¹ Mu izuva lyi swana Jeeso nnaa zwa mu inzuvo, choku kee kala ku imbalyi yee wate. ² Ku zwaaho vantu vaangi choku taanga kumu kuungahanera, kuvaa chiti kuti mane aka taante mu chisepe, choku ikala; mmi vantu vaangi voonse nni va ziimeene he irizo. ³ Mmi nna waamba zintu ziingi naavo che ingulyi, naati, mu vone, mu viyaalyi avaa zwi choku ka viyaala; ⁴ Mmi chiingaa viyaala, zimwe intaanga nni zaa wiira kuumbalyi yee nzira, zizuni nni zeeza choku zilya: ⁵ Zimwe nni zeeza ku wiira mulu vweevwee, muku sana ku veena ivu lyiingi: hoohwaaho vulyo nni zaa mena, ka kuti keena ha veena ivu lyii chiire. ⁶ Mmi izuva chiinga lyaa taantuka, zimenaantu za teni choku vavuka; hape nne kuti keena zi veena mihisi, choku shaala zi swavite choku zuma. ⁷ Zimwe iizo nni zaa wiira mu miiya; miiya nnaayo choku kula, choku zitwa: ⁸ Mmi zimwe nni zaa wiira mu ivu ilotu [lyi shiyeeme], choku zwiisa zilyio, zimwe zilyio ziina miyandamiyanda, zimwe ziina makumi a mana iyaanza nne lyii mwiina, zimwe makumi oo tatwe. ⁹ Iiye yo wiina matwi a zuwe. ¹⁰ Mmi varutwana nni veeza, choku mucho kuti, chiinzi hoo waamba nnaavo che ingulyi? ¹¹ Iiye nnaa vee tava nnaati, ka kuti ku heerwa uunwe ku iziva indava zilyi wungwiire zo muvuso we iwulu, mmi ku valyi kava heerwa. ¹² Ka kuti zumwe nne zumwe yoo kweete, kaa weererwa, mane kaa wane vuungi: mmi zumwe nne zumwe yaa seena, kaa hiindirwa nne chimwew nne chimwe chaa kweete. ¹³ Lyiinu chiingi nni waamba nnaavo che ingulyi: ka kuti va vona mmi kava voni; va zuwa mmi kava zuwi, mane nne ku lyemuha mmi kava lyemuhi. ¹⁴ Mmi mu valyi ku izuzirizwa chiporofita cha Isaya, chiti, kuti, choku zuwa kamu zuwe, mmi keeti nni mu lyemuhe; mane nne ku vona kamu vone, mmi keeti nni mu lyitute: ¹⁵ Ka kuti inkulo za vantu zii zwiire ikwe, mane nne matwi aavo a kaangwa ku zuwa, mmi menso aavo naawo ee iyeere; ku chitira kuti saanzi nni kuvi inako iiyo chaayo yeeti nniva vone cha menso kamba ku zuwa cha matwi aavo, mane nne ku lyemuha che inkulo zaavo, mane kuti va saanduke, ku chita kuti nniva hoze. ¹⁶ Mmi vulyo, ku sehuheere menso eenu, ka kuti a vona: nne matwi eenu, ka kuti a zuwa. ¹⁷ Choku izula nni kucho kuti, vaangi vava porofita nne vantu va jolola va vaalyi ku lakaza ku vona zimu kweete ku vona, mmi mane ka heena [keena] vava zi voni; mane nne ku zuwa zoo zweezi zimu kweete ku zuwa mmi ka heena [keena] vava zi zuwi. ¹⁸ Mmi lyiinu mpaaho mu zuwe ingulyi yo muviealyi. ¹⁹ Zumwe nne zumwe haa zuwa mulaeza wo muvuso, choku saa wu lyemuha, mpaaha lyiinu ku iza yoo fosaheere, choku iza ku tootoola zoonse zaa viealwa mu inkulo. Yo wiina vuti njoozu yaava taambulyi imbuto choku wiira mu inzira. ²⁰ Mmi iiye woku taambula imbuto mulu vweevwe, yoo swana njeeye woku taambula lyinzwi choku saanga haa mana kulyi zuwa; ²¹ Njeeye