¹ Laju mlekat yo klimo nyiup temburi iyo, ai aku kito erai bintong yo latu ngket langit epo ban dnia, ai epo iyo dnie kunsi luang jurang maot. ² Jadi ingkang iyo doko jawong luang jurang maot ene, laju dombo doko utut ngket luang ene kati utut bliku olay, ai mato olo ai langit jadi seom koe utut luang ene. ³ Ai ngket utut ene nglepopot baling upan-upan ban dnia ai epo dero dnie kuasa sama kati kuasa kremau-kremau mbo dnia. ⁴ Ai epo dero nulek, apa dero nang ngrusak dikut-dikut mbo dnia ktine low oti-oti ktine low tonga-tonga kayu, tapi pulun ulun yo belo di makai mtrai Allah mbo dai iyo. ⁵ Ai dero belo di snie nte ngempate ulun, tapi pulun ngurow ngesa dero limo bulan kola iyo, ai kurow ksa ene kati kurow ksa ngremau, ena io ngikit ulun. ⁶ Ai des jman ene ulun-ulun anta meto mate, tapi dero belo anta ruku, ai dero anta kakan mate, tapi mate ene buyo ngket dero. ⁷ Ai nau upan-upan ene sama kati kuda yo nraduh nte prang, ai ban utok dero keo yo kati-kati nau mahkota amas, ai wae dero sama kati nau wae ulun, ⁸ ai balo dero sama kati balo bang bawe ai kukut dero sama kati kukut singa, ⁹ ai dada dero sama kati baju bsi, ai oyon olar dero kati oyon grobak-grobak yo patak deo kuda, yo desung monsit epo awa prang. ¹⁰ Ai ikuy dero sama kati ngremau ai keo pnyingot iyo, ai mbo lang ikuy dero ene keo kuasa dero nte msiet ulun, limo bulan kola iyo. ¹¹ Ai raja yo mrenta dero yo doko mlekat jurang maot; karan iyo lang basa Ibrani yo doko Abadon ai lang basa Yunani yo doko Apolion. ¹² Sesa beta yo tla sundok lalo. Tempo ndo anta nyarak duo ksesa nua. ¹³ Laju mlekat yo ke onom nyiup temburi iyo, ai aku kringo keo oyon baling ngket ke opat tanduk mesbah amas yo mbo onon Allah, ¹⁴ ai ngulek epo mlekat yo ke onom yo ngop temburi ene: "Utis ka ke opat mlekat yo bsiret dempet lowak olay Efrat ene." ¹⁵ Jadi utis iyo ka ke opat mlekat yo sundok sniap nte jam ai olo, bulan ai taun nte ngempate bagi tolu ngket eka ulun. ¹⁶ Ai kdeo tentara ene yo doko duo ratus juta psukan bkuda; dingo ku kdeo dero. ¹⁷ Jadi ktine ka doko aku kito lang pengkito endo kuda-kuda ai ulun-ulun yo nendung iyo; dero makai baju bsi, mea api ai biru ai lemit blerang tako iyo; utok kuda-kuda ene sama kati utok singa, ai ngket bowa iyo baling api, ai utut ai blerang. ¹⁸ Koe tolu slaka endo pnate bagfi tolu ngket eka ulun, yo doko koe api, ai utut ai blerang, yo baling ngket lang bowa iyo. ¹⁹ Koe kuasa kuda-kuda ene keo mbo lang bowa iyo ai mbo lang ikuy iyo. Koe ikuy iyo sama kati nipo; dero keo utok ai diang utok dero ene dero ngrusak. ²⁰ Tapi ulun yo mak, yo belo di mate koe slaka ene, nokon belo btobat ngket gawi gata tangan dero: dero belo di kakan sdang nyembah roh-roh triaw ai berhala-berhala ngket amas ai pirak, ngket loyang, batu ai kayu yo belo di tau meti ai nempaning ai malan, ²¹ ai dero belo tobat ngket ngempate, lmu amal, ngalut pokeng ai ngako.