¹ Lyiinu Jeeso nnaa waamba nne vuungi vuungi vwa vantu mane nne varutwana vaakwe. ² Nnaati, ''Vangolyi nne Vafarasayi ve ikala mu chipura, cha Mushe. ³ Mpaaho lyiinu chimwe nne chimwe chiva mucho kuti muchi pange, choo chweecho muchi chite cho kuchi panga. Mmi uunwe musiye ku chita kuya cho misevezi yaavo, ka kuti chaavo vulyo ku waamba ku zwaaho kava pangahaza. ⁴ Ee, ka kuti va hiinda choku puteereera choku suminina miputo mikaando yi lyema, ku zwaaho cho kuyi viika mu maheta a vantu. Haku zwaaho aavo mane nnaangati cha kanwe ka mwiina kava lyiki ku nyemunisa. ⁵ Mmi misevezi yaavo yiva woola ku panga vayi pangira mu maanteembwa kuti va vonwe nne vantu. Va kaandusa a hulu ziviiko zaavo zo mulawo, mane choku kuza a hulu hape majira e zizwaato zaavo. ⁶ Ha va zwaaho choku suna a hulu meekalo a maziimo mu mikiti nne zipura zi ikalwa vantu va kutekeha mu ikereke, ⁷ Mane nne ku rumeresa a hulu mu misika, mane nne ku suumpwa nne vantu kuti, 'Varuti.' ⁸ Mmi uunwe mu siye ku suumpwa 'Varuti' ka kuti mwiina muruti wuu mwiina vulyo, mmi uunwe mu voonse mu lyikana vulyo. ⁹ Mmi saanzi nni mu suumpi muntu kuti nje isheenu haansi hanu, ka kuti Isheenu wu mwiina, iiye yo wiina ku iwulu. ¹⁰ Hape mane mu siye ku suumpwa 'vakutazi,' Ka kuti mwiina vulyo mukutazi wu mwiina, iiye Kirisiti. ¹¹ Mmi iiye yoo lyi vona kuti nje mukaando mukati keenu ave nje iiye muhikaana wa vamwi voonse. ¹² Mmi iiye yeeti nna alyi nyemune kaa voozwa haansi. Ku zwaaho iiye yeeti nna alyi vooza haansi kaa nyemunwa. ¹³ Mmi ku mayivite uunwe mu Vangolyi nne Vafarasayi, muva itimukanyi! Mu iyalyira muvuso woku iwulu vantu. Kuti mu injire ka mu injiri mwa teni, hape va saka ku injira nnaavo muva kaanisa kuti ve injire. ¹⁴ Mu mayivite, uunwe vangolyi nne Vafarasayi, va itimukanyi! Ka kuti mu yembaana yembaana mu mawate nne mu inkaanda kuti mu woolye ku saandula muntu. ¹⁵ Mmi lyiinu ha kuti chaa saanduka, mu mu chita kuti ave mwaana we ihere koovere siina mane iiri njoonwe. ¹⁶ Ku mayivite uunwe vahitizi va saa voni, mucho kuti, 'Muntu vulyo ha alyi kana che itempere, ka heena chimwe vulyo. Mmi zumwe nne zumwe yo ulyi kana che ighauda ye itempere, njo u shaala u korweete.' ¹⁷ Uunwe muzi yaanga zisaa voni! nche iichiji chikaando, ighauda kamba nje itempere yi joloza ighauda? ¹⁸ Ka kuti zumwe nne zumwe yeeti nna koonke che iziko lye chitavero, ka kwiina chimwe vulyo ha teni; mmi yeeti nnaalyi koonke che chitavero china hee ziko, wiina mulaandu.' ¹⁹ Ma haafu a saa voni a aa; nche chihi chikaando, chitavero nnaandi iziko lye zitavero lyi joloza chaa viikwa ha teni? ²⁰ Mpaaha lyiinu iiye yeeti nna alyi kane che iziko lye zitavero, ulyi kana chaalyo mane nne chimwe nne chimwe chiina ha teni. ²¹ Mane nne zumwe nne zumwe yeeti nna alyi kane che itempere, ulyi kana chaayo, mane nne chaakwe yo wi ikala mwa teni. ²² Mmi iiye yeeti