yoo waanika keena mihisi mwaalyi, uva vulyo nenza lu vakazana; Ka kuti mulyiko nne ku nyaandiswa hazi taanga che ivaka lye IREEZA, kaa lyeehi ku taanga ku nyeerwa. ²² Mane nnaaye yoo taambula imbuto mu miiya njeeye yoo zuwa lyinzwi; mmi choku tokomera zintu ze inkaanda, mane nne ku ziyereha koku saka ku huma, ku hiinda choku tutumiza lyinzwi, mane muntu wa teni wu[u] manina nnaa seena zihantu. ²³ Mmi iiye yoo taambula imbuto mu ivu ilotu njeeye yoo zuwa lyinzwi, choku lyi lyemuha nenza; muku manina chikwaava nne zihantu, ha zwa, zimwe ziina mwaanda, zimwe makumi a mana iyaanza nne lyii mwiina, nne makumi oo tatwe. ²⁴ Nnaa waamba imwe ingulyi ku valyi hape iiti, Muvuso wok u iwulu u swana nne mukwaame yaava viealyi imbuto yii shiyeeme mu iwa lyaakwe: ²⁵ Mmi vantu chivaa sii lyeere, chira chaakwe choku iza ku vieala mukula mu mahira, choku lyi yeendera inzira yaacho. ²⁶ Mmi makova chiinga aa zwa, mane nne zihantu, mukula nnaawo choku lyi toondeza. ²⁷ Mpaaha vahikaana vaakwe hava veeza kumu lwiira kuti, simwiine, Aah keena uvaa viealyi imbuto yi shiyeeme mu iwa lyaako? Lyiinu mukula uka lyi zwiira kuhi? ²⁸ Nnaa vacho kuti, chira inji chivaa pangi vulyo. Lyiinu vahikaana choku mucho kuti, chiinzi hoo satu lawiiri [lawulyiri] kuti tuyende tuka pute? ²⁹ Mmi nnacho kuti, Eeh; Ka kuti ha mucho kuti muka nyukula mpoona chimu ka nyukula kwa teni nne mahira. ³⁰ Mu siye ku kulye haa mwiina mbwiita inako yoku siinza: mmi mu inako yoku siinza kani cho va siinza, mu kunganye mukula piri, cho tungata tungata kuti ze wu hiishwa: mmi mahira aawo mua kunganyeza mu chishete chaangu. ³¹ Choku valwiira imwe ingulyi hape nnaati, muvuso wok u iwulu u kola mane iiri lutaanga lwa kapuraanga, luti muntu chiinga alu hiinda, choku lu vieala mu iwa lyaakwe: ³² Uulo toota lu voneeka vuniini mu intaanga zoonse: mmi vulyo halu kula, iva isamu, lyi chita kuti, mane zizuni ze inkaanda ziiza choku iiza ku ikala mu mitavi ya teni. ³³ Nnaa waamba imwe ingulyi ku valyi hape, Muvuso woku iwulu wu[u] kola mane iiri chivirisa, mukulwaakazi chaa va hiindi, choku viika mu vusu voo tatwezana, mbwiita chiinga kwaa vira koonse. ³⁴ Jeeso nnaa waamba zoonse iizi zintu ku vuungi vuungi che ingulyi; kwaamba kwaakwe koonse nni yaava ingulyi ku valyi: ³⁵ Kuti chaava waambi muporofita chii zuzirizwa nnaati, kanii wulye kalomo kaangu mu ingulyi; Kanii waambe zintu ziti chiinga zi vaati ziku wungulwa inkaanda nniiyi seeni ku pangwa. ³⁶ Lyiinu Jeeso nnaa vacho kuti va kwiya, iiye choku injira mu inzuvo: mmi varutwana vaakwe nni veeza kwaalyi nni vati, Tulwiire ingulyi yo mukula we iwa. ³⁷ Nnaa vee tava nnaati, Iiye yoo vieala imbuto yi shiyeeme nje mwaana wo muntu; ³⁸ Iwa kuteewa inkaanda; imbuto yi shiyeeme kuteewa vaana vo muvuso woku iwulu ; mmi mukula nje