¹ Omwo Yesu weke na kwita ,wamwene munalume kapuputwa kufuma kukusemuka kwendi. ² Bandongethi bendi bamwihwile ngwabo "Mulongethi,wabulumwine,ou munalume ndi bithemi bendi,akulingitha athemuke kapuputwa?" ³ Yesu wabakumbulwile ngwendi kethi ou munalume walingile bubi,nambe bithemi byendi,oloni linga bipangi bya Njambio bisholoke muli ikeye. ⁴ Tunapande kunena bipangi byendi uje watutumine thimba kuchili litangwa. Buthsiki bulinakwija omwo naumo wahi akatha kupanga. ⁵ Thimbu njichili akaye yange cheke cha kaye." ⁶ Hanima yebi wendekele ebi byuma Yesu,wajekwilile mate hathi,washingile libu na mate ,nakumukwita libu ha mesho endi. ⁷ Wendekele kuli ikeye ngwendi, "Yaa,uka jwele ku mesho obe mulishali lya Siloame" (kulumbununa ngwabo "Kutumiwa" ). Cho uje munalume waile,wajwelele,cho welukillemo oku ali na kumona. ⁸ Cho bakwabo mubalyatela nabo baje bamumwene laja alinakulomba bukwathi kuli banu bendekele ngwabo, ''Ou kethi uje munalume wakele nakutumbama hathi nakulomba bukwathi ku banu ndi?" ⁹ Bamo bendekele ngwabo, "Ikeye." Bakwabo ngwabo, "Embwe, olojo walifwa ngwe nendi. Oloni wendekele kuli bakebo ngwendi, "Yange bene." ¹⁰ Bendekele kuli ikeye ngwabo, "Cho mesho obe anashokoloka batijo?" ¹¹ Wabakumbulwile ngwendi, "Munalume bathana ngwabo Yesu washingile libu na kunjikwitalyo ha mesho ange na kunjileka ngwendi, 'Yaa ku Siloame uka jwele.' Cho njaile na kujwele,cho nja tambwile bukwathi bwa kumona." ¹² Cho bendekele kuli ikeye ngwabo, "Ali kulijo?" wabakumbulwile ngwendi,"Kunjithzubuka." ¹³ Batwalele ou munalume uje wapwile kapuputwa kuli bafaliseo. ¹⁴ Cho lya pwile litangwa lya sapalalo omwo Yesu washingile libu nakulshokolola mesho endi. ¹⁵ Cho nawa bafaliseo bamwihwile batijo watambwile bukwathi bwa kumona. Wabalekele ngwendi, "Wanjakele libu lya shingile ku mesho ange,njataneneko cho njethzile na kumona." ¹⁶ Bafaliseo bamo bendekele mgwabo,"Ou munalume kethi wakufuma kuli Njambi mwafwa kethi nakunyunga sapalalo."Bakwabo ngwabo, "Chipwe bati munu ikeye mukabubi alinga ebi bimwetho bya kufwa ngechi. cho hakele chaandu hakati kabo. ¹⁷ Cho bahwile ou munalume wakele wa kapuputwa nawa, "Bika wendeka ali ikeye kufuma thimbu yshokolwe,e msho obe?" Kapuputwa wendekele ngwendi, "Wapwa kapolofita." ¹⁸ Omwo bayundeya anga kubakulahelele kupwa kapuputwa natambula bukwathi bwa kumona noho bathanene bithemi bendi baje batambwile bukwathi bwa kumona kwendi. ¹⁹ Behwile bithemi bendi ngwabo, "Ou muneni uje ibakatumbula ngwabo wathemukile kapuputwa ndi? Cho batijo ali nakumona?" ²⁰ Cho bithemi bendi babakumbulwile ngwabo, "Twathzubuka ngwetu ou ikeye munetu cho wathemukile nabupuputwa. ²¹ Oloni omo mwali nakumona,kutwathzubukile,iyajo namushokolola mesho endi,kutwamuthzubukile. Mwihuleni,na kolo. Natha kulyendekela babenya." ²² Bithemi bendi bendekele ebi byuma,mwafwa bathzibile lyoba lya bayunda. ²³ Mwafwa bayunda banalithzibathanene laja ngwabo mona woshe owo amukulahela kupwa Kilisitu,bakamutundithamo mu Sinangonga. Mwafwa wechi,bithemi bendi bendekele ngwabo, "Nakolo,mwihuleni." ²⁴ Cho lwamuchibali bathanene uje munalume wakele kapuputwa na kwendeka kuli ikeye ngwabo, "Lithinge kuli Njambi. Twathzubuka ngwetu ou munalume wapwa mukakubulumuna. ²⁵ Cho uje munalume wabakumbulwile ngwendi, "Kunjathzubukile ngwange wapwa muka kubulumuna. Oloni chimo njinathzubuka njapwile njikapuputwa,oloniihaino thimbu njili nakumona." ²⁶ Cho bendekele kuli ikeye ngwabo,"Bikajo byanalingi kuli yobe? Batijo washokolwele mesho obe?" ²⁷ Cho wabakumbulwile ngwendi, "Njamileke laja,cho kumwathzibithithile! Bika mushaka kuthziba nawa? kumwashakele kupwa bandongethi bendi nawa indi batijo? ²⁸ Cho bamutukile nakwendeka ngwabo, "Yobe undongethi yendi.olojo yetu tubandongethi ba Mosesa. ²⁹ Twathzubuka ngwetu Njambi nendeka kuli Mosesa,olojo kutwathzibukile ou kwana tundilila." ³⁰ Ou munalume wabakumbulwile na kubaleka ngwendi, "Chinapu chakukomwetha,kumuthzubuka kwatundilila,oloni nanjishokolola mesho ange. ³¹ Twathzubuka ngwetu Njambi kethi kuthzibilila kuli bakakubulumuna,oloni mona umo abithzibilila na kulinga mwaya chithzango chendi,cho amuthzibilila. ³² Kutunda kukushangumuka kwa kaye kanda bathzibeho laja umo na shokolola mesho a munu uje wathemukile na bupuputwa. ³³ Mona ou munalume katundile kuli Njambi,cho ngwe kalingile chuma chimo chahi." ³⁴ Bamukumbulwile nakumuleka ngwabo, "Yobe chili chili wathemukile mububi,cho utulongetha yetu ndi?" Cho bamutuhwilemo. ³⁵ Yesu wathzibile ngwabo bana mutundithamo muma Sinangonga.Wamuwanene nakwendeka nendi ngwendi, "'Wakulahela muli Muna Munu?" ³⁶ Wamukumbulwile na kwendeka kuli ikeye ngwendi, "Ikeye iyajo, Shukulu,linga njimukulahele?" ³⁷ Yesu wendekele kuli ikeye ngwendi,"Unamumono,chonawa ikeye ou ali kwendeka nobe." ³⁸ Uje munalume wendekele kuli ikeye ngwendi, "Shukulu,njakulahela." Cho wamuthangathzele. ³⁹ Yesu wendekele ngwendi,"Akusompetha chikecho njethzilile hano hakaye linga baje kubethi kumona bakamone cho nawa baje balinamona bakapwe tupuputwa." ⁴⁰ Cho bamo bafaliseo baje bakele nendi hamo bathzibile ebi byuma cho bamwihwile ngwabo,"Netu nawa tutupuputwa ndi?" Cho ⁴¹ Yesu wabakumbulwile ngwendi, ''Ngwe mwapwile mutupuputwa,ngwe kumwakele na bubi,oloni omo lyapwa muli nakwendeka ngweni, 'Tumona.' Cho bubi bweni hanga mulina nabwo."