¹ Che iiyo inako Jeeso naa hita mu luwa mu luzuva lwe inSavata mmi varutwana vaakwe ni va fwiire inzala, cho ku taanga ni va choola vuheke ni va lya. ² Mmi Vafarasayi chiinga vaa vona vulyo cho ku mu cho kuti, koo u vone varutwana vaako va kweete ku chita chisaa swaneezi ku chitwa lwe inSavata ku ya cho mulawo. ³ Mmi naa va cho kuti, Ka heena mu vaa valyi cha ava pangi Daafita, cho u fwiire inzala, naavo vaa veena naavo? ⁴ A vee njiri mu inzuvo yee Ireeza cho ku kalya chinkwe cha ha vusu, chaa sana a vaa swaneezi ku lya mane ni chi saa zumininwa ku vaa valyi ku kaya vu yenda naavo mbwiita vapurisita? ⁵ Kamwiini ku vala mu mulao, kuti lwe inSavata vapurisita va choola inSavata mu itempere mmi ka veena mulandu? ⁶ Mmi ni mu cho kuti, mukaando ku zamba itempere zunuu. ⁷ Mmi kalyi mu va izivite kuti ichi chi tarusa nzi, ''Ni saka inse vulyo kwaanda e chitavero, ni mu sana mwaa tovosa vantu va seena mulandu. ⁸ Ka kuti Mwaana wo Muntu nje Simwiine hape we izuva lye inSavata. ⁹ Mmi chinga a zwa uko, cho kuya ku iSinagoge ¹⁰ Mmi vone mukwaame we iyanza lyi zuminiine.Vafarasai cho ku vuusa Jeeso kuti '' Aa ku zuminiinwa mu mulao ku hoza lwe inSavata?'' kuti va woolye ku mu kaya teni. ¹¹ Mmi nnaa vati, Yi woola kuva njeeni mukwaame mukati keenu, yoo chita kuti neena imberere yiimwiina, mmi cho ku ka wiira mu chisima lwe inSavata, aa keeti choo u ka yi woonda cho ku yi zwiisa? ¹² Ka munahane lyinu kuti muntu iiye wiina musula u sika hayi ku zamba imberere? Chinngi lyiinu ku lukite ku panga chi shiyeeme lwe inSavata. ¹³ Iiye lyinu mpwaa teerere uzu mukwaame, vungunune iyanza lyaako, mmi naa lyi tapulula; mmi cho ku voozekezwa, mane iri nje lyimwi. ¹⁴ Ku zwaaho Vafarasayi ni vaa yeenda, cho ku kee kala chikota ka haakwe, kuti mpohona chi va mu ihaya vulye. ¹⁵ Mmi lyinu Jeeso chingaa lyemuha, cho ku zwa kwa teni, cho ku ya kuungi. Mmi vantu vaangi ni va mu ichirira mane naa va hoza vonse; ¹⁶ Cho ku va kumbiira kuti sanzi ni va mu izivahaza: ¹⁷ Kuti ku woolye ku pangahala chi vaa wambwa ne muporofita Isaya cho uti, ¹⁸ Hoo vone muhikaana waangu, u ni vaa lyiketeri; uni suni, iiye wo luhuho lwaangu mulu lyitumera: Kani viike luhuho lwaangu mwaalyi, mane kaa zwiisa ikatulo ku vee inkanda. ¹⁹ Keeti naa toondeke, nangati ku huwa; mane nandi muntu yeti naa zuwe lyinzwi lyaakwe mu nzira ka a kwiina. ²⁰ Ne luhe lu nguzuvukite keeti naa lu choolye, mane ne ikaandera lyi saka ku zima keeti naa lyi zime, ku chita zo ku hite ikatulo ku ku zunda. ²¹ Mmi mu izina lyaakwe njeeti ni ku ve ne isepo ya vantu ve inkanda. ²² Lyinu cho ku lyeeterwa yaave njiirwa idimona, naa saa voni mane ne ku wamba: mmi naa mu hoza, mpaaha haa taanga ku vona ne ku waamba. ²³ Mmi vantu vonse ni vaa shaala va komoketwa, ni vati, Aa uuzu iwoola ku va iiye mwaana wa Daafita? ²⁴ Mmi Vafarasayi chinga vaa zuwa, ni vaati, uuzu muntu kaa zwiisa madimona, mbwiita cha simwiine wa madimona, Bilizebule. ²⁵ Ka kuti Jeeso a veezi minahano yaavo, naa vati, muvuso umwi ne umwi ulyi lwiisa ka wuwe; mane nne umwi ne umwi muzi nandi inzuvo ilyi lwiisa keeti ni yi ziime: ²⁶ Lyinu haiva Saatani u lyi woonda cho ku lyi vukuntira kuna mwiine, u lyi lyi patalalyeza; muvuso waakwe lyinu ka wu ziime vulye? ²⁷ Haiva kuti lyinu ime ni zwiisa madimona cha Bilizebule, vaana veenu aavo va zwiisa chaani? Cho kuva vulyo ka va ve vawatulyi veenu. ²⁸ Mmi lyinu haiva ni zwiisa madimona cho luhuho lwe Ireeza, lyinu aho muvuso we Ireeza u mu sikiire. ²⁹ Kamba