vaana va yoo fosaheere; ³⁹ Mmi chira chiva wu viealyi nje Javulusi; ku siinza nje mamanimani ee yinu inkaanda. ⁴⁰ Lyiinu siina mukula hawu putiiwa choku hiishwa cho mulyiro; voovo vulyo mweeti nni kuve ku mamanimani ee yinu inkaanda. ⁴¹ Mwaana wo muntu kaa tuminize mangiloyi aakwe, mmi mane kava kunganyeza haanze lyo muvuso chimwe nne chimwe chi kupisa [chi nyeeza] nnavo va panga vuvilaala. ⁴² Kava hiinde choku ziindirwa mu ibiimbiro: Kaku kwiina ku wuunzula nne ku lyira inkuunkuma. ⁴³ Mpaaha lyiinu va shiyeeme aavo kava ku vereenga mane iiri izuva mu muvuso we ishaavo. Yo wiina matwi oku zuwa aa zuwe. ⁴⁴ Hape, muvuso woku iwulu wu kola mane iiri vuhumi vu wuungwiirwa mu iwa; vu chita kuti muntu haavu waana, uvu wuungula toota, cho vuitumero [kusaanga] u yeenda choku ka wuza zoonse zeena nnaazo, choku iiza ku wula iilyo iwa. ⁴⁵ Hape, muvuso woku iwulu wu kola mane iiri muntu yo wiikala nna Ghana mavwe malotu, nnaa saka malotu toota: ⁴⁶ Yoo chita kuti, haa aka waana ivwe lyimwiina lyi dura, choku yeenda choku ka wuza zoonse zeenna nnaazo, choku kalyi wula. ⁴⁷ Hape, muvuso we iwulu wu kola mane iiri kanyandi, ka vaa soherwa mu iwate, choku ka woonda inswi zoonse: ⁴⁸ Ku chita kuti chiinga kee zula, choku ka kwiitira hee irizo, choku ikala haansi, choku taanga ku salyira [topera] mu kasuva zijolola, mmi imbilaala cho kuzi vukuntira kuungi. ⁴⁹ Voovo vulyo mweeti nni kuve ku mamanimani e inkaanda: Mangiloyi ka eeze, ku kauhanya vavilaala kuva shiyeeme. ⁵⁰ Mmi kava va sohere mu imbawula yo mulyiro: kweeti nniiku kwiina chilyiro nne inkuunkuma. ⁵¹ Jeeso nnaa vacho kuti, Aah mmi chimwaa lyemuha zoonse iizi zintu? Nni vaa muitava nni vaati eeni [ee] simwiine. ⁵² Lyiinu iiye nnaa vacho kuti, mpaaha lyiinu kuti mungolyi zumwe nne zumwe yoo rutitwa chozo [chezo] muvuso woku iwulu ku kola mane iiri infumwe we inzuvo, yo woola ku zwiisa mwa teni zintu zi kulukulu nne zintu zi hiya. ⁵³ Mmi nni kweeza ku pangahala kuti, Jeeso chiinga mana iizi ingulyi, nnaa lyi yeendera. ⁵⁴ Mmi lyiinu chiinga eza mu inkaanda yaakwe, nnaa varuta mu mazuvo aavo e ituto, muva vaalyi ku shaala nniva zasi nne k uvula mate mutulomo, nni vati, uuzu unkosi aa maano uka a waana kuhi, mane nne misevezi iiyi mikaando vuti? ⁵⁵ Aah veesi ka mba vamapuraanga? Mane nne vaanyina ka mba vaMariya? Nne vaache ka mba vaJaakovo, nne Josese, nne Sayimoni, nne Judaasi? ⁵⁶ Nne vanchiishje voonse aah ka twiina naavo? Lyiinu iiye uuzu unkosi iizi zoonse uka zi waana kuhi? ⁵⁷ Mmi nnaava kupa maaswe: Jeeso iiye nnaa vata kuti, muporofita inako zoonse vulyo wuikala nnaa kutekeha mbwiita vulyo mu inkaanda yaazwa mu ilyi nne muirapani lyaakwe mwaasa heewa/waani ikute kamba ku kutekwa. ⁵⁸ Mmi nnaa vula ku panga zi komosa ziingi kwa teni che ivaka lyoku saa zumina kwaavo.