¹ Jeeso ne varutwana vaakwe chinga vaa sika ha fwihi ne Jerusalema, mane kuiiza ku sika kwa Bethepaje, ku irundu lye zitente, Jeeso mpua tumiine varutwana voo uvere, ² Naa va cho kuti, mu ye mu muzi u mu futatiire, mmi cho ku saa lyiya chivaka mu mu ka waane indoonki yi sumiinwa ne kadoonkaana kayo; muka zisungunune, mu zi lyeete kwaangu. ³ Mmi haiva kwiina muntu yoo u woola ku wamba chimwi ha teni, mu mulwiire kuti, Simwiine u zi saka; mmi cho ku hweera mwaa zimuhe. ⁴ Zoonse iizi zi vaalyi ku pangahala kuti zi vaa waambwa ne muporofita zii zuzirizwe chooti, ⁵ Lwiire inkazana wa Siyona, vone wee, Simwiine waako u keeza kwaako, cho kulyi woonda, naa kee chiire indoonki, mane nnaho kadoonkaana vulyo. ⁶ Varutwana choku katuka nni vakaya, choku kapanga mboona mwaa valayira Jeeso, ⁷ Choku kalyeeta indoonki, nne kaana kaayo, mmi aavo varutwana choku hiinda zizwaato zaavo choku ziviika hee wulu lyaazo choku mu ikalyika ha teni. ⁸ Mmi nne vantu vaangi choku manina chi vaa zaanda zizwaato zaavo mu inzira mwaa kaya vuya; vamwe vaavo cho kuva nni va kosoola tutavi twe zisamu ku masamu choku zivaamba nenza mu inzira. ⁹ Mmi lyiinu vuungi vuungi vu chi vu vaa yendeere ha vusu, ne vu vaa shaalyiire, ni vwaa huwa ni vuti, Hosanna ku Mwaana wa Daafita! Wiina mu Mikoonde iiye yoo u keeza mu izina lya Simwiine. Hosanna ku iwulu!'' ¹⁰ Jeeso chinnga e njira mwa Jerusalema, muzi wonse ni waa kundungeha ni wuti, ''Njeeni uuzu? ¹¹ Mmi vuungi vuungi ni vwe itava, ''Uuzu nje Jeeso muporofita wa Nazareta mwa Galaleya.'' ¹² Ku zwaa aho Jeeso ne injira mu itempere.A vaa hindiki vonse va vaalyi ku wula ne ku wuza mu itempere, cho ku wiisoola mataafulye aavo va vaalyi ku wuza malyi, mane ne zipura zaavo va vaalyi ku wuza inkuva. ¹³ va va cho kuti, ''Ku ngolyetwa, 'Inzuvo yaangu ka i sumpwa inzuvo ye itapero,' mmi uunwe mu ipanga irindi lya vasa. ¹⁴ Mmi va saa voni ne va chunkuta ni veeza kwaalyi mu itempere, mmi naa va hoza. ^{16 15} Mmi lyinu vapurisita vakando ne vangolyi chiinga vaa vona zi komosa zaa a va pangi,mane ne ku zuwa vahwiire ne va huwa mu itempere ni vati, ''Hosanna ku Mwaana wa Daafita,'' ni vaa nyeerwa ahulu. ¹⁶ Cho ku mu cho kuti, Mane u zuwiire kuti aava vantu va kweete ku cho ku tinzi? Mmi Jeeso naa va cho kuti, Eeni, nandi ka mwiini ku vala, 'Ku zwa mu tulomo twa vahwiire ne nkeke zi nyonka nke mu zwa ku tembwa ku lyikeene'? ¹⁷ Jeeso naa va siya, cho ku yenda hanze lyo muzi kwa Bethani; mmi naa ka laala kwa teni. ¹⁸ Mmi kakusasani cho u voola mu muzi wa teni, a aa fwiire nzala. ¹⁹ Mu ku vona isamu lye ikuzu mu nzira, cho ku ya ku lyiri, mmi cho ku saa waana chintu mu lyiri mbwiita makova vulyo, cho kulyi cho kuti, sanzi ni ku voolyi ku waaniki chihantu mwaako kuzwa suunu. Mpulyi vaa zuminini hoohwaaho vulyo. ^{21 20} Mmi varutwana chinga vaa vona vulyo, va vaa komokwa, cho ku cho kuti, '' Ku iza vulye kuti iilyi ikuzu lyi zuminine vuti cho vuhweeru?'' ²¹ Jeeso ne itava cho ku vacho kuti, ''Vusakusima ni mu lwiirite, cho kuti mwiina itumero mane ne ku saa vireera, mu woola ku chita ne ku zamba ichi cha pangahalyira isamu lye ikuzu, mane ni ha mu cho iilyi iruundu, 'Nyemuke, u ka wiire mu iwate,' ka ku pangahalye. ²² Mmi ne zintu zonse vulyo, zeeti chi mu kumbiira mu ku chencherera, chi mu zumina ka mu tambulye. ²³ Jeeso chinga he iza mu itempere, vapurisita va maziimo ne vakulwaana va vantu cho ku iza kwaalyi naa kweete ku ruta, cho ku mu cho kuti, u chita izi zintu che maziimo a zwa kuhi? Mane njeeni yo u kuha aa maziimo?'' ²⁴ Jeeso naa itava