¹ Ai aku kito erai kongo mlekat yo mak yo galak diwa ngket sorga, bsengkulop lang jaun, ai juata keo mbo ombon utok iyo ai wae iyo sama kati nau matolo, ai botis iyo kati nau ori api. ² Lang kayang iyo io nggop erai gulungan kitab idi yo bkuar. Botis sanan Io stoda mbo tasik ai botis sei Io stoda mbo tana ombo, ³ ai io nyntongaw diang oyon ries sama kati oyon singa yo nmou. Ai des sundok io nyntongaw, turu gregu ene mmringo oyon iyo. ⁴ Ai lipas turu gregu ene sundok bsara, aku kakan nulis iyo, tapi aku kringo keo oyon ngket sorga ngulek : "Tnanda segel ka ise yo nulek koe turu gregu ene ai autka iko nulis iyo !" ⁵ Ai mlekat yo itan ku akat mbo ban tasik ai mbo tana ombo, ngengkat tangan sana iyo epo tadah langit, ⁶ ai io bsumpah makai karan Io yo bolum sampe turai-turai, yo sundok nampa langit ai eka-eka atok iyo, ai dnia diang eka atok iyo, ai tasik diang eka atok iyo, ulek iyo : "Belo anta tnanggo oli ! ⁷ Tapi montuk des oyon tmburi ngket mlekat yo mmturu, yo ene ena des io nyiup tmburi iyo, jadi anta sampe des mutus yo melim ngket Allah, kati yo sundok sampe Io epo batak-batak-Iyo, yo ene nabi-nabi." ⁸ Ai oyon yo sundok dingo ku ngket langit ene ngulek lou epo aku, ulek iyo : "Malan ka, alek ka gulung kitab yo wekar mbo kayang mlekat, yo akat mbo ombon tasik ai mbo ombon tana ombo ene. " ⁹ Laju aku malan ngompoh mlekat ene ai tindu epo iyo, apa io mie gulung kitab ene epo aku. Ulek iyo epo aku : "Alek ka ai okan ka io; io anta nampa buntung kiso kanam pait, tapi mbo lang bowa ko ai anta kiso kanam mamis kati dita wani. " ¹⁰ Laju aku ngalek kitab ene ngket kayang mlekat ene, ai kuman iyo : mbo lang b owa ku io mamis kati dita wani, tapi des sundok aku kuman iyo buntungku jadi pait kanam iyo. ¹¹ Jadi io ngulek epo aku : "Iko arus keo pmere nua epo deo bangsa ai suku-suku ai basa ai raja. "