lyiinu, muntu kee njire vulye mu inzuvo yo muntu yoo kolyete, cho ku hiinda zivya zaakwe, ka mbwiita haa musumina? Lyinu njeeti cho u woola ku hinda zivya zaakwe mu inzuvo. ³⁰ Iiye yaa seena naame u ni lwiisa; mane naaye yaa saa kunganya naame u ni patalalyeza. ³¹ Chinngi ni mucho kuti, zivi zonse ne mutukano wonse ka zi wonderwa vantu: mmi mutukano u lyi lyivaheenywa ne Luhuho lu Jolola keeti ni ku ve ne ku woonderwa ko muntu mwa teni. ³² Mmi zumwi no zumwi yoo u wamba vuvilaala cha Mwaana wo Muntu, kaa woolye ku wonderwa: mmi iiye yeeti naa wambe lyinzwi lyi saa shiyeeme ku Luhuho lu Jolola, keeti naa wonderwa, nangati mwe iyinu inkanda nandi mu ikeeza. ³³ chisamu kuti chi shiyame ne zihaantu zaacho zi shiyame,nandi pange chisamu kuti chi viihalye ne zihaantu zaacho zi viihalye, mukuti isamu lyi izivwa che zihaantu zaalyo. ³⁴ Uunwe mu vaana ve inzoka,mu kuti mu va vilaala,mu woola vulye ku wamba zintu zi vilaala. Mu kuti mu vunngingi vwe inkulo kalomo ka wamba ni ku zwa mukati. ³⁵ Muntu yo u shiyeeme ku zwa mu maviikiro a shiyeeme e inkulo yaakwe u zwiisa zi shiyeeme, ne muntu ya a saa shiyeeme ku zwa mu maviikiro a saa shiyeeme e inkulo yaakwe u zwiisa vuvilaala. ³⁶ Mmi ni mu cho kuti, lyimwi ne lyimwi lyinzwi lyo ku lyi waambira vulyo lyeeti naa wambe muntu, kaa lyiitavire mu lusiku lwe ikatulo. ³⁷ Mu kuti, cha manzwi eenu mu keeza ku shiyamiswa mane cha manzwi eenu mu keeza ku zekiswa. ^{40 38} Mpaaha vamwi va vangolyi ne Vafarasayi cho ku itava, ni vati, ''Muruti, tu saka ku vona chishupo chi zwa kwaako. ³⁹ Mmi Jeeso a va itavi naa va cho kuti, ''' Luzuvo lu sanguheere lu saka chishupo.Mmi ka kwiina chishupo cheeti ne chi heewa kunze lyeecho cha muporofita Joona. ⁴⁰ Mukuti sina Joona haa veena mu ivumu lye inswi inkando mazuva oo tatwe ne masiku oo tatwe, ne Mwaana wo Muntu naaye kaa ve mu inkulo ye inkanda mazuva oo tatwe ne masiku oo tatwe. ⁴¹ Vantu va Ninive ka va ziime mu ikatulo no ulunu luhasi cho ku lu nyansa. Mu kuti aavo vava woolyi ku lyi nyansa Joona cho u kutaza ku valyi,mmi mu vone , mukaando kwa Joona zunuu hanu. ⁴² Naarukazi yoo u zwa kuka haati ka mamonso kaa ziime ku ikatulo ne vakwaame voo lunu luhasi, cho ku va nyansa. A va ka zwi ku mamanimani e inkanda ku iza ku zuwa vutalyi vwa Solomoni, mmi mu vone mukulwaana kwa Solomoni zunuu hanu. ⁴³ Luhuho luvilaala ha luzwa mu muntu, lu hita mu seena menzi ni lu kaya vu saka ha lu woola ku huuza mmi cho ku sa ha waana . ⁴⁴ Ku zwaaho cho ku lyilwiira kuti, ''Mu ni voolye ku inzuvo yaangu kuni va kazwi.' Mu ku ka voola lu waana inzuvo chi i vaa kulwa mane chi i viikitwa nenza. ⁴⁵ Lu voola, cho ku ka hinda vamwaateni va kavalo ka mana iyaanza ne too uvere va vilaala ahulu ku lu zaamba,ku zwaaaho zikeezo ku ikala mwa teni zonse.Ku zwaaho chiziimo cho uzo muntu cha mamanimani chi viihala ku zamba lwe ntaanzi. Mweeti ni ku chitahalyire lunu luhasi lu vilaala. ⁴⁶ Cho u sii kweete ku wamba ne vantu, mu vone, vaanyina ne vanche va vaa ziimi hanze ni va saka ku wamba naaye. ⁴⁷ Umwi cho ku mu cho kuti, ''Vone vannyoko ne vanche vaako veena hanze, va saka ku waamba naawe.'' ⁴⁸ Mmi Jeeso naa itava cho ku cho yaa a va mu lwiiri kuti, ''Vammayo nje vaani? Ne vanchevaangu nje vaani?'' ⁴⁹ Mmi naa vungununa iyaanza lyaakwe cho ku toondeka varutwana vaakwe cho kuti, mu vone vammayo ne vanche vanngu! ⁵⁰ Ka kuti iini ne iini vulyo yeeti naa pange ku suna kwa Taayo yo wiina ku iwulu, yooyoozo nje mwanchangu ne nchiizhangu ne vamm ayo