cho ku va cho kuti '' Naame mu ni mu vuuze ipuzo i mwiina, chi mwa ni lwiira, mu ni mu lwiire kuti ni chita izi zintu cha ahi maziimo. ²⁵ Ikolovezo ya Johani- i vaalyi ku zwa hi? Ku iwulu nandi mu vantu? Ni va ikala ni va wambinsaana mu kati kaavo, ni vati, haiva mu tu mu cho kuti, 'Ku zwa ku iwulu,' mwaa tu cho kuti, 'Lyinu chinzi ha mu seena mu va mu zumini?' ²⁶ Mmi chi twa mu cho kuti ku vantu, tu tiya vungi vwa vantu, Ka kuti vonse va hiinda kuti Johani a vaalyi muporofita.'' ²⁷ Mmi ni va itava Jeeso cho ku mu cho kuti, '' Ka twiizi.'' hape a voolyi a va cho kuti, ''Naame keeti chi ni mu lwiira kuti iizi zintu ni zi panga che itayero yihi. ²⁸ Mmi mu yi vona vulye iiyi indava naanwe? Zumwi unkosi a vaa zeere vaswiisu voo uvere; cho ku iza ku wee ntanzi, cho ku cho kuti, 'Mwaanangu, kwiya u ka tende ku luwa suunu.' ²⁹ Cho ku itava naati, 'Ka ni yendi,' Mmi kavakazana mpwaalyi nyansikiiza, cho ku yeenda. ³⁰ Mmi cho ku iza ku wo vuuveri, cho ku wamba mu swana cho ku itava naati, mu ni yeende, ita: Ku zwaaho cho ku saa yeenda. ³¹ Njeeni mu vuu veri vwaavo yaa va pangahaza ku suna ku veesi? Ni va mu itava kuti ''Nji wee ntanzi. Jeeso cho ku va cho kuti, aaho ni mu lwiirite, vakunganyi ve mitero ne mahuulye ka va ke injire mu muvuso wee Ireeza kwanda enu. ³² Ka kuti Johani a veeza kweenu che nzira yi shiyeeme, mmi ka heena mu va mu zumini mmi mane vakunganya mitero ne mahuulye mba vantu va va mu zumini.Ne chiinga mwaa vona vulyo ka heena mu vaa sanduki kuti mu woolye ku mu zumina. ³³ Mu zuwe umwi mulyaa. Ku veena unkosi, a veena inkanda. A vaa lyimi luwa lo muwoomba, naa lu zaakiriza, a si irindi lyo ku tutira mwa teni,a zaaki kazuvo ka ya ku iwulu ko ku lyinda, cho ku lu siira va saka ku lyima muwoomba mu lulyi.Ku zwaaho naa a zwa cho ku ya ku nkanda inngi. ³⁴ Mmi inako yo ku sinza zihantu chiinga yaa chuuta ha fwihi, cho ku tuma vahikaana vaakwe ku valyimi vo muwoomba kuti va ka hinde zihantu zaakwe. ³⁵ Mmi valyimi vo muwoomba cho ku hinda vahikaana vaakwe, cho ku kava u mmwina, cho ku ihaaya zumwi, ku zwaaho zumwi cho ku mu ghovola cha mavwe. ³⁶ Ku zwaaho hape si luwa cho ku tuma vamwi vahikaana vaangi ku zamba vee ntanzi: mmi cho ku ka va panga moo mona mu va va chiti vee ntanzi. ³⁷ ku zwa aho cho ku tuma mwaane ku valyi, naati, 'Ka va ka kuteke mwaanangu.' ³⁸ Mmi valyimi vo muwoomba chiinga vaa vona mwaana, ni vaa wambinsaana kuti, 'Nje swaana uzu. Mu ize, tu mu ihaye tu hinde vuswa.' ³⁹ Mmi ni va mu wonda, cho ku mu zindira hanze lye iwa cho ku mu ihaya. ⁴⁰ Lyinu si luwa chinaa sika, keeze naa pange vulye aava valyimi vo muwoomba?'' ⁴¹ Aavo cho ku mu cho kuti, Kaa a sinye avo vankosi va fosaheere che inzira i lyema, ku zwaaho cho ku hinda luwa lo muwoomba cho ku luha vamwi valyimi veeti ni va ku mu ha zihantu zaakwe che inako yo ku sinza. ⁴² Jeeso cho ku va cho kuti, ''Aa ka heena mu vaa valyi mu lyinzwi lye Ireeza, 'Ivwe lyi va vaa kaani vazaasi njoolyo lyi chi lyi vaa vi ivwe lya mawonderero. Uuku ku vaalyi ku zwa kwa Simwiine, mmi mane kulotu mu menso eetu'? ⁴³ Lyinu ni mu cho kuti, Muvuso wo ku iwulu ka mu wu nyanngwa cho ku wu ha vantu vamwi va woola ku zwiisa zihantu za teni. ⁴⁴ Mmi zumwi ne zumwi yeeti naa wiire heelyi ivwe kaa chookoke mbwiita tubalyizana.Mmi iiye weeti ni lyi wiire, ka lyi mu sire.'' ⁴⁵ Mmi lyinu vapurisita vakulwaana ne vangolyi chiinga vaa zuwa iyi ingulyi, cho ku lyemuha kuti zire u wamba ka haavo. ⁴⁶ chi va saka ku mu wonda, cho ku tiya vungi vungi vwa vantu, Ka kuti vantu vaa veezi kuti muporofita.