¹ Yange,mukulinga ngocho,hakupwa chinthzinda wa Shukulu,njinakumikwatha mwende mwa mubwa mukumithana chibamithanene. ² Njinakumikwatha kuyoyela mubunu bwakama mukulikehetha na kuthimpa,mukulyambatetha umo na mukwabo mu chithzemo. ³ Etheka kulinga mwa mubwa mu kunyunga kulinunga kwa muthzithzime mungila ya kwoloka. ⁴ Kwakala mubila umo na mundthzindthzime umolika,ngwe omu bamitganene lalo mu chinyangabili chimo chakumithana. ⁵ Cho kwakala Shukulu umolika,likulahelo limolika,kumbwitika kumolika, ⁶ na Njambi umolika Ishe ya boshe ou wahyana boshe kwitila muli boshe mu byoshe. ⁷ Kuli woshe muli yetu banatwana chikeketima kwetheketha na theteko ya bwana bwa Kilisitu. ⁸ Chili ngwe omu byendeka bithoneka: "Omu wakandukile kwilu,watwanene bindungo mu bundungo,na kwana bwana ku banu." ⁹ Indioni chinalumbununa bika cha kwendeka ngwabo, "Wakandukile," kethi ngocho lika oloni wathikulukile lalo mumeyla ya mwithi lya libu. ¹⁰ Ou wahikumukile ikeye munu umo lika ou wakandukile helu lya melu oshe,mangana ashulithe byuma byoshe. ¹¹ Cho Kilisitu wanene bano kukala miluwa,bakwabo tupolfita,bakwabo baka kwambulula,cho nabakwabo bakakwambulula,cho bakwabo kukla tunyungi na balongethi. ¹² Wanene ebi bipangi mangana etethe banu ba Njambi bakuthzilaha chipangi cha kupanga,mukutunga mubila wa Kilisitu. ¹³ Watwaleleleho kutunga mubila wendi kweta nomu tubaboshe tweta mukulinunga kwa likulahelo na mangana a muna Njambi,linga tukole nakweta ku theteko ya kushulithiwa kwa Kilisitu. ¹⁴ Kilisitu akatutnga mangana kethi tutwaleleleho kukla bana aba banakokela hanima na ha lutwe kumunkinda,banambatewa na lihunthzi lya bilongetha byoshe na byela bya banu mubingila bya kukwitha. ¹⁵ Nambe ngocho,kwendeka buthunga mu chithzemo,twatela kukola mu bingila byoshe muli ikeye ou napu mutwe,ou ikeye, Kilisitu. ¹⁶ Kilisitu akatungu mubila woshe,cho bakaununga na kuukwatetha hamo na bilyo byoshe ebi bikkwatha,cho omu chilyo choshe,chipangela hamo,chikalingitha mubila kukola mangana ulinge ukewo babenya mu chithzemo. ¹⁷ Ngachije,njendeka na kukoletha hali echi muli Shukulu,ngwange kethi mutwalelele kwenda ngwe omu bakende ba kamafuti,mubilinga bya bithinganyek byabo bya ngocho. ¹⁸ Banabathzibaletha mu kutzibithitha kwabo,kubashweetha kutunda kubuyoye bwabu Njambi mulonga wa bukuma buje buli muli bakebo,ha mulonga wa kukola kwa bimbunge byabo. ¹⁹ Bunapu ba kwilika shwama cho banalyaka babena mubilinga bya bupangala,nakulilongetha bingila byoshe bya mathzilo na lithsita. ²⁰ Oloni omwo kethi mukemwo mwalilongethele hali Kilisitu. ²¹ Njambate ngwangemwathziba laja hali ikeye,nakumilongethela muli ikeye,omu buthunga bwakala muli ikeye Yesu. ²² Bamilekele kuthethza ebi bilinga bya mana a buyoye bwa laja,kuthethza muu walaja. Munu wa laja ikeye napu wakuthsa ha mulonga wa bithinganyeka bya makuli. ²³ Bamilongethele mangana bamitengulule kwa huhya ku bithinganyeka byeni byaku muthzithzime, ²⁴ na kuthzala munu wa muha ou batangele muchfwa cha Njambi - mukuthungama kwa buthunga na kuthzila. ²⁵ Ngachije.tundithenimo makuli,cho echeleni munu woshe muli yeni endeke buthunga na mukwabo,mwafwa tunapu baumo na mukwabo. ²⁶ Lubaleni oloni kethi mubulumune. Kethi mwechele litangwa lyamutunu kutoka hanga muchina lubala. ²⁷ Kethi mwane thimbu kuli lyobola. ²⁸ Ou wakele na kwiba alikele kwiba. Olojo,watela kupanga,kupangela echi chachibwa na maboko endi,mangana akale na byuma byakulipangela nabaje banajeneka. ²⁹ Kethi mwechele kwendeka chakutenuka chitunde mutunwa tweni. Pangetheni majwi amabwa akale akutengula baje banakuwathetela,mangana majwi eni ane chikeketima kuli baka kuthzila. ³⁰ Cho kethi munyenyetethe mundthzindthzime wakuthzila wa Njambi,mwafwa kwitila muli ukewo mukemwo bamyakele katenekeyetho kakubandamena litangwa lya kwoboka. ³¹ Tundithenimo kulubala kwoshe,bukenya,butenu,kuchokota,na matuka,hano na byoshe by bubi. ³² Kaleni mwamubwa nakweni,nambunge ya ibwa,kulikonekela umo na mukwabo,ngwe omu Njambi kwitila muli Kilisitu wamikonekelele.