¹ Chikwiinavulyo, ime nimusuminwa wa Simwiine, ni mikumbiira kuti muyende cho kushiyama mumu vasumpwa . ² Muhalye cho kulyivikakunsi ne kushiyama ne nkuloonde. Mulyitambulye cho kulyisuna. ³ Muchite neenza kuzwiira havusu mukuwoondinsana cho Luhuho muku zuminzana ko kushiyeme. ⁴ Muviri u mwiina ne Luhuho lu mwiina, moona naanwe mu muvasumpirwa isepiso imwiina vulyo yokusumpwa kweenu. ⁵ Simwiine umwiina, itumero iimwiina, ne ikolovezo iimwiina, ⁶ ne Ireeza umwiina Ishaavo voonse. Wiina hewuulu lye ziintu zoonse ne chavantu voonse ne muzoonse. ⁷ Umwi ne umwi weetu avahewa ineo kuya che chilyikanyo che ineo ya Kirisiti. ⁸ Moona ihuko mulyivacho: " Cho tantukira kwiiwulu, a vayendi ne zikomwa ku vukombwa. Naaha vaantu ineo." ⁹ Kutalusanzi, " Ava tantuki," mbwiita chikuti ava shetumukiri kuunsi lye inkaanda? ¹⁰ Iye ya vashetumuki njeyena muntu yo swana ya va tantukiri kwiwuulu lya mawuulu oonse. Ava chiti ichi kuti a woolye kwizula muziintu zoonse. ¹¹ Kirisiti avahi ineo ziswana neezi: vaapositola, vaporofita, ve ivangeri, varuti ne vayeenzi ve liinzwi. ¹² Ava chiti ichi kukuza varumeri mu muteendo wo vulisani, kuzaaka muviri wa Kirisiti. ¹³ Uchita vuti mbiita chiina nitwasika mukuwoondinsaana mwi itumero ne kwiiziva Mwaana ee Ireeza. Uchita iichi mbwiita chinitwakula siina vana vavasiki hachiziimo chiizwiire cha Kirisiti. ¹⁴ Kwiina vuti kuti kaanzi nituvoolyi tuswane siina vahwiire. Kwiina vuti kuti kaanzi nituvoolyi tukwiitwakwiitwa ukunoku. Kuti kaanzi nitukwiitolwa noluhuho lumwi no lumwi lwe ituto, chekusawondeka kwa vantu cha maano mu zintu ziseena vuniti zi zieza. ¹⁵ Kono, katuwaambe vusakusima che irato ne kukula munzira zoonse zaakwe iye mutwi, Kirisiti. ¹⁶ Kirisiti njo kopanya muviri oonse wa vazumina hamwiina. Uwoondeswa hamwiina che tuso ye insinga kuti muviri oonse ukulye ne kulyizaaka uwowiine che irato. ¹⁷ Lyinu hanu nichokuti, me Nimikoza mwa Simwiine: kaanzi nimuvoolyi muyendi siina Venkaanda muva yeendera mukulyi lyanganisa mu mihupulo yaavo. ¹⁸ Veena kafifi mumihupulo yaavo. Vava zwiiswa muvuhalo vwe Ireeza chokuvula maano kwaavo kwe inkulo zaavo zizuminine. ¹⁹ Kavafwi insoni. Va valyi twaalyi muvuhuulye kuchita mikwa yoonse mivilala ye itakazo ikweete iweereka. ²⁰ Mmi unwe kana muvalyituti Kirisiti vulyo. ²¹ Nisepa kuti muvazuwi ka haakwe. Nisepa muvalyituti chaakwe, moona vusakusima muvwiina kwa Jeso. ²² Muswanere kuchupula kuya chemikwa yeenu ya kalye, muuntu wa kalye. Nje muuntu wa kalye yo voola cheevaka lye mikwa yeenu yo kuchengerera. ²³ Muvikire kumbalyi muntu wakalye kuti muwoolye kushiyamiswa inhuho ze mihupulo yeenu. ²⁴ Muchite ichi kuti muwoolye kuzwata muuntu muhya, kuya chokusuna kwe Ireeza. Avavumbwa mukushiyama ne kumaninina ko vusakusima. ²⁵ Lyinu hanu musiye kuchenga. "Muwaambe vusakusima, wumwi ne wumwi ne ya vaambeene naye," mukuti tuvaantu vaamwiina kumwi numwi. " ²⁶ Mu veenge, kono musiye kulewuha. " Kanzi musiyi izuva kwimina ni musiveengete." ²⁷ Kanzi muhi satani chivaka. ²⁸ Wumwi no wumwi yo wiiva a zimike kwiiva. Mmi a lyichitire. A teende zishiyeeme cha maanza aakwe , kuti awoolye kulyikawuhanyeza ne vaseena chimwi. ²⁹ Kaanzi kuvi lyiinzwi ivilala lyiizwa mutuholo tweenu. Mmi kuzwe maanzwi vulyo ashiyeme atusa vasaka ituso, a woolye kutusa vaatekete. ³⁰ Mmi musiye kuzuwisa vutuku Luhuho Lujolola lwe Ireeza. Chaakwe chiingi muvaswayerwa izuva lyo kuhazwa. ³¹ Musiye vukalyi, kuveenga, kukalyiha, kulwa, ne kutukana, hamwiina ne zoonse ze chivi. ³² Muve ne chisemo wumwi ku wumwi. Mulyizuwire vutuku. Mulyiwoodere, moona Ireeza mwavamiwoonderi cha Kirisiti.