¹ "Ai tnulis ka epo mlekat jmaat mbo Sardis: Endo doko firman Io, yo ngempun turu Roh Allah ai turu bintong ene: Aku tau eka-eka gawi gata kam: ikam nulek bolum, padahal ikam mate! ² Uat aut, ai pinoturon ka ise yo aso toro yo sundok duni mate, koe ndok belo erai gawi gata kam itan Ku yo sempurna ela onon Allah-Ku. ³ Koe ene knop-knop ta, ktimbe ikam sundok nrima ai nempaning ene; aya ka ene ai btobat! Koe ena ikam belo bjaga-jaga, Aku anta ulet kati pngako ai ikam belo tau jman Aku kolan-kolan ulet ngompoh ikam. ⁴ Tapi mbo Sardis tenu-tenu kongo ulun belo di ngemerota pnyepakai iyo; dero anta malan diang Aku dian pnyepakai bura, koe dero sengkono nte ene. ⁵ Ise-ise ulun yo kuret, io anta snua pnyepakai bura yo ktine; Aku belo anta ngeloli karan iyo ngket kitab awa karan ulun yo kuli bolum kden, Aku ube anta ngangkan karan iyo mbo onon Bapa-Ku ai mbo onon mlekat-mlekat-Iyo. ⁶ Ise yo keo tlingo, moko iyo io nempaning ise yo ulek Roh epo jmaat-jmaat." ⁷ "Ai tulis ka epo mlekat jmaat mbo Filadelfia: Endo doko firman ngket Yo Kudus, Yo Beta, yo ngop kunsi Daud; ena Io ngingkang, mba keo yo kuli nokom; ena Io nokom, mba di keo yo kuli ngingkang. ⁸ Aku tau eka-eka gawi gata kam: Eti ka, Aku sundok ngingkang jawong nte ngkam, yo ndok belo erai kongo ulun kuli nokom iyo. Aku tau se pngelian kam belo keo ise-ise, tapi ikam ngaya firman-Ku ai ikam belo di belo ngangkan karan-Ku. ⁹ Eti ka, tenu-tenu kongo ngket umat Iblis, yo doko dero yo ngulek se dero ene ulun Yahudi, tapi yo sbetaiyo belo di ktine, tapi eta, anta srah Ku epo ikam. Sbeta-beta iyo Aku anta nyemuyu dero ngompoh ai nyongkop mbo onon botis kam ai ngangkan, se Aku nengkosang ikam. ¹⁰ Koe ikam ngaya firman-Ku, nte trus sabar minte Aku, jadi Aku low anta ngenjaga ngawat ikam ngket olo pngikap yo anta ulet mbo mupus dnia nte ngikap dero yo nongos mbo dnia. ¹¹ Aku duni ulet. Negop ka ise yo keo mbo ikam, apa ndok belo erai kongo ngalek mahkota kam. ¹² Ise-ise ulun yo kuret, io anta nampa Ku jadi sokoguru mbo lang Bait Suci Allah-Ku, ai io belo baling oli ngket mne; ai mbo iyo anta tulis-Ku karan Allah-Ku, karan kota Allah-Ku, yo doko Yerusalem bayu, yo diwa ngket sorga ngket Allah-Ku, ai karan-Ku yo bayu. ¹³ Ise yo keo tlingo, moko iyo io nempaning ise yo ulek Roh epo jmaat-jmaat." ¹⁴ "Ai tulis ka epo mlekat jmaat mbo Laodikia: Endo doko firman ngket Amin, Saksi yo stia ai yo beta, pnyemula ngket pnyentampa Allah: ¹⁵ Aku tau eka-eka gawi gata kam: ikam belom di rongin ai belo di layong. Buen ube ena ikam rongin ena belo layong! ¹⁶ Jadi koe ikam layong-layong kulum, ai belo di rongin belo low di layong, ikam anta okek-Ku ngket bowa-Ku. ¹⁷ Koe ikam ngulek: Aku tataw ai aku sundok mtataw aku se ai aku belo di kurang ngambit ise masam, ai koe ikam belo di tau, se ikam bol bnasa ai sial, kao, posa ai blayi blanyang, ¹⁸ jadi Aku ngnasehat ikam, apa ikam moli ngket Aku amas yo sundok pinolio lang api, apa ikam jadi tataw, ai low pnyepakai bura, apa ikam makai iyo, apa nang melak se ikam blayi blanyang yo ngemai; ai low lnga nte mkolat mato kam, apa ikam kuli meti. ¹⁹ Ise-ise ulun yo tengkosang-Ku, io kae-Ku ai tokai-Ku; koe ene srah kesong kam ai btobat ka! ²⁰ Eti, Aku akat mbo onon jawong ai ngetok; ena keo ulun yo krinngo oyon-Ku ai ngingkang jawong, Aku anta sumba nyeruku iyo ai Aku kuman sama-sama diang io, ai io sama-sama diang Aku. ²¹ Ise-ise ulun yo kuret, io anta pentunge-Ku sama-sama diang Aku mbo ban pnunge-Ku, kati Aku low sundok kuret ai tunge sama-sama diang Bapa-Ku ban pnunge-Iyo. ²² Ise yo keo tlingo, moko yo io nempaning ise yo ulek Roh epo jmaat-jmaat."