¹ Ba Yawe balabila kuli Mose na Aloni. Balabila, ² ''Ii lifunde, emushilo ndemikambisha: Eba bena Isuleli ati bafwile baleta iñgombe yanakashi iya kukashika iitailipo ne fibashi nangu bulema, kabili iitainga mpintapo iki konkoli. ³ Pela iñgombe kuli Eliaza umupapatilishi. Afwile akaifumye posonde ya nkambi, kabili umuntu umo akaipaye kutanshi yakwe. ⁴ Eliaza umupapatilishi afwile akapintepo mulopa umo nemunwe wakwe ne kusansa imiku isano na ibili kutashi ya tente wamakumaninamo. ⁵ Iñgombe yanakanshi ifwile yaokewa pa menso yakwe - ikiseba, iminefu, kabili pamo na mulopa ne tufi twaiyo, fifwile fikokewe. ⁶ Umupapatilishi afwile akabule ikichi kya Sida ikichi kya Isopi, ne masaka aakashikile, kabili ne kufiposa mukati ka ñgombe yanakanshi iikopya. ⁷ Penka afwile awasha ifya kufwala fyakwe ne kusamba mu menshi. Penkapo eli pambi akengila mu nkambi, umo akekala uwafiko ukufika na ku kyungulo. ⁸ Umuntu ulya uwaokya iñgombe yanakashi afwile akawashe fyakufwala fyakwe mu menshi kabili ne kusamba mu menshi. Akaba wafika kufika naku kyungulo. ⁹ Uuli onse uutubile afwile akabungishe amatoi a ñgombe yanakashi iipile ne kuabika posonde ya nkambi pakende iyelelwe. Aya matoi afwile abane ku asungila ikimasamasa kya bantu ba Isuleli. Bakalesankanya matoi ne menshi yakuli tubishishako ku bubi, pakuti amatoi kafuma ku mulambu wa bubi. ¹⁰ Ulya wabungisha matoi a ñgombe yanakashi afwile akawashe fyakufwala fyakwe. Akaba wafiko kufika na ku kyungulo. Uyu akaba mushilo wa myaka ne myaka wa bantu ba mu Isuleli ne bena fyalo bonse abekala nabo. ¹¹ Uyo onse uwaikata umubili wa muntu uufwile akaba wafiko pa nshinku isanu na ibili. ¹² Uyo muntu afwile alitubisha pabushiku bwa butatu kabili na pabushiku bwa busano na bubili. Penka akaba mutubile. Lomba kani talitubishe pabushiku bwa butatu, penka takabepo uutubile pa bushiku bwa busanu na bubili. ¹³ Uyo onse uwaikata pa muntu uufwile, pa mubili wa muntu uufwile, kabili talitubishishepo yo-o uyu muntu aonala tempele yaba Yawe. Uyo muntu afwile aputulwako kubena Isuleli mulandu wakwebati amenshi yakutubisha tayasashilwepo paliye. Akali ne kubawafiko; ifiko fyakwe fikatwalilila ne kuba paliye. ¹⁴ Uyu mushilo uwakweba ati nga muntu afwila mwi tente. Onse uwaingila mwi tente na onse uukili mwi tente akaba wafiko pashiku isano na shibili. ¹⁵ Ikipe kyonse ikitakili ne kya kukubika kikaba kyafiko. ¹⁶ Pamo lukoso, uyo onse uuli posonde yetente uwaikata umo uwaipaiwa ne lupanga, mubili onse uufwile, ikikupa kya muntu, nangu kabuli - uyo muntu akaba wafiko pashiku shisano na shibili. ¹⁷ Kitenifi ku muntu wafiko: Tolapo amatoi amo kufumya pa matoi a mulambu wakubifya uwakokya ne kusankanya na menshi atotwele mu komeki ikulu. ¹⁸ Umuntu umbi uutubile afwile penka ukubula kakichi ka Isopi, ku kantumpa mu menshi, kabili ne kunsansa kwi tente, pafipe fyonse ifili mwitente, pa bantu abali mulya, kabili na kuli onse uwakwata kukikupa, onse uwaipailwe, onse uwafwile, nangu kabuli. ¹⁹ Pabushiku bwa butatu kabili napabushiku bwa busano na bubili, umuntu uutubile afwile akasanse umuntu wafiko. Pa bushiku bwa busano na bubili umuntu wafiko afwile akalitubishe imwine. Afwile akawashe fyakufwala fyakwe kabili ne kusamba mu menshi. Ku kyungulo akaba utubile. ²⁰ Lomba uyo onse akili wafiko, uwakana kulitubisha umwine - uyo muntu akaputulweko ku kimasamasa, mulandu wakwebati aonaula mwa mushilo mwa ba Yawe. Amenshi a kukowela tasanshilepo paliye; akili lukoso wafiko. ²¹ Uyu akaba mushilo wamuyayaya ukukuma kuli fifi fintu. Umuntu uwasansa menshi kukya kowela afwile awasha fyakufwala fyakwe. Ulya waikata menshi aya fikowele akaba wafiko ukufika nakukyungulo. ²² Ikili kyonse ikyafiko iki akwata kikaba kyafiko. Umunu uwakikata akaba wafiko kufika nakukyungulo.''