¹ Sundo ene dnie epo erai batang bulu, kati goloy pnyukat nau iyo, diang pmensara ktindo: "Uat ta ai snukat Bait Allah ai mezbah ai dero yo sembayang mbo lang ne. ² Tapi nang snukat natar Bait Suci yo tadah baling, nang ka iko nyukat iyo, koe io sundok dnie epo bangsa-bangsa yo mak ai dero anta nganja Kota Suci opat pulu duo bulan kola iyo." ³ Ai Aku anta mie gawi epo duo saksi-Ku, apa dero keo pmere ulak nyoru, sribu duo jatus onom pulu olo kola iyo. ⁴ Dero ene kduo tonga zaitun ai kduo botis plita yo akat mbo onon Tuhan mupus dnia. ⁵ Ai ena keo ulun yo kakan mensiet dero, baling ka api ngket bowa dero mesia eka bali dero. Ai ena keo ulun yo kakan mesiet dero, arus mate ktine low. ⁶ Dero keo kuasa nokom langit, apa nang diwa uran kola-kola dero keo pmere; ai dero keo kuasa epo eka-eka danum nte ngensut iyo jadi daya, ai nte nengkau dnia dia bemasam jnis pengkono pengkna, tongku derang dero memetua iyo. ⁷ Ai ena dero sundok msundok ksaksian dero, jadi korik yo nyoret ngket lang luang maot, anta mrang dero ai mkalah diang ngempate dero. ⁸ Ai antu dero anta pnayak ban tembok kota olay, yo diang sara rohani nulek Sodom ai Mesir, mbo mone low Tuhan dero snalib. ⁹ Ai ulun-ulun ngket eka bangsa ai suku ai basa ai kaum, kito antu dero tolu olo stenga kola iyo ai ulun-ulun ene ngusan antu dero nlowong. ¹⁰ Ai dero yo nongos mbo dnia ego ai ego beta koe dero ene ai pesta ai bako die adiah, koe kduo nabi ene sundok jadi kurow ksa nte nengkono eka ulun yo nongos mbo dnia. ¹¹ Tolu olo stenga nua sundok ene sumba doko roh bolum ngket Allah epo lang dero, sampe dero nyuli ai eka ulun yo kito dero jadi takut beta. ¹² Ai ulun-ulun ene kringo keo oyon yo ries ngket sorga ngulek epo dero: "Dombo ka epo dido!" Laju dombo ka dero epo langit, tokom jaun, itan koe eka-eka bali-bali dero. ¹³ Des ene keo ka doko klakuy olay ai bagi spulu ngket kota ene roros, ai turu ribu kongo ulkun mate koe klakuy ene ai ulun-ulun yo mak takut beta, laju ngemulia Allah yo mbo sorga. ¹⁴ Pmenasa yo kduo sundok lalo: Eti ta, kbenasa yo ktolu duni ulet. ¹⁵ Laju mlekat yo kturu nyiup temburi iyo, ai dingo ka oyon-oyon ries mbo lang sorga, ulek iyo: "Pmerenta dnia gop Tuhan taka ai Io yo sundok diurapi-Iyo, ai Io anta mrenta kati raja sampe turai-turai." ¹⁶ Ai kduo pulu opat pngentuo-pngentuo, yo tunge ela onon Allah mbo ban pnunge dero, nyongkop ai nyembah Allah, ¹⁷ ulak ngulek: "Kain ngulek sukur epo Iko, o Tuhan, Allah, Yo Paling kuasa, yo keo ai yo sundok keo, koe Iko sundok nrima kuasa Ko yo olay ai sundok nindu mrenta jadi raja ¹⁸ ai eka bangsa sundok mara, tapi pngemara Ko sundok ulet ai des nte ulun-ulun mate nte pnutus ai nte mie upa epo batak-batak Ko, nabi-nabi ai ulun-ulun kudus ai epo dero yo takut se karan-Ko, epo ulun-ulun alus ai ulun-ulun kodal ai nte ngempate ise-ise ulun yo ngempate mbo dnia." ¹⁹ Wingkang ka doko Bait Suci Allah mbo sorga, ai melak ka doko oli pti janji-Iyo mbo lang Bait Suci ene ai keo ka doko ilap ai oyon nayu ries ai klakuy ai uran es ulak lopa.