¹ Lyiinu nni kweeza Vangolyi nne Vafarasayi niveeza kwa Jeeso niva kazwa kuzwa kwa Jerusalema. Nni vati, ² Chiinzi varutwana vaako hava choola mulao wa vakulwaana? Ka kuti kava saambi ku mayaanza. Jeeso nne itava naati. ³ Mmi nnaa vee tava nnaati, mmi lyiinu uunwe nnaanwe chiinzi hamu choola mulao we Ireeza che chizo cheenu? ⁴ Ka kuti Ireeza a vawaanbi naati, kuteke veeso nne vaanyoko; mmi iiye a saa waambi vulutu che vaanyina ne veesi , chivu sakusima kaafwe. ⁵ Mmi mucho kuti, zumwe nne zumwe yoo cho veesi nne vaanyina, imwi ni imwi ituso yo vaatambolyi ko zwa kwaangu lyino ne mpo izwa kwe Ireeza. ⁶ uzu muntu ka swanerwa ku kututeka veesi. Che inzira molyi tokomulyesa lyinvwi lyi Ireeza che ivaka lye chizo cheenu. ⁷ Uuye Vaitimukanyi , lyaaho Isaya avaa porofiti cheenu cho uti. ⁸ Aava vantu vante temba vulyo cha kalomo mmi inkolo zaavo ziina kulye naame. ⁹ Vani rapera vulyo, mane nni valyi rutira vulyo mulaezo o milao ya vantu. ¹⁰ Mmi naa sumpa vuungi vuungi, choku vacho kuti, mu zuwe mane mu lyemuhe: ¹¹ Chiinjira cha kalomo kachi sirafazi muntu; mmi mbwiita iicho chizwa cha kalomo ko muntu nji chi musirafaza. ¹² Mmi varutwana vaakwe nni veeza nivaa choku cho Jeeso, aah mane wiizi kuti Vafarasayi va kupeha, chiinga waa waamba iiyi indaava.'' ¹³ Jeeso nne tava naati, chimwe nne chimwe chivyalo VaTaayo chivasana vaa vyaalwa nneTaayo kazi nyokolwa. ¹⁴ Muva siye voo voona, vahitizi va sa vone. Cho kuti muntu asaa vone nna hitiire zomwi muntu, voonse kava ka wire mu ikoomba.'' ¹⁵ Pitorosi naa mu itava naati, tu lwiire ingulyi. ¹⁶ Mmi Jeeso naati, ''naanwe hape lyaaho ka muiizi? ¹⁷ Ka mwiini ku vona kuti chimwe nne chimwe chiinjira cha kalomo chi hita mu ivumu, mane chi kazwe. ¹⁸ Mmi iizi zintu zizwa cha kalomo zi kazwa munkulo. Mane zi manina chizaa sirafaza muntu. ¹⁹ Ka kuti kuzwa mu nkulo, kuzwa minahano mivilaala, ku ihaya, vunyaze, vuhuulye, vusa, ku haambiriza, nne ku tukana. ²⁰ Zoo zweezi nje zintu zi sirafaza muntu. Mmi kulya cha maanza a saa saambite kaku sirafazi muntu. ²¹ Mmi Jeeso nnaa zwa kwa teni, naaya mu zisi ziva Ture nne Sidona. ²² Mmi vone, mukulwaakazi wa Kanana nni kwaa zwiira chisi. Choku huwa naati, nni fwiire inse, uuwe Simwiine, mwaana wa Daafita; mwaana waangu wii njiirwa idimona. u ²³ Mmi Jeeso naa vula kumu itava naangati kaniini. Mmi varutwana vaakwe nni veeza kumu kumbiira nni vati, mu hindike, u kwiite kuto tolyiya. ²⁴ Mmi Jeeso netava naati, nni ka tumitwa vulyo ku imberere ze inzuvo ya Isiraere vulyo. ²⁵ Mmi nneeza kumu fukamina choku murapera nnaati, simwiine nni tuse.'' ²⁶ Mmi nne tava chokuti, Kaku shiyeeme kuti nni hiinde zilyo za vahwiire choku ziha vaambwazana.'' ²⁷ Mmi nne tava kuti,'' vusakusima, Simwiine, mmi niha kuva vulyo vambwazana vati nni va tootoola tufwaafwaalyi twii kala nni tuwa hee taafulye yivaa mfumwaavo.'' ²⁸ Lyiinu Jeeso nne tava choku mucho kuti, mukulwaakazi, itumero yaako inkaando. A kuku pangahalyire kuya cho moo sakiire.'' Mmi mwaana kazana waakwe nnaa hozwa cheeyo inako. ²⁹ Mmi Jeeso nnaa zwa uuko cho kuya ku iwate lya Galaliya; cho kuya ku iruundu, choku kee kala kwa teni. ³⁰ Mmi vuungi vuungi vwa vantu choku keeza kwaalyi, nni va keeza nne vachuunkuta, vasaavoni, vasaawaambi, vakosokete maanza nne mateende, nne vaangi vaangi vaalyi ko lwaala. Vava lyeetwa ha mateende a Jeeso, mmi nnaa va hoza: ³¹ Vungi vwa vantu va va shaalyi ni va komoketwa vonse, choku ku vona zimumu nni zi waamba, veena vuholye vava shiwamisha , vachuunkuta nni vashiyama cho kuyeenda nenza, nne vasaavoni nni va taanga ku vona, mmi nni vaa teemba Ireeza wa Isiraere. ³² Jeeso nnaalyi sumpira varutwana vaakwe kwaakwe naati, ''Vati nni fwiiriire aava vantu inse, ka kuti chi vaa hiinda nnaame hanu mazuva oo tatwe, mmi ka veena cho kulya. Mmi mane keeti chini vapatalaza che inzala vovuti, ka kuti va woola ku zuminina mu nzira. ³³ Mmi varutwana vaakwe choku mucho kuti, ''Nkukwihi ku tu woola kuka hiinde kuhi zinkwa mwee chinu chikaka zi chita kuti tu woolye kuva lyiisika voonse aava?'' ³⁴ Mmi Jeeso nna vacho kuti, ''mwiina zinkwa zoolye?'' Mmi nni vaati, zimana iyaanza nni zoo vere, ku zwaaho nne tuswiizana tuniini vulyo.'' ³⁵ Mmi nnaa lawula vuungi vwa vantu kuti vee kalye haansi mu ivu. ³⁶ Mmi nnaa hiinda zinkwa ziina ku mana iyaanza nne zoo vere nne tuswiizana, chingaa mana ko raperera ko kolyi tumera, nna gamuna cho kuha varutwana vaakwe. Mmi varutwana nni vaa ha vantu. ³⁷ Mmi voonse nni vaa lyaa mane cho ku ikuta. Mmi choku tootoola tufwaafwaalyi tu vaa manini twee zuza magweetere a mana iyaanza nne oo vere. ³⁸ Mmi aavo va vaalyi nni yaava vakwaame veena miyaanda yiina makumi oonne kwaandaa vakulwaakazi nne vahwiire. ³⁹ Mmi Jeeso nnaa vacho kuti voolye mmi iiye nnee chira chisepe nna kaya inkaanda ya Magadala.