¹ Yefelo, umupapatishi wa ku Mijanya, wishi fyala Mose alyufwile fyonse ifyo ba Lesa ba mukichile Mose na bena Isuleli abantu bakwe. Alyufwile kwebati Yawe alibafumishe abena Isuleli mu Ijipiti. ² Yefelo, wishi fyala uwakwa Mose, ali mupokelele Zipola,umukashi wakwa Mose, ilyo amutumine ku ñanda yakwabo, ³ ne bana bakwe balalume babili; umo mwana wakwe ishina lyakwe ali ni Geleshoma, pakoti Mose alilabile kwebati, ''Nemo mweni mu kyalo kya bambi.'' ⁴ Isina lyaumbi ali ni Eliezela, pakoti Mose alilabile kwebati, ''Ba Lesa ba bashakulu bangi. Abali ubwafwilisho bwangi ba mpokolwele ku mpoko wakwa Falo.'' ⁵ Yefelo, wishi fyala uwakwa Mose, alishile na bana bakwa Mose balalume ne mukashi wakwe mu kiselebwa uko aikele mu ma tente ku mpili ya ba Lesa. ⁶ Ali alabile kuli Mose, ''Nemo, ne wishi fyala Yefelo, na isa kuli webo nomukashi obe na bana bobe babili.'' ⁷ Mose alile posonde mukukumanya ba wishi fyala, ali fukeme panshi, ne kumu fyompa. Bali lipwishe ifyo ba ikala kabili ne kwingila mu matente. ⁸ Mose ali mwebele wishi fyala fyonse ifyo ba Yawe ba kichile kuli Felo ne bena Ijipiti pa mulandu wa bena Isuleli, pa mafya aya ishile mushila yabo kabili nefyo ba Yawe ba bapokolwele. ⁹ Yefelo alisekele pa fyonse ifiweme ifyo ba Yawe ba kichilile abena Isuleli, pakoti aba pokololeniko kufuma mu maboko ya bena Ijipiti. ¹⁰ Yefelo alilabile, ''Ba Yawe ba lemye, pakoti amipokololeni ku maboko ya bena Ijipiti ne ku maboko yakwa Felo, ne ku bapokokoleni abantu kufuma ku bena Ijipiti. ¹¹ Lomba na mona ukwebati ba Yawe bakulu pa ba Lesa bonse pakuti ilyo bena Ijipiti ba ikeshe, bena Isuleli na mapata, ba Lesa bali pokololwele abantu babo.'' ¹² Yefelo, wishi fyala Mose aliletele ikilambu kya kokya ne fya kutapisha kuli ba Lesa. Aloni ne ba kulu ba bena Isuleli ba lishile mukulya ifya kulya ku menso ya ba Lesa na ba wishi fyala Mose. ¹³ Pakasuba kakonkelepo Mose alikele panshi mukuputwila abantu imilandu. Abantu bali makene ka ba mushungulukile kufumo lukelo kufika ne kyungulo. ¹⁴ Lomba wishi fyala Mose pakumona fyonse ifyo akichile abantu, nokulabila, ''Nindo kyabelefi kwebati ulekale so wenka na bantu? Mba nindo webo ulukwikala weka ne bantu byonse kabemakene ku kushunguluka kufumo lukelo ukufishe kyungulo?'' ¹⁵ Mose ali labile kuli ba wishi fyala, ''Abantu bakesa kuli nemo mukwipusha ishila iya ba Lesa. ¹⁶ Unfwa bali no bwafya, bakesa kuli nemo. Nemo ndasala pakachi kamuntu na umbi, kabili nemo nda basambilisha umusango uwa ba Lesa ne mishilo.'' ¹⁷ Wishi fyala wakwa Mose' alilabile kuli ena, ''Ifi mulekita tafiwemeshe ne. ¹⁸ Mwakuli katalisha mwebene, webo na bantu abali na webo. Iki kisendwa kya kutemeneni. Teti ukikite wenka ne. ¹⁹ Umfwa kuli nemo. Nemo nakukupelako umulanguluko, kabili na ba Lesa ba kaba nawebo, pantu niwe uwaimakenako abantu kuli ba Lesa, kabili ulaleta amafya yabo kuli bena. ²⁰ Ufwile kuba sambilisha umusango uwabo ne mishilo. Ufwile kuba bonesha ishila iya kwendamo ne kinto lya kukita. ²¹ Upitishililapo ufwilinge ukusala abantu, abafikilemo kufuma kubantu bonse abantu abalemekele ba Lesa, abantu ababukishinka abapachile ukupoka ifishingene. Ukababike pa bantu kuba intungulushi ishilolesha pa fitota, amakumi, fifties kabili ne ikumi. ²² Ba kaputwila abantu imilandu mu milandu shonse, lomba imilandu ishikosele bakalata kuli webo. Lomba pashilya milandu shonse shi nini, kuchi paputula abene mulyoshiba kuchi kya kwangukilako, kabili bakapinta infisendwa fyabo na webo. ²³ Umfwa wakitefi, kabiii umfwa na ba Lesa ba kukambisheni kukifyenkefi, lomba ukakosha ukunchinchika, kabili na bantu bonse bakosha kuya kuma ñanda kabasekelemo.'' ²⁴ Pakuti Mose alwaunfwilile ifwebo ifya ba wishi fyala ne kukita fyonse ifyo ba labile. ²⁵ Mose alisalile abantu abafikililemo kufuma ku Isuleli onse kabili ne ku babika aba kutangilila pa bantu bonse, abakutangilila pa fitota, pa fiumbi, makumi, kabili ne kumi. ²⁶ Baliputwilile abantu imilandu mu shila ilya filifye ifikilemo. Imilandu shilye ishikulu baliletele kuli Mose, lomba abena baliputwile shilye milandu shinini. ²⁷ Pano Mose alilekele ba wishi fyala ukuya, kabili Yefelo alibwelelemo ku kwabo.