^{1 2} Ni wamba vusakusima mwa Kiristi. Ka ni chengi, mane chiziyululyi changu chiha vushupi naame mu Luhuho lu Jolola, kuti kwangu kwina kulyira kukulu ne kusasaminwa kusamani mwi inkulo yangu. ^{3 4 5} Mukuti niva kuwola kuyereza kuti ime kahavuahangu ni kutiwa ne kusalyirwa hembalyi kwa Jeso cheivaka lya vakweetuchiswisu, avo ve murahi wangu kuya chechinyama. Va Isiriyala. Veena kusalwa, iverengo, itumarano, inewo ye mulawo, kurapera Ireza, ne isehuhazo. Zavo vuzazi Kirisiti kwa vazwi kuya chechinyama-iye yalyi Ireza ku vonse. Ka tembiwa kusamani. Ameni ^{6 7} Mi ka hena sina iri isehuhazo ze Ireza zi vakangwa. Mukuti ka hena umwi ne umwi mwa Izirayele yo zwa kwa Izirayela. Nehaiva vonse vaalyi imbuto za Aburahama valyi vana vakwe vo vuniti. Mi, '' Inje che cha Isaka vana-va-vana venu yeeti ni va sumpiwa chakwe.'' ^{8 9} Injo kuti, vana ve chinyama ka hena vana ve Ireza. Mi vana ve Isuluhezo va hindwa siina vana-va-vana.Mukuti ichi nje linzwi lye isuluhero: '' Che iyinu inako ka niize, mane mwanaswisu ka hewa Sara.'' ^{10 11 12 13} Insini ichi vulyo, mi kuzwaho Rebeka naye ava imiti cho mukwame umwina, ishetu Isaka-mukuti vawire ka hena va veeni kuzaalwa mane ka hena va veeni kuchitanzi chishiyeme nandi chivilaala, vulyo kuti kusuna kwe Ireza kuya che kusala kuve ni ku ziima, insini cheivaka lye misevezi, mi cheivaka lyakwe yo sumpa- ku va wambiwa kwa alyi, '' Mukulwana ka tendere munini. '' Kwina vulyo siina mu ku va ngolwa: '' Jakovo uni va suni, mi isawo ni vula ku musuna. '' ^{14 15 16} Ka tu wambe inzi lyinu? A kwina kusashiyama kwe Ireza? Sa nzi kuvi. Mukuti u cho mushe, '' ka nive ne inse kwaalyi yeeti ni nive nense kwaalyi, mane ka nive ne kuzuwira inkulo vutuku kwaalyi yeeti ni nive ne inkulovutuku. Lyinu vulyo, ka hena cheivaka lyakwe yo suna, nandi cheivaka lyakwe yo ngombola, mi cheivaka lye Ireza, yo tondeza inse. ^{17 18} Mukuti mungolo ucho Faro, '' Che ilyi ivaka ni va ku vusa, vulyo kuti ne woolye ku shupa inunuho mwa ako, ne vulyo kuti izina lyaangu lye woolye ku haswa mwi inkaanda yonse.'' Lyinu vulyo, Ireza wiina inse kwalyi ya yereza, ne kwalyi yo yereza, u mu kukutuhaza inkulo. ^{19 20 21} Lyinu ka mu niti, '' Chinzi ha si saka mafosisa? Mukuti injeni ya va kani ku suna kwaakwe? Kwi mbalyi imwi,muntu, njo weni yo wi tavinsana ne Ireza? A chi va vumbiwa ka chicho yo chivumba, '' Chinzi ha u va ni vumbi cheyi inzira?''A muvumbi kena iswanero ha irengo ku chita chigwetere cho mutendo u hapehete kuzwa mwi irengo lyiswana, ne chimwi chigwetere chitendeswa mazuva onse? ^{22 23 24} Haiva Ireza, yo sunite ku tondeza vukalyi vwaakwe ne ku chita inunuho yaakwe iziviwe, a valyi wondi che inkulo inde zigwetere ze vukalyi zivakanyezwa kusinywa? Chinzi haiva mwendi a va chiti ichi mu kuchitira kuti a woolye ku zivisa vuhumi vwe iverengo yaakwe ha zigwetere ze inse, za va vakenyeza iverengo? Chinzi haiva mwendi a va chitiri ichi uswe, va va sumpi, inseni kuzwa mukati ka Vajuta, mi ne kuzwa mukati ka vahedani? ^{25 26} Siina mwa wamba naako mwa Hozaya: '' Ka ni va sumpe vantu vangu va sena va vaalyi vantu vangu, ne vasunwa vakwe va sena va vasunitwa. Mane ka kuve kuti ha va tewa, '' Ka hena mu vantu vangu,' aho ka va sumpiwa' vanaswisu ve Ireza yo hala.'' ^{27 28 29} Isaya u lyira kaha Vaisirayela, ''haiva kuvalwa kwa vana va Isirayela ku vaku swana siina ivu lye iwate, ka ive vasheere veeti ni va hazwa. Mukuti Simwiine ka twaalye linzwi lyaakwe mwi inkaanda, hohanu ne konse. Mane kwina siina Isaya mwa va wambi intanzi, '' Haiva Simwiine we vungi ka hena a va tu siyiri imbuto kumasulye, ne tu vavi siina Sodoma, mane ne ku swana ne Gomorrah. ^{30 31} Ka tu tinzi lyinu? Kuti Vahedani, va sena va vwimine kushiyama, va vahindi kushiyama, kushiyama che itumero. Mi Isirayela, ya va hindikite mulawo we kushiyama, ka hena a va siki ku ulyi. ^{32 33} Chi nzi? mukuti ka hena va va u hindiki che itumero, mi che misevezi. Va va chunchuni he ivwe lyo ku chunchuna, siina mu ku va ngolwa, '' muvone, mi zandide mwa zayona ivwe lye kuchunchuna ne ivweikando lye mulaandu. Iye yo zumina mu lyi lyi keeti na swave.''