nna alyi kane che iwulu, ulyi kana cho vusimwiine vwe IREEZA, mane nne chipura chaakwe yo wi ikala ha teni. ²³ Ku mayivite uunwe mu Vangolyi nne Vafarasayi, va itimukanyi! Mu ruwera cho vuikumi che iminti nne nyaanisi nne ikamine, mmi choo vulyo muka siyite kamba muka chirite zintu zikaando zo mulao, nne ikatulo, inse mane nne itumero: zoo zweezi nzi muva lukeere ku chitahaza, kwaanda oku zi zaambuluka choku zi siya. ²⁴ Uunwe muva hitizi mu saa voni, muti ha kuti mu mina ka ghini mu panga ijwaanzi/ irata mmi ha kuti mu mina ikaamera muyi mina vulyo nni mu toontweere. ²⁵ Mu mayivite uunwe, Vangolyi nne Vafarasayi, muva itimukanyi! Mu hiinda chipeto choku shaanza inkomoki haanze mane nne impulyeeti, mmi mukati kaazo nni ziina ikwe lyimwi lyi saa woolyeki. ²⁶ Uuwe u mufarasayi yoo saa voni, koo shaanze piri ikwe lyiina mukati ke inkomoki nne impulyeeti, ku chitira kuti nne haanze lyaazo zi woolye ku jolola. ²⁷ Ku mayivite uunwe Vangolyi nne Vafarasayi, va itimukanyi! Ka kuti mukola mane iiri makuumbu a tuva, a voneka vulotu haanze toota, mmi mukati ka teni nni eena zifuha za vantu vafwiire, mane nne imbolyeza yoonse vulyo. ²⁸ Voovo vuti nnaanwe mumu voneka haanze lyeenu ku vantu choku jolola, mmi mukati keenu mu izwiire vuitimukanyi, nne ku saa shiyama. ²⁹ Ku mayivite uunwe Vangolyi nne Vafarasayi, va itimukanyi! Ka kuti mu zaaka makuumbu a vaporofita, mane choku lotusa zivaka za teni, ³⁰ Ku zwaaho cho kucho kuti, kalyi nni tu vaalyi kuhala mu inako zi ve isheetu, nni tu sana tu vaavi nne chiave muku itira malaha a vaporofita. ³¹ Kamu vone mane kete muha vupaki kuti mu vaana vaavo va ve ihayi vaporofita. ³² Ka mu izuziriza vulyo zintu zi ve isheenu kaa mwiina. ³³ Inzoka njoonwe, vaana ve inzoka, mu woola ku ngoombola vulye ku watwiirwa imbiimbiro. ³⁴ Chiingi mpaaho, mu vone, nni mu tuminiza vaporofita, nne vakwaame va talyifite, nne Vangolyi. mmi mane vamwe vaavo kamu ve ihaye nne kuva vaambula. Ku zwaaho mane hape vamwi vaavo kamu kuva shimeha nne kuva kava mu mazuvo eenu e ituto, nne kuya vuva nyaandisa mu muzi nne muzi. ³⁵ Ku chitira kuti muwiirwa mulaandu woku itira malaha a jolola a ve itirwa mu inkaanda, ku taanga cha malaha a Avere kuya kwa Zakariya mwaana wa Barakiyasi, umu ve ihayiri ha kati ke itempere nne iziko lye zitavero. ³⁶ Cho kuizula nni mulwiirite, zoonse iizi zintu kazi iize zimu pangahalyire. ³⁷ Jerusalema, Jerusalema, uuwe yo wi ihaya vaporofita, mane nne ku ghovoola cha mavwe voonse vaka tumitwa kwaako, mmi nni saka vulye ku ikala nni nni ku vwiikiire vaana vaako mane iiri inkuku kutu kukwaana twaayo chiyi tu viika mu mavava, mmi ku zwaaho mu kaana! ³⁸ Mu vone, inzuvo yeenu muyi mu shaalyire che matoongo vulyo. ³⁹ Ka kuti nni mulwiirite, keeti nni muni vone hape, ku sika chini mwa a cho kuti, 'Kwiina mukoonde iiye yoo keeza mu izina lye Ireeza.'''