^{1 2} Lyinu hanu ka kwina iwatulo kwa avo veena mwa Kirisiti Jeso. Mukuti mulawozana we luhuho lwe vuhalo mwa Kirisiti Jeso u va ni hululyi ku mulawozana we chivi ne lufu. ^{3 4 5} Mukuti mulawo chu sena u valyi kuwola ku chita mukuti u va vulyiteziho che inyama, Ireza a va chiti. A va tumi Mwanaswisu wakwe mu chiswano che inyama ye chivi kwiza ku va chitavero che chivi, mane na watula chivi mwi inyama. A va chiti ichi ku chitira kuti mulawo zu saka zi ve ni zi chitahazwa mweetu, uswe tu sa yendi kuya che inyama, mi kuya che luhuho.Avo va hala kuya che inyama va teekesa zintu ze inyama, mi avo va hala kuyache luhuho va teekesa zintu ze luhuho. ^{6 7 8} Mukuti ingana ye inyama lufu, mi ingana ye luhuho vuhalo ne ikozo. Ichi ivakalye kuvihere Ireza kwe ingana ya inyama, mukuti ka yi lawulwa ne mulawo we Ireza, Nangati ku woola kuva. Avo veena mwi inyama ka va wollyi ku sangisa Ireza. ^{9 10} nehakuvavulyo, ka mwina mwi inyama mi mu luhuho, haiva niiri vusakusima kuti Luhuho lwe Ireza luhala mwenu. Mi haiva umwi na sena luhuho lwa Kirisiti, ka hena wakwe. Haiva Kirisiti wina mwenu, muviri ufwire mwi imbalyi ye chivi, mi luhuho luhala mwi imbalyi ye kushiyama. ¹¹ Haiva luhuho lwakwe a va vuusa Jeeso mu vafu luhala mweenu, iye ya va vusa Kirisiti kuzwa kwavo vafwire kahe vuhalo miviri ifwa yeenu nayo che Luhuho lwakwe, yo hala mukati kenu. ^{12 13} Lyinu vulyo, vakwangu-chiswisu, tu korota, mi insini kwe inyama ku hala kuyache inyama. Mukuti haiva ne muhala kuyache inyama, mu yendere kufwa, mi haiva che Luhuho ne mu twaala misevizi ye miviri ku lufu, ka mu halye. ^{14 15} Mukuti sina chinavungi havu hitirwa ne Luhuho lwe Ireza, ava vana-swisu ve Ireza. Mukuti ka hena mu va tambulyi luhuho lwe kuwondwa kuvolyera vulyo mu ku tiya. Kunzelyovulyo, mu va tambulyi luhuho lwe kuhindwa, lu tu lyira chalo, '' Abba, Tayo!'' ^{16 17} Luhuho ka ha vuhalo vuha vushupi ne luhuho lweetu kuti tu vaana ve Ireza. Haiva ne tulyi tu vaana, lyinu tu valyavuswa,valyavuswa ve Ireza. Mane tu kopanere vulyavuswa ne Kirisiti, haiva vusakusima tu nyanda naye vulyo kuti tu ve ne tu tembiwa naye naswe. ^{18 19} Mukuti ni wana kuti manyando eyinu inako ka swanerwa ku swaniswa ne iverengo yeeti ne twi isenwiirwa. Mukuti ku suluhera kwe zivumbatu kuzimaniine ku tondezwa kwa vana-swisu ve Ireza. ^{20 21 22} Mukuti zivumbantu zi va twaalwa kuku vulamusula, insini kwe kusuna kwazo, mi kwa akwe iye a va ku twaalyi. Kwi ina mwi isepiso ikolyete kuti zivumbantu ka zi hazwa mu vuhikana vo kuvola, mane ne kuti ka zi lyetwa mu ku sumunuka kwe Iverengo ya vana ve Ireza. Mukuti twi izi kuti zivumbantu zonse zisanda ne ku zalyira mu zitavi hamwina nangati nahanu. ^{23 24 25} Insini icho vulyo, mi nangati uswe, twi ina zihantuntanzi ze Luhuho-naswe kahavuhetu tu sandasanda mukati keetu, kuzimanina kusalwa kweetu, kuvulukwa kwe muviri yeetu.Mukuti choku kukola tu va hazwa. Mi chetu koziza ka chichitahalye ka chiini ku vonwa, mukuti njeni yo zimanina cha va voni na kolyete? Mi haiva ne tu kolyete ka ha che tu sa voni, lyinu tu chi zimanina che inkulwende. ^{26 27} Mwi inzira i swana Luhuho naalo lu tusa mu kusakola kweetu. Mukuti ka twizi mu tu lukere kurapera, mi Luhuho kahavuhakwe lu tu raperera che misando isataluswa. Iye yo sakisisa inkulo wizi ingana ye Luhuho, mukuti u raperera mu mazimo a varumere kuya che kusuna kwe Ireza. ^{28 29 30} Twi izi kuti kwavo va suni Ireza, u chitira zintu zonse hamwina kushiyama, kwa avo va sumpitwa kuya che kusaka kwaakwe. Mukuti avo va vezi, a va twaalyi mu kuva mu chiswano cha mwana-swisu wakwe, kuti a ve mwanantanzi mukati ka vanaswisu vangi. A vo va va twaalyi, ava a va sumpi naavo. Avo va va sumpi, ava naavo a va vashiyamisa. Avo va vashiyamisa, ava a va va nyemuni naavo. ^{31 32} Mu tu wambi inzi lyinu kaha izi zintu? Haiva Ireza naalyi weetu, injeni yolwa naaswe? Iye ya sena ava ngameri mwana-swisu wakwe mi a va mu lyeeti mu mazimo etu tu vonse, ka vulye vulye chaakwe ku tuha zintu zonse? ^{33 34} Injeni yeeti na lyeti kuhambizwa kumbalyi ya va salyitwa ne Ireza? Ireza injeyena yo shiyamisa. Injeni yeeti na watulye? Kirisiti injeyena a va tufwiri, mane ku zamba aho, a va vuuswa. U vusa ne Ireza mu chivaka che kukutekwa, mane injeyena yo tu raperera. ^{35 36} Injeni yeeti na tu kawuhanya ku chishemo cha Kirisiti? Milyiko, nandi manyando, nandi kafulo? Vulyo sina mu ku ngolyetwa, '' Che kuvulyerwa kweenu twi ihayiwa lusuku lonse. Tu va hindwa siina imberere zi ku ihayiwa.'' ^{37 38 39} Mu zintu zonse izi tu zambite va wolyete che iye a va tu suni. Mukuti che ni va tomamisa kuti nihaiva lufu,nandi vuhalo, nandi mangiloyi,nandi mivuso, nandi zintu zihanu, nandi zintu zi keeza, nandi ziho, nandi vulye, nandi kunsi, nandi nihaiva chintu chimwi chivumbitwa, ka chi wolye ku tu kawuhanya ku chishemo che Ireza, chiina mwa Kirisiti Jeso Simwine weetu.