¹ Jadi aku kito mbo kayang- sanan Io yo tunge la ombon pnunge raja ene, erai gulung kitab, yo tnulis ngket tadah dalom ai engket tadah baling iyo ai tnanda segel diang turu tanda segel. ² Ai- aku kito erai kongo mlekat yo paguh, yo nyntongaw diang oyon ries, ulek yo: "Ise ka yo kate nte ngekar gulung kitab ene ai nglumpik tanda-tanda segel iyo?" ³ Tapi ndok belo erai kongo yo sorga ktine low yo mbo dnia ktine low yo mbo imbat dnia, yo kuli ngekar gulungan kitab ene ktine low yo kuli meti ngket tadah dalom iyo. ⁴ Koe ene nangis ka doko aku ndok ngsepon, koe ndok belo erai kongo ulun yo sngkono kate ngekar gulung kitap ene ai ktine low meti ela dalom iyo. ⁵ Laju keo ka doko erai kongo ulun tuo ngulek epo aku: "Nang iko nangis! Sbetayo timang ngket suku Yehuda, yo ene suli Daud, sundok kuret, ene doko io yo kate ngekar gulung kitab ene ai ngelumpik turu tanda segel iyo." ⁶ Des ene aku kito mbo ekang pnunge raja ai opat korik ene ai mbo ekang tuo-tuo ene akat erai kukui Anak Domba kati sundok sinomble, keo tanduk turu ai keo mato turu: io doko ene turu Roh Allah yo snuyu epo mupus dnia. ⁷ Laju ulet ka doko Anak Domba ene ai nrima gulung kitab ene ngket kayang Yo yo tunge ban pnunge raja ene. ⁸ Des Io ngalek gulung kitab ene, nyongkop ka doko opat korik ai duo pulu opat pngntuo-pngntuo ene ela onon Anak Domba ene, tongku dero ngop erai ksapi ai erai ktowong amas, ponu diang jombu: ene doko doa ulun-ulun kudus. ⁹ Ai dero slegu legu bayu, ulek io: "Iko kate nrima gulung kitab ene ai nglumpik tanda-tanda segel iyo; koe Iko sundok sinomble ai diang daya- Ko Iko sundok moli dero nte Allah ngket tongku-tongku suku ai basa ai kaum ai bangsa. ¹⁰ AI Iko sundok nampa dero jadi krajaan ai jadi imam-imam nte Allah taka, ai dero anta jadi pmrenta kati raja mbo dnia: ¹¹ Des ene aku kito ai kringo oyon deo mlekat nglekum pnunge raja, korik-korik ai tuwo-tuwo ene kdeo dero bribu-ribu ai bjuta-juta, ¹² ulek yo diang oyon ries: "Anak Domba yo sinomble ene kate nte nrima kuasa, ai pngkeo, ai pntau, ai pnggalak, ai knuon, ai kmulia, ai puji-puji!" ¹³ Ai aku kringo eka korik yo mbo sorga ai yo mbo dnia ai yo mbo imbat dnia ai yo mbo lang tasik ai eka yo keo mbo lang ne, ngulek: "Nte Io yo tunge ban pnunge raja ai nte Anak Domba, ene doko puji-puji ai knuon ai kmulia ai kuasa ndok turai-turai!" ¹⁴ Ai opat korik ene ngulek: "Amin". Ai tuo-tuo ene pukan nyongkop ai nymbah.