¹ Nandi ka mwizi,vakawangu-chiswisu(mukuti ni wamba ne vantu veezi kaha mulawo), kuti mulawo u lawula muntu ku vona u si hala? ^{2 3} Mukuti mukulwakazi yo sesetwa u sumwinwa ne mulawo kwa mwihavwe cho u sihala, mi haiva mwihavwe nafwa, u hulwirwa ku mulawo we iseso. Lyinu vulyo, mwihavwe cho u sihala, haiva ne ikala ne unkosi umwi, mwave ku sumpiwa ihulye. Mi haiva mukwame nafwa, u hulurwa ku mulawo, lyinu ka hena ihulye haiva ne ikala ne unkosi umwi. ^{4 5} Lyinu,vakwangu-chiswisu, mu va chitwa naanwe vafwire ku mulawo che muviri wa Kirisiti. Ichi china vulyo kuti ne mu wolye ku kopanywa ko umwi, njo kuti, kwalyi ya va vuswa kwavo va fwire, mu kuchitira kuti ne tu zwisa chihantu kwe Ireza. Mukuti chetu siina mwi chinyama, iyerezo ze chivi zi va munikiwa mu vamwi veetu cho mulawo ku zwisa chihantu ku lufu. ⁶ Mi hanu tu va hululwa ku mulawo. Tu vafwi kwe cho che tu va wondetwa chacho. Ichi china vulyo kuti ne tu wolye ku tendera mu ku zhahazwa kwe Luhuho, ne insini mu vukulukulu kwe mungolo. ^{7 8} Ka tu wambe inzi lyinu? A mulawo ka ha vuhawo chivi? Sa nzi kuvi. Nehaivavulyo, Ni ni sena ni ve zivi chivi, haiva ka lyi ni sena ivalyi cho mulawo. Mukuti ni ni sena ni ve zivi ku lakaza kwande mulawo ha u vati, '' ko lukere ku lakaza. '' Mi chivi chi va hindi chivaka cho mulawo ne ku lyeeta ku lakaza kumwi ne kumwi mwa ngu. Mukuti kunze lye mulawo, chivi chi fwire. ^{9 10} I mwi inako Ni vaalyi ku hala kunze lye mulawo, mi mulawo hanga weeza, chivi ni cha volyerwa vuhalo, ni nafwa. Mulawo u va kulyeeta vuhalo ni wa sanduka kuva lufu mwangu. ^{11 12} Mukuti chivi chi va hindi chivaka che mulawo ne ku ni ziyeza. Che mulawo ni cha nihaya. Lyinu mulawo u jolola, ne mulawo u jolola, ushiyeme,ne vulotu. ^{13 14} Lyinu a chishiyeme chivavi lufu kwa ngu? Sa nzi kuvi. Mi chivi, mu kuchitira kuti ne chi tondezwa niiri chivi che chishiyeme, chi va lyeti lufu mwa ngu. Ichi i valyi kuchitira kuti che mulawo, chivi chive chivilaala kuzambiriza chikara. Mukuti twizi kuti mulawo luhuho, mi ime ni inyama. Ni va woozwa ku chivi kunsi lye vuhikana. ^{15 16} Mukuti chi ni chita, ka ni chi zuwiseza nenza. Mukuti chi ni sa ku chita, ka ni chi chiti, ne che ni sasuni, ni chichita. Mi haiva ni ni chita chi ni sa suni, ni zuminzana ne mulawo kuti mulawo u shiyeme. ^{17 18} Mi hanu ka isiri ime yo chi chita, mi chivi chi hala mwa ngu. Mukuti ni izi kuti mwa ngu, njo kuti mwi inyama yangu, ka kwina chintu chishiyeme chihala. Mukuti kuyereza kwe kushiyema kwina name, mi ka ni wolyi ku vu chita. ^{19 20 21} Mukuti vulotu vu ni saka ka ni vu pangi, mi vuvilaala vu ni sa saki, uvo vuni chita. Hanu haiva ni chita che ni sa saki ku chita, lyinu ka isiiri ime yo chita, mi chivi chi hala mwangu. Ni wana, lyinu, mulawozana wiina mwangu kuti ni saka ku chita chilotu, mi kuti vuvilaala vwiina mwa ngu. ^{22 23} Mukuti ni lyi itumera mu mulawo we Ireza che muntu wiina mukati. Mi ni vona mulawozana usaswani mwi inungu ze muviri wangu. U lwa nowu mulawozana muya mwi ingana yangu. U ni wonda che mulawozana we chivi wiina mwi inungu ze muviri wangu. ^{24 25} Ni muntu yo vihere ahulu! Njeni yeeti na ni hululye mowu muviri we lufu? Mi Ireza a kambirwe cha Jeso Kirisiti Simwine weetu! Lyinu vulyo, ime kahavuhangu ni tendera mulawo we Ireza che ingana yangu. Nehakuvavulyo, che inyama ni tendera mulawozana we chivi.