¹ Des sundok ene aku kito: Sbeta-beta iyo, erai jawong wingkang mbo sorga ai oyon yo prene yo sundok dingo ku, ngulek epo aku kati oyon temburi, ulek iyo: Dombo ka epo dido ai Aku anta mkelak epo iko ise yo arus terjadi sundok endo. ² Peles aku sumba Roh ai eti ta, erai pnunge raja mbo sorga, ai pnunge raja ene tunge Erai kongo. ³ Ai Io yo tunge ban pnunge raja ene nau iyo kati permata yaspis ai permata sardis; ai keo juwata lekum pnunge raja ene trang beta kati zamrud nau iyo. ⁴ Ai nglekum pnunge Raja ene keo duo pulu opat pnunge raja, ai mbo pnunge-pnunge raja ene tunge duo pulu opat pngentuo-pngentuo, yo spakai bura ai mahkota amas mbo utok dero. ⁵ Ai ngket pnunge Raja ene nyoret ilap ai oyon nayu ries, ai turu dmet dolan onon pnunge Raja ene: ene doko kturu Roh Allah. ⁶ Ai ela onon pnunge Raja ene keo tasik kaca kati intan; mbo tenga-tenga pnunge Raja ene ai nglekum iyo keo opat korik ponu diang mato, mbo tadah ono ai mbo tadah sori. ⁷ Nau korik yo tla kati nau singa, ai korik yo kduo kati anak lembu, ai korik yo ktolu kati wae kati ulun, ai korik yo keopat sama kati mpulu koniw yo desung tmiling. ⁸ Ai keopat korik ene masing-masing keo onom olar, nglekum iyo ai mbo ngket tadah dalom iyo ponu diang mato, ai belo keo sdang-sdang iyo dero nyentongaw molo malom: "Kudus, kudus, kudus ka Tuhan Allah, Yo Paling kuasa, yo sundok keo ai yo keo ai yo anta ulet." ⁹ Ai tongku derang korik-korik ene mie puji-pujian, ai ormat ai ngulek sukur epo Io, yo tunge ban pnunge Raja ene ai yo bolum sampe turai-turai, ¹⁰ jadi nyongkop ka doko keduo pulu opat pngentuo-pngentuo ene mbo ononm Io yo tunge ban pnunge Raja ene, ai dero nyembah Io yo bolum sampe turai-turai. Ai dero nebir mahkota dero ela onon pnunge Raja ene, ulak ngulek: ¹¹ "O Tuhan ai Allah kain, Iko sengkono nrima puji-pujian ai ormat ai kuasa; koe iko sundok nampa eka-eka ise masam; ai koe ptua-Ko eka ene keo ai tnapa."