¹ Lyinu hanu meve muvazii ve Ireeza, siina vana vaakwe vasunitwa. ² Mmi muyende mukusunwa, moona naye Kirisiti mwa va tusuni mmi na lyitovoha cheevaka lyetu. A valyi ineo ne chitavero, kuva chinunkisi vulotu chisangisa kwe Ireeza. ³ Vuhulye ne mikwa yoonse mivilala kapa kusuna vuhumi kazi swaneere ku waambolwa mukati keenu, moona mukuswanere kuvarumeri. ⁴ Kapa kuwamba zifwinsensoni, kuwamba zisenamaano, kapa zesheya zifwiinsensoni, zisashiyeme. Kunzelyovulyo kuve nekulyitumera. ⁵ Mwiizi ichi chovusakusima kuti ka kwiina vuhulye, kusajolola, kapa wiina inkulo inkaando, ko kucho kuti, ihuulye, wiina vuswa muvusimwiine vwa Kirisiti ne Ireeza. ⁶ Kanzi kuvi ne muntu yo michenga cha maanzwi a sena ituso. Cheevaka lyeezi zintu vukalyi vwe Ireeza vukeeza hewuulu lya vaana vasazuwi. ⁷ Lyinu mu siye ku kopana naavo. ⁸ Mukuti kalye muvalyi mukeerima, mmi hanu chimwi iseeri mwa Simwiine. Lyinu muyende siina vaana ve iseeri. ⁹ Mukuti chihantu che iseeri chiina muvulotu vonse, kushiyama ne vusakusima. ¹⁰ Usake chisangisa kwa Simwiine. ¹¹ Kaanzi ukopani naavo vasimitendo mivilala ye keriima. Kunzelyovulyo, i zwisikiza kuunze. ¹² Mukuti ziintu zi chita naavo mukulyiwuungula zifwiisa maswe insoni mane ne kuziwaamba. ¹³ Zintu zoonse, hazi toondezwa che iseri, chiza zwisikizwa haanze. ¹⁴ Mukuti chimwi ne chimwi cha zwisikizwa haanze chicha shinywa. Lyinu kutewa kuti, "Sisimuke, uwe yolyere, mane uvuuke kuvafwiire, ne Kirisiti ka veere kwaako." ¹⁵ Lyinu u lyitokomere mo yenda, ising'i sina muuntu ya sena maano mmi siina wiina maano. ¹⁶ Musakisisa inako mukuti mazuva kasishiyeme. ¹⁷ Mu siye kuvula maano. kunzelyovulyo, muzuwisisa kuti kusuna kwa Simwiine kwiinavulye. ¹⁸ Mane kaanzi mukolwa iwayini, mukuti itwala kukusinyeha. Kunzelyovulyo, mwizulye Luhuho Lujolola. ¹⁹ Muliwambisa che mapiselema ne zifera ne inzimbo zoluhuho. Muzimbe ne kuteemba Simwiine che inkulo zeenu. ²⁰ Inako zoonse mukulyitumera muzintu zoonse mwi izina lya Simwiine weetu Jeeso Kirisiti kwe Ireeza Isheetu. ²¹ Mulyiviike wumwi kuunsi lyo wumwi choku kuteka Kirisiti. ²² Vakulwakazi, mulyiviike kuunsi lyava mwihyenwanwe, sina kwa Simwiine. ²³ Mukuti mukwaame njomutwi wo mukulwakazi, sina Kirisiti mwaalyi mutwi we ikereke. Nje muhazi wo muviri. ²⁴ Mmi moona ikereke mwiina kunsi lya Kirisiti, bakulwakazi naavo vave kuunsi lya vakwaame vaavo muchimwi ne chimwi. ²⁵ Vakwaame, musune vamwihyenwanwe, moona Kirisiti mwaavasuni ikereke mane nalyitovoha chaayo. ²⁶ Aava chiti vulyo kuti a woolye kuijooloza. Ava ishaanza mumenzi che lyinzwi. ²⁷ Ava chiti vulyo kuti a woolye kulyiviikira ikereke ijolola, iseena ikwe kapa kunyaana kapa chimwi vulyo, kono ijolola iseena ne chifoseheere. ²⁸ Che inzira iswana, vakwaame vaswaneere kusuna vakulwakazi vaavo siina miviri yaavo. Iye yo suni mwihyaavo u lyisuni mwiine. ²⁹ Kakwiina ya vatoyi muviri waakwe. Kunzelyovulyo, wuu tokomere ne kuu suna, moona Kirisiti mwaa suni ikereke. ³⁰ Mukuti tu zivalyi zo muviri waakwe. ³¹ Cheelyi ivaka mukwaame kasiye veesi ne vaanyina a ka kopanywa ne mwiihyavwe mmi ava voveere kavave inyama imwiina. ³² Ichi njo vusakusima vukaando vuwungwirwa, mmi nni waamba cha Kirisiti ne ikereke. ³³ Nangatikwiinavulyo, wuumwi ne wuumwi weenu naye u swaneere kusuna mwihyaavo iiri njeyemwiine, mmi mukulwakazi a kuteke mwiihyavo.