¹ Ai des Anak Domba ene ngingkang mtrai sampe yo mmturu, jadi lngngongo ka belo keo oyon mbo sorga, kira-kira tenga jam kola-iyo. ² Laju aku kito turu mlaekat yo akat onon Allah, ai epo dero dnie turu tmburi. ³ Jadi ulet mlaekat yo mak, ai io malan epo akat dmpet mezbah diang erai prapen amas. Ai epo-iyo dnie roa jombu nte io die sama-sama diang doa eka-eka ulun kudus ban mezbah amas onon awa pnunge Raja ene. ⁴ Jadi dombo doko utut jombu sama-sama diang doa ulun-ulun kudus ene ngket kayang mlaekat ene epo onon Allah. ⁵ Laju mlaekat ene ngalek prapen ene, ngatok-iyo diang api ngket mezbah, ai nurak-iyo epo dnia endo. Jadi motu doko oyon nayu, diang ilap ai klakui. ⁶ Ai eka turu mlaekat yo ngop turu tmburi ene siap-siap nte nyiup tmburi. ⁷ Laju mlaekat yo tla nyiup tmburi-iyo ai ulet doko uran es, ai api, sampur daya; ai eka-eka yo ene tnurak epo dnia endo: jadi sia doko bagi tolu ngket dnia endo ai bagi tolu ngket tonga-tonga kayu ai eka sia doko pupus dikut-dikut ijau. ⁸ Laju mlaekat yo mmduo nyiup tmburi-iyo ai keo yo kati tunden olai, yo dolan raya koe api, tnurak epo lang tasik. Jadi bagi tolu ngket tasik ene jadi daya, ⁹ ai mate ka doko bagi tolu ngket eka-eka yo tnampa yo keo kesong lang tasik ai tomo doko bagi tolu ngket eka-eka kpal danum. ¹⁰ Laju mlaekat yo mmtolu nyiup tmburi-iyo ai toyak doko ngket langit erai bintong olai, dolan raya kati dmet, ai io latu nakin bagi tolu ngket lowak-lowak ai mato danum-mato danum. ¹¹ Karan bintong ene yo doko Apsintus. Koe ene bagi tolu ngket eka-eka danum jadi apsintus, ai deo ulun mate koe danum ene, koe sundok jadi pait.