ngwendi, "Muthinganyeka ngweni aba bangalileya bakele na bubi bwakama kutubakana bakwabo boshe bangalileya mwafwa bayandele mungila yabo ndi? ³ Kwahi, njimileka ngwange. Oloni mona kumutenguluka kububi, mubaboshe muka nyongwa mungila imolika. ⁴ Nambe baje likumi batanu nabatatu abanu bamu Siloame baje babawililile kuli kaposhi nakubathsiya,mwathinganyeka ngweni bapwile bakabubi nambe kutubakana bakwabo banalume ba mu Yelusalema? ⁵ Ngwange embwe. Oloni mona kumutenguluka kutunda kububi,neni,mubaboshe nawa mukanyongwa." ⁶ Yesu wabalekele mubithimo ngwendi, "Munu umo wakunine muti wa mukuyu mu lihya lyendi cho wethzile nakukengako amone ngwe chinemi oloni kukwethi nebi bya waneneko. ⁷ Munalume wendekele kuli mukakulima ngalanja ngwendi, 'Kenga,a myaka itatu njinakala na kwija na kwetheka kuwanako bushuka kuli ou muti wa mukuyu oloni nambe kamo kahi. Chishinjemo. Bika chibihithila libu?' ⁸ "Ndimi wangalanja wakumbulwile ngwendi, 'Checheni muunomwaka njikendako nakwakako bwilo. ⁹ Mona chikema bushuka mwaka wijaho; cho ngwe kuchikemi,cho mukachishinjemo."' ¹⁰ Cho Yesu wakele nakulongetha muma Sinangonga halitangwa lya sapalalo. ¹¹ Kengeni, kwakele munakathzi wakele na mundthzindthzime ya kujwala ha myaka likumi naitanu na itatu. Wakulamene na kweneka kwoloka kathele na kulyolola. ¹² Omwo Yesu wamumwene, wamuthanene nakumuleketha ngwendi, "Munakathzi,unakanguka kukubinja kwobe." ¹³ Cho wakambelkele maboko endi hali ikeye,haje bene bamwolwele na kushangathzala Njambi. ¹⁴ Oloni mukulunu wamuje muma Sinangonga walubalele mwafwa Yesu nakangwitha mukakubinja halitangwa laya sapalalo. Cho mukulunu wakumbulwile ku mbunga na kwendeka ngwendi, '' Kuli matangwa atanu na kimo akewo achili kupanga. Ijeni linga bamikangwithe,oloni kethi ali tangwa lya sapalalo." ¹⁵ Shukulu wamukumbululwile nakwendeka ngweni, "Baka chibembelu! kumani hali yeni naumo wahi athzitula ngombe yendi nambe chimulu chendi ku chitunditha mulimba na kubatwala mukunwa halitangwa lya sapalalo? ¹⁶ Cho neendi ou mwana wa Abilahama,ou satana yakutile hathimbu yakama a myaka likumi naitanu naitatu,kumani kapandele muthzitununa halitangwa lya sapalalo?" ¹⁷ Omwo wakele nakwendeka ebi byuma,boshe baje bakele nakumulumbilitha bathzibile shwama,oloni mbunga yoshe yajolele hali byuma bya chili bya kukomwetha bije byalingile. ¹⁸ Cho Yesu wendekele ngwendi, "Bati bumwene bwa Njambi tukabupwitha ngwe bika,cho bati njikabwetheketha kuli yeni? ¹⁹ Bunapu chimona cha mbuto chije ambata na kuchumbila changalanja yendi,cho chathokele na kukokla kupwa chiti chakama,na tuthzila ba mwilu batungiliko mashwa abo kuminango." ²⁰ Cho lalo wendekele ngwendi, " Kuka kunjikabwetheketha bumwene bya Njambi? ²¹ Bunapu ngwe muthima uje wamabatele munakathzi nakukumbathana lutatu na bunga bwa tiliku noho bwafutunukile." ²² Cho Yesu wetile mubimbongi na mumembo,mu kulongetha na kupanga ngila yendi yaku Yelusalema. ²³ Munu umo wendekele kuli ikeye ngwendi. "Shukulu,kumani banu babandondo lika bakebo ba koboka ndi? " Wamukumbulwile ngwendi. ²⁴ "Lithindwiyeni na kukobela muka chikalao kakandondo mwafwa,njimileketha ngwange, babeni baketheka na kukobela oloni bakahonowa. ²⁵ Mona babenya njubo akemana na kushokako ching'alamba,cho mukemana hanja na kutota aching'alamaba na kwendeka ngweni 'Shukulu,Shukulu,tukobeletheko.' "Akamikumbulula na kwendeka nini ngwendi, 'Kunjimithibuka cho munatundu kuli.' ²⁶ Cho mukendekas ngweni, 'Twalile na kunwa kulutwe lweni na kulongetha mutubingila twetu twatundondo.' ²⁷ "Oloni akakumbulula, 'Njendeka kuli yeni ngwange, kunjimithzibuka mwatundilila kulijo.Tundeni kuli yange,yeni bakakulinga bubi!' ²⁸ Kukala kulila nakulingenjanga mu mayo omwo mukamona Abilahama,Isaki,Yakobo na boshe baje boshe bakakupolofita ba mubumwene bwa Njambi,oloni yeni bakamwimbila kuti. ²⁹ Banu bakaija kutunda ku mbwela,kumbiko,kushango na mukangombe kayambi bakaija nakutumama kumetha mubu mwene bwa Njambi. ³⁰ Thzibukeni echi,ngweni boshe bakakotokela bakapwa bakakulibanga nabaje boshe bakulibanga bakapwa bakumamanuthilo. ³¹ Muthimbu ije bene,bafaliseo bamo bethzile kuli ikeye nakwendeka ngwabo, ''Yaa na kutunda kuuno mwafwa Helonda atonda kuku thsiya." ³² Yesu wandekele ngwendi, "Yeni mukamuleke uje mabje ngwenyi, 'Tala,njikatunditha muthzindthzime yakujwala na kulonetha lelo na imene,naindele athinoni njikamanetha chipangi change.' ³³ Nameme ngocho,chachibwa kuli yange kutwalelelela,naindele,mwafwa banachibya bwahetha kapolofita kuthsila anja lya Yelusalema. ³⁴ Yelusalema, Yelusalema, yobe ukathsiyi tunyungi ba Njambi nakwasha mamanya baje babanamitumina. A thimbu yoshe njathzanga kukongweya bana bobe ngwe chali cha kathumbi na butikiya bana bendi mu mambaba endi,oloni kumwa mwachithinganyekele echi. ³⁵ Tala, njubo yobe banaithethze. Njendeka kuli yobe,kumukanjimono noho mukendeka ngweni, 'Babethzika baje bakaija muithzina lya mwene.'''