¹ Mmi Jeeso nne tava cho kuwaamba nnaavo hape che milyaa, nnaati, ² Muvuso woku iwulu wu swaniswa mane iiri simwiine zumwe yaa va pangiri mwaanaswiisu waakwe mukiti we iseso. ³ Mmi mane choku tuma vahikaana vaakwe kuku ka suumpa aavo va vaa lalyelyeezwa mukiti, mmi vulyo aavo hape choku se eza. ⁴ Hape nnaa tuma vahikaana, nnaati, 'Mu lwiire vaka suumpwa, "Vone, nna vaakanya mulaalyiro. Nne kuti ingoombe zaangu zi nunine chi ze ihayiiwa, mane nne zintu zoonse chi zaa shiyama. Muiize ku mukiti we iseso."' ⁵ Mmi aavo choku hiinda vuhuva choku manina valyi yeendera inzira zaavo, zumwe cho kuya ku luwa lwaakwe, zumwe nnaaye ku misevezi yaakwe. ⁶ Vamwe choku hiinda vahikaana va simwiine, choku vapanga vuvilaala, choku ve ihaya. ⁷ Mmi lyiinu simwiine chiinga zuwa vulyo choku veenga choku tuma masolye aakwe, choku kee haya zivangooki iizo, mane choku ka hiisha muzi waazo. ⁸ Lyiinu iiye cho kucho vahikaana vaakwe kuti, 'Iseso chi lyaa shiyama, mmi aavo vavaa lalyeezwa kava sii zumininwa mu lyilyi. ⁹ Lyiinu mpaaho mu kwiiya mu mahondananzira makaando, mmi voonse veeti muka waane muka vacho kuti veeze ku iseso.' ¹⁰ Aavo vahikaana mpuva zwiiriire nni va kaya mu mazira choku ka puta voonse vuungi vwa vantu vu vava ka woolyi ku kopana nnaavo, voonse vulyo va fosaheere nni va shiyeeme. Mmi inzuvo yo mukiti nni ye izula cha vantu va vaa lalyeezwa. ¹¹ Mmi lyiinu simwiine chiinga eza ku vona vantu, choku vona muntu zumwe mukati yaa sana a vaa zweete zizwaato ze iseso. ¹² Simwiine choku mucho kuti, 'Mulyikani, weeza vulye aaha nnosa ka zweete zizwaato zo mukiti?' Mmi nnaa manina nni ku seena nne choku waamba. ¹³ Lyiinu simwiine mpwaa lwiiriire vahikaana vaakwe, 'Mumu woonde choku musumina mayaanza nne mateende, mumu ziindire haanze, kwiina ku wuunzula nne ku lyira inkuunkuma.' ¹⁴ Ka kuti vaangi va suumpitwa mmi ku salyitwa vache." ¹⁵ Mmi Vafarasayi nni vaa yeenda choku ka waambinsaana kuti mpona chiva woola ku woonda Jeeso che yihi inzira muku waamba kwaakwe. ¹⁶ Mmi nni va katuma varutwana vaavo kwaalyi, koonse vulyo nne vamwi va vaalyi kuzwa kwa Heroda. Cho kucho Jeeso kuti, "Muruti, twiizi kuti wiina vusakusima, mane nne kuti u kutaza che inzira ye Ireeza mu vusakusima vulyo. Ko wiina indava nne muntu zuhi kamba zuhi cho munahano waakwe, mane hape ko u salululyi vantu. ¹⁷ Mpaaho lyiinu tu lwiire, U nahana vulye? Aa kwiina kaha mulawo kuti tu ruwere Kaishara mitero kamba ka kwiina vulyo?" ¹⁸ Mmi Jeeso nnaa vona kufosahala kwaavo mane cho kucho kuti, "Chiinzi ha muni lyika, vaitimukanyi njoonwe? ¹⁹ Muni toondeza malyi o mutero." Ku zwaaho aavo nni va mulyeetera ipeeni lyi mwiina. ²⁰ Jeeso choku vacho kuti, "Chifateho nne izina lyaani iizi?" ²¹ Aavo choku mucho kuti, zintu za Kaishara." Ku zwaaho Jeeso choku vacho kuti, ''Chiingi lyiinu