¹ Che iyweeyo inako Heroda wo mu Tetiraka nnaa zuwa choku iziveeka kwa Jeeso, ² Mmi nnaacho vahikaana vaakwe nnaati; Uuzu infwee nje Johani yoo koloveza; chaaka vuuka kuva fwiire; chiingi misevezi mikaando chiyi kweete kulyi toondeza mwaalyi. ³ Ka kuti Heroda a vaa manini waa woonda Johani choku mu viika mu intorongo che ivaka lyo mukulwaakazi wo mwaanche Filipo waava lyi seseri. ⁴ Ka kuti Johani ava mucho kuti, kaku shiyeeme mane ka heena cho mulao kuti umu sese. ⁵ Chiingaati amu ihayire iiyi indava, choku tiya vuungi vwa vantu, ka kuti chiva veezi kuti Johani muporofita. ⁶ Mmi mukiti wa mazaalo a Heroda chiinga waa sika, mwaanakazana wa Herodayasi choku va zaanina, mmi nnaa koonda Heroda[e]. ⁷ Choku pangahala kuti amu sepise choku lyi kana kuti mwaa muhe chimwe nne chimwe cheeti amu kumbiire. ⁸ Mmi iiye ka kuti chaava lwiiritwa nni vaanyina, kuti, muni viikire mutwi wa Johani mu impulyeeti. ⁹ Mmi simwiine nnaalyi nyaansa: nniha kuva vulyo che ivaka lye isepiso nne kulyi kana, mane nne ku chitira nnaavo vaa vee keere nnaavo he itaafulye, nnaa lawula kuti vaka wu mulyeetere. ¹⁰ Nnaa tuma kuti Johani aka kosolwa mutwi mu intorongo. ¹¹ Mmi mutwi waakwe nni wa ka lyeetwa nni wiina mu impulyeeti, cho kwiiza ku heewa kamwalye: iiye choku wu twaala ku vaanyina. ¹² Mmi varutwana vaakwe cho kuiza, choku hiinda muviri waakwe, choku ka wu wuunga, choku yeenda choku ka lwiira Jeeso. ¹³ Mmi Jeeso chiinga zuwa indava ya teni, choku zwa mu inkaanda ya teni, choku ichira chisepe, cho kuya ku inkaanda ye chikaka [chikwa] yiina kulyezana toota: Mmi vantu chiinga vaa zuwa kuti mu kwiina vulyo choku mu ichirira cha mateende nni vazwa mu mizi yaavo. ¹⁴ Mmi Jeeso nnaa zwiira ku valyi choku vona vuungi vuungi vwaavo, choku va fwiira a hulu inse, choku hoza valweere vaavo. ¹⁵ Mmi inako chiinga yaa yeenda, varutwana vaakwe choku iiza kwaalyi, choku mucho kuti iiyi inkaanda nje chikwa [chikaka] mmi mane nne izuva chilyi tenguha; vacho aava vantu va kwiiya kwaavo, kuti va woolye kuya mmu mizizana vaka lyi wulyire zoku lya. ¹⁶ Mmi Jeeso nnaa vacho kuti, kava lukeere ku katuka; nni mu seeni ku vaha zo kulya. ¹⁷ Mmi nniva mucho kuti, kana hahanu twiina vulyo chiinkwe [masikono] chi mana iyaanza, nne inswi zoo vere. ¹⁸ Nnaati, muzi lyeete kunu kwaangu. ¹⁹ Mmi nnaa lawula kuti vantu vee kalye haansi mu lyaani, choku hiinda chiinkwe chi mana iyaanza, mane nne nswi zoo vere, choku lola ku iwulu, nnaa ziha mikoonde, choku chamuna ziinkwe nnaha varutwana vaakwe, aavo nnavo nni vaaha vantu. ²⁰ Mpaaha vonse ha vaalya, choku ikuta: chiva kunganya vufwaafwaalyi choku manina vwe zuza ziviko zi lyikana ikumi nne zoo vere. ²¹ Mmi aavo va vaa lyiire ipalo yaavo yi vaalyi ku woonda miyaanda miyaanda yi mana iyaanza yava kwaame vulyo, nni ku saa valyiirwa vakulwaakazi mwa teni nne vahwiire. ²² Hoohwaaho vulyo lyiinu Jeeso nnacho varutwana vaakwe kuti va kee ichire chisepe, kuti va yeendere ku vusu kuya ku imwe imbalyi, chaa vaalyi kusii patalaza vantu kuya ku mizi yaavo. ²³ Mmi chiingaa patalaza vantu kuya kwaavo, iiye choku ya ku iruundu nneena yeeyeena nnaaka rapera: mmi chiinga kwaa tenguha, nna waanika vulyo nneena yeeyeena. ²⁴ Mmi lyiinu aaha chisepe iicho chichi vaalyi ku yeenda ha kati ke iwate, nni chi kaya vu kapantikiswa masuunda: Luuho lwa teni lu vaalyi lu kukuktu. ²⁵ Mmi mu inako yaka kusasani ku siri ku luunza che inako yo vunne Jeeso choku ya ku valyi, nnaa kaya vweenda he iwulu lya menzi. ²⁶ Mmi varutwana chiinga va muvona nnaa kaya vweenda hee wulu lya menzi mu iwate, choku lyi kalyilyirwa, nni vati, chipuku; choku shaala kwete [kete] valyi lyilyira vulyo muku tiya. ²⁷ Choku hweera mpaaha Jeeso haa vava waambisa nnaati, mulyi saante hape chiinzi, ka njeeme; mu siye ku tiya. ²⁸ Mmi Pitorosi nna mu itava nnaati, Simwiine haiva njoowe, nni chite kuti nnaame nni yeende he iwulu lya menzi nnini keeza kwaako. ²⁹ Mmi nnaati, wiize. Mmi Pitorosi chiinga suuka mu chisepe, choku yeenda hee iwulu lya menzi, nna kaya kwa Jeeso. ³⁰ Mmi chiinga vona luuho chilu huumpa, cho kulyi kalyilyirwa; choku taanga ku mina [kunywa tukope] choku kuwa, nnaati Simwiine nni haze. ³¹ Choku hweera hoohwaaho Jeeso choku mu tambika iyaanza, choku mu woonda, choku mucho kuti, ooh uuwe we itumero iniinizana, waa manina chiwaa vireerera nzi? ³² Mmi chiinga veeza mu chisepe, Luuho choku ziima. ³³ Lyiinu aavo va veena mu chisepe cho kuiza kuku murapera, nni vati, cho vusakusima uuwe nxu u [wu] mwaana we IREEZA. ³⁴ Chiinga vaka suuka lyiinu, choku iza mu inkaanda ya Ganesareta. ³⁵ Mmi vantu veeyo inkaanda chiinga vaa lyemuha kuti nkweena, nni vaa ngoombola ngoombola ku twaala mulaezawo kuti vaka lyeete vantu vaavo voonse va lwaala; ³⁶ Mmi choku mu kumbiira kuti kalyi cho uva zuminina vulyo ku woonda ijira lye chizwwato chaakwe: chanalyiingi [chanavuungi] vavaa woondi va vaalyi ku hola.