muhe Kaishara zintu zaakwe, mane nne Ireeza nnaaye zintu zaakwe.'' ²² Mmi lyiinu chiinga vaa zuwa vuti, nni vaa komokwa. Ku zwaaho mpuva mu siiriire cho kulyi yeendera. ²³ Mu izuva lyiswana Vasadukayi, aavo vati ka kwiina ku vuuka kwa vafu, cho kuiiza kwaalyi. Nni va mu vuuza, ²⁴ nni vati, ''Muruti, Mushe a vaati, 'mukwaame haa fwa, nnaa seena vaana, mwaanche u lukeere ku sesa muihaavwe kuti a mu zaalyire vaana. ²⁵ Ku veena vaanaswiisu va veena ku mana iyaanza nne toovere. We intaanzi choku sesa ku zwaaho cho kufwa. Choku saa siya vahwiire, nna siira muihaavwe mwaanche. ²⁶ Ku zwaaho mwaanaswiisu kuninaakwe wo vuuveri nnaaye choku chita chiswana, wo vuutatu nnaaye, nni kwaa va vulyo ku voonse mane mbwiita iiri kuwo ku mana iyanza nne toovere. ²⁷ Ku masulye aavo voonse mukulwaakazi nnaaye cho kufwa. ²⁸ Lyiinu muku vuuka kwa vafu, u kaya ku kuva muihavwaani mwaa va vaanaswiisu veena ku mana iyaanza nne toovere?'' ²⁹ Jeeso nnaa vee tava nnaati, ''Mwiina nne ku fosa, ka kuti ka muiizi iviivere mane nne ziho ze Ireeza. ³⁰ Ka kuti veeti nniva vuuke mu vafu kava sesi mane nnaangati ku seswa. Mmi vulyo va swana mane iiri mangiloyi ku iwulu. ³¹ Mmi cho kuya choku vuuka kwa vafu, ka mwiini ku vala chi vaa waambwa kweenu nne Ireeza, chiti, ³² 'Njeeme Ireeza wa Aburahama, Ireeza wa Isaka, mane nne Ireeza wa Jaakovo'? Ireeza ka heena Ireeza wa vafwiire, vulyo ngu wa vahala.'' ³³ Vuungi vuungi chiinga vwa zuwa vuti, nni vwaa komokerwa ituto zaakwe. ³⁴ Mmi lyiinu Vafarasayi chiinga vaa zuwa kuti Jeeso a vaa toontoza Vasadukayi, nni valyi kunganya voonse. ³⁵ Lyiinu zumwe waavo, yaa vaalyi lyikaangaati wo mulao, choku vuuza ipuzo-- ³⁶ ''Muruti, njo wuhi mulao mukaando ku milao yoonse?'' ³⁷ Jeeso choku mucho kuti, Sune Simwiine Ireeza waako che inkulo yaako yoonse, nne cho luhuho lwaako loonse, mane nne che ingana yoonse yaako.' ³⁸ Uuwu nje mulao we intaanzi mane nne mukaando. ³⁹ Mane nni wo vuuveri wu swana nnaawo--'Sune zumwe siina mo ulyi suni.' ⁴⁰ Mwe iiyi milao yoo vere muku waanika milao yoonse mane nne vaporofita.'' ⁴¹ Lyiinu yi vaati Vafarasayi chiva sii kungeene, Jeeso choku va vuuza ipuzo. ⁴² Nnaati, Mu nahana kutiinzi cha Kirisiti? Mwaana waani?'' Mpuva mu teereere kuti, Mwaana wa Daafita.'' ⁴³ Jeeso choku vacho kuti, Chiinzi lyiinu Daafita cho wiina mu luhuho haa mucho kuti Simwiine, chooti, ⁴⁴ 'Simwiine nnacho Simwiine waangu, ''Wii kalye ku iyaanza lyaangu lya malyio, ku sika mane nni nni chite zira zaako kuva hoo viika mateende'''? ⁴⁵ Haiva mmi lyiinu Daafita umu suumpa Kisrisiti 'Simwiine,' u saanduka vulye kuva mwaane hape?'' ⁴⁶ Nni kwaa shaala ka kwiina mane nnaangati wu mwiina kuku muitava nnaangati cha kaanzwizana, ku zwaaho nni vaa ziimika voonse vulyo kuva kuikala nniva mu vuuza ipuzo kuzwa che ilyo izuva kuya